قىرعىزستانعا كومەك اقشالاي جانە جابدىقتار تۇرىندە كورسەتىلەدى - باقىت سۇلتانوۆ

استانا. قازاقپارات - ق ر پارلامەنتى ءماجىلىسىنىڭ جالپى وتىرىسىندا پالاتا دەپۋتاتتارى «قازاقستان رەسپۋبليكاسىنىڭ ۇكىمەتى مەن قىرعىز رەسپۋبليكاسىنىڭ ۇكىمەتى اراسىنداعى كومەك كورسەتۋ جانە ونى پايدالانۋدى باقىلاۋ ءتارتىبى تۋرالى حاتتامانى راتيفيكاتسيالاۋ تۋرالى» زاڭ جوباسىن ماقۇلدادى، دەپ حابارلايدى قازاقپارات.

«قىرعىز رەسپۋبليكاسى ەۋرازيالىق ەكونوميكالىق وداققا قوسىلدى. وداقتىڭ كەدەندىك شەكاراسى سىرتقى كونتۋرعا، ياعني قىرعىز-قىتاي، قىرعىز-تاجىك، قىرعىز-وزبەك شەكارالارىنا اۋىستى.

بۇل رەتتە، قىرعىز شەكاراسىنىڭ ينفراقۇرىلىمى ساپالى جاراقتاندىرۋ مەن جاڭعىرتۋدى قاجەت ەتەدى. ەلدىڭ ەكونوميكالىق قاۋىپسىزدىگىن قامتاماسىز ەتۋ جانە وداقتىڭ سىرتقى شەكاراسىن باقىلاۋ ماقساتىندا مەملەكەت باسشىلارى دەڭگەيىندە قىرعىزستانعا كومەك كورسەتۋ تۋرالى شەشىم قابىلداندى.

كومەك قىرعىزستاننىڭ وداققا قوسىلۋى جونىندەگى «جول كارتالارىندا» كوزدەلگەن ءىس-شارالاردى ىسكە اسىرۋعا باعىتتالعان. وسى شارتتار 2016-جىلى 26- جەلتوقساندا قازاقستان رەسپۋبليكاسىنىڭ ۇكىمەتى مەن قىرعىز رەسپۋبليكاسىنىڭ ۇكىمەتى اراسىنداعى ەۋرازيالىق ەكونوميكالىق ينتەگراتسيا جاعدايىندا ەكونوميكالىق ىنتىماقتاستىقتى دامىتۋ تۋرالى كەلىسىممەن بەكىتىلگەن.

«كەلىسىمنىڭ 2 جانە 3-باپتارىن ىسكە اسىرۋ ءۇشىن كومەك كورسەتۋ ءتارتىبى مەن تەحنيكالىق جاردەم كورسەتۋ ءىس-شارالارى تىزبەسى (شىعىندار سمەتاسى) ازىرلەندى»، - دەدى قارجى ءمينيسترى باقىت سۇلتانوۆ.

تارتىپكە سايكەس، كومەك بىرنەشە ترانشتارمەن بەرىلەدى. ءار كەزدە جەكە تەحنيكالىق جاردەم كورسەتۋ تۋرالى حاتتامالارعا قول قويىلادى جانە راتيفيكاتسيالانادى. ەكىنشىدەن، ءىس-شارالار تىزبەسىنە قىرعىزستاننىڭ ەۋرازيالىق ەكونوميكالىق وداققا قوسىلۋى بويىنشا «جول كارتاسىنىڭ» ءىس-شارالارى عانا كىرەدى.

ۇشىنشىدەن، كومەك اقشالاي قاراجات، جابدىقتار، تاۋارلار مەن قىزمەتتەر، وقىتۋ فورمالارى ارقىلى كورسەتىلۋى مۇمكىن. ترانشتاردىڭ جۇزەگە اسىرىلۋ قورىتىندىسى بويىنشا ونى پايدالانۋدى باقىلاۋ قامتاماسىز ەتىلەدى.

اۆتور: رۋسلان عابباسوۆ