الماتىلىقتار ايعا «ساياحاتتايتىن» بولدى

الماتى. قازاقپارات - الماتىدا «الماتى عالامشارى» مۇراجايى كەشەنى بوي كوتەرەدى.

بۇل تۋرالى بۇگىن الماتىدا وتكەن ينۆەستيتسيالىق فورۋم بارىسىندا بەلگىلى بولدى. جاڭا نىسان ناۋرىزباي اۋدانىندا سالىنادى.

جوبانى تانىستىرعان Design Strategy Group كومپانياسىنىڭ وكىلى ەۆگەنيا موموت مۇنداي نىساننىڭ قازاقستاندا بالاماسى جوق ەكەندىگىن ايتتى.

«الەمدە مۇنداي نىساندار كوپ. ال قازاقستاندا ءبىرىنشى رەت سالىنعالى وتىر. تۋرا كينوتەاترداعىداي اسەر قالدىرادى. بارلىق جەردە ەكران بولادى. كەلۋشىلەر جۇلدىزدى اسپاندى باقىلاي الادى. بۇل جەردە ساپالى عالامنىڭ پايدا بولعانىن باقىلاۋعا بولادى. Moon Track اتتراكتسيونىندا ايعا ساياحات جاساۋعا مۇمكىندىك تۋادى»، - دەدى ە. موموت.

ونىڭ ايتۋىنشا، مۇندا ءبىر ۋاقىتتا 260 ادامعا قىزمەت كورسەتىلەدى. سونداي-اق، ينۆەستيتسيالىق فورۋم بارىسىندا ناۋرىزباي اۋدانىنىڭ ينۆەستيتسيالىق مۇمكىندىكتەرى كورسەتىلدى. الماتى قالاسى كاسىپكەرلىك جانە يندۋستريالدى-يننوۆاتسيالىق دامۋ باسقارماسى تاراتقان مالىمەتكە سەنسەك، سوڭعى 3 جىل ىشىندە نەگىزگى كاپيتالعا سالىنعان ينۆەستيتسيالاردىڭ كولەمى 3 ەسەگە، ياعني 7 ميللياردتان 22 ميللياردقا دەيىن ءوستى. شوب جۇمىس ىستەپ جاتقان سۋبەكتىلەرىنىڭ سانى 4 ەسەگە (2014-جىلى 175 جانە 2017-جىلى 755) ءوستى.

3 جىل ىشىندە شامامەن 1500 جاڭا جۇمىس ورىندارى قۇرىلدى. بۇدان باسقا، ينفراقۇرىلىمدى دامىتۋ بويىنشا بەلسەندى جۇمىس جۇرگىزىلۋدە. اتاپ ايتقاندا، ناۋرىزباي اۋدانىندا 25 گ ا اۋماعىندا «نۇرلى دالا» تۇرعىن ءۇي كەشەنىنىڭ قۇرىلىسى ءجۇرىپ جاتىر.

مۇندا جالپى سانى 5770 پاتەر سالىنادى. 858 پاتەر 2018-جىلعى ساۋىردە پايدالانۋعا بەرىلەدى دەپ جوسپارلانىپ وتىر.