استانا جاپونيانىڭ وساكا قالاسىمەن ىنتىماقتاستىقتى جەتىلدىرە تۇسۋگە نيەتتى

استانا. قازاقپارات - ەلوردا اكىمدىگىندە قالا اكىمى اسەت يسەكەشەۆ وساكا قالاسىنىڭ مەرى ەسيمۋروي حيروفۋمي باستاعان جاپون دەلەگاتسياسىمەن كەزدەستى، دەپ حابارلايدى استانا اكىمدىگىنىڭ باسپا ءسوز قىزمەتى.

استانا اكىمى كۇنشىعىس ەلىنىڭ مەيماندارىن قارسى الىپ، قوس تاراپتىڭ ءوزارا ءتيىمدى ىنتىماقتاستىعى ءۇشىن العىس ءبىلدىردى.

«استانا قالاسىنىڭ مەديتسينالىق جانە جەدەل جاردەم قىزمەتى اۆتوموبيلدەرىنىڭ پاركى، سۋمەن جابدىقتاۋ جۇيەسىن جاڭعىرتۋ، لوگيستيكالىق جەلىنى جەتىلدىرۋ سىندى كوپتەگەن بىرلەسكەن ناتيجەلى جۇمىستار جۇرگىزىلدى. بۇل جوپاندىق تاراپتىڭ استانانىڭ دامۋىنا قوسقان از عانا ۇلەسى. ءسىزدىڭ بۇگىنگى ساپارىڭىز قالالار اراسىنداعى ۇزاق مەرزىمدى سەرىكتەستىكتىڭ كەپىلى بولارىنا سەنىمدىمىن»، - دەدى اسەت يسەكەشەۆ.

بۇدان باسقا، كوپتەگەن ەلوردالىق كومپانيالار كايدزەن جۇيەسىنە كوشۋدە، ءداستۇرلى جاپون اسحاناسى بار مەيرامحانالار كوپتەپ اشىلۋدا، ال جاپون جەكپە-جەگىنىڭ جانكۇيەرلەرى قالانىڭ كوپتەگەن سپورت زالدارىندا شەبەرلىكتەرىن سىناي الادى.

ەسكە سالايىق، 2015-جىلدىڭ 27- قازانىندا استانادا قازاقستان پرەزيدەنتى نۇرسۇلتان نازاربايەۆ پەن جاپونيانىڭ پرەمەر-ءمينيسترى سيندزو ابەنىڭ قاتىسۋىمەن قازاقستان-جاپون بيزنەس فورۋمى وتكەن بولاتىن.

وندا مەملەكەت باسشىسى جاپوندىق ىسكەر توپتى ينۆەستيتسيالىق جوبالارعا قاتىسۋعا شاقىردى. ماڭىزدى جوبالاردىڭ ءبىرى - ەكسپو-2017 مامانداندىرىلعان حالىقارالىق كورمەسى.

«ەكى ەلدىڭ اراسىن بايلانىستىراتىن تاعى ءبىر سالا - بۇل ءبىزدىڭ بەيبىت ءومىر سۇرۋدەگى ورتاق ۇستانىمىز جانە مەملەكەتتەر اراسىنداعى ىقپالداستىق. جاپونيا مەن قازاقستان اراسىن يادرولىق قارۋ ماسەلەلەرى بويىنشا ءوزارا تۇسىنىستىككە نەگىزدەلگەن تاريحي تاجىريبە بىرىكتىرەتىنى ءسوزسىز»، - دەدى اكىم وساكا قالاسىنىڭ مەرىنە.

بۇدان باسقا، قالا اكىمى استانا مەن وساكا اراسىنداعى سەرىكتەستىكتى ودان ءارى دامىتۋعا قىزىعۋشىلىق تانىتىپ، وساكادا تۇرعىزىلعان جاساندى ارال ۇستىندەگى «كانساي» حالىقارالىق اۋەجايى سىندى قالا قۇرىلىسىنداعى شەشىمدەر بويىنشا تاجىريبە الماسۋعا شاقىردى.

اسىرەسە، تۋريزم يندۋسترياسىن دامىتۋ بويىنشا ىقپالداستىققا اسا كوڭىل ءبولىندى ءارى وساكا قالاسىنداعى تاريحي بەكىنىس سياقتى استانادا دا كورىكتى جەرلەر قۇرۋ ماسەلەسى، Universal Studio كوڭىل كوتەرۋ پاركى، كەلۋشىلەر اراسىندا اسا تانىمالدىققا يە «كايۋكان» وكەاناريۋم سىندى ەرەكشە جوبالار ماسەلەسى تالقىلاندى.

«استانادا ەكسپو-2017 كورمەسىن وتكىزۋ قالاداعى ينفراقۇرىلىمدى ودان ءارى دامىتۋعا ىقپال ەتەدى، «جاسىل» ەكونوميكاعا كوشۋگە مۇمكىندىك اشادى، سونداي-اق، جالپى ەلدىڭ ەكونوميكاسى ءۇشىن قۋاتتى مۋلتيپليكاتيۆتى ناتيجە بەرەدى. وسىنداي ماڭىزدى شارانىڭ وتكىزىلۋى ءبىزدىڭ ەكى تاراپتى ىقپالداستىعىمىزدىڭ تاريحىنا جاڭا سەرپىن بەرىپ، قالالار اراسىن بارلىق تاراپتان جاقىنداستىرا تۇسەتىنىنە كامىل سەنەمىن»، - دەدى اكىم.