باتىس قازاقستاندا ايشۋاق حاننىڭ قۇلپىتاسى تابىلدى

ورال. قازاقپارات - باتىس قازاقستان وبلىسىندا «جايىق پرەسس» ج ش س ۇيىمداستىرعان ىزدەستىرۋ جۇمىستارى بارىسىندا ايشۋاق حاننىڭ قۇلپىتاسى تابىلدى، دەپ حابارلايدى «قازاقپارات» ءتىلشىسى.

اتالمىش مەدياحولدينگتىڭ باس ديرەكتورى جانتاس سافۋلليننىڭ ءمالىم ەتكەنىندەي، بۇدان ءۇش جىلداي بۇرىن بەكەي ەسەنگەلدى ۇلىن زەرتتەۋ بارىسىندا جۋرناليست نۇرتاس نابيوللا ۇلى مەن باعدات مادي ۇلى بەكەي اۋىلى ماڭىندا قۇلپىتاسى بار دەگەندى ەستىپ، ارنايى بارعان.

وسى ساپار بارىسىندا نۇرتاس نابيوللا ۇلى بەكەي قورىمىنداعى قۇلپىتاستاردى دا سۋرەتكە تۇسىرە كەلگەن ەكەن. ول ونى سول كەزدە فەيسبۋك پاراقشاسىنا سالعان.

ءۇش جىل وتكەندە، فەيسبۋك ەسىنە سالعاندا، ءبولىسىپ، قايتا جاريالايدى. سونى كورگەن مۇراتبەك قاجى جاحاتوۆ مۇك باسقان قۇلپىتاس جازۋلارىنان ايشۋاق حان ءابىلحايىرۇلى دەگەندى انىق وقيدى.

«مىنە، بۇگىن ورال قالاسىنان 40 شاقىرىمداي قاشىقتىقتاعى، سامارا-شىمكەنت كۇرە جولىنان ەكى شاقىرىمداي جەردەگى بەكەي اۋىلى (تەرەكتى اۋدانى) ماڭىنداعى قورىمعا قايتا باس تىرەدىك.

ايشۋاق ءابىلحايىرۇلىنىڭ (1727-1812) قۇلپىتاسى مۇكتەن تازارتىلىپ، اۋدارىلىپ، وقىلدى. بىلاي جازىلعان ەكەن:

قاتار 1. ھۋال مۋلكۋ ال-حايۋل- لاززي لا يامۋت ابادا

2. ھازال مارحاد ال- مارحۋم ال ماعفۋر ال مابرۋر

3. ابۋ ال- مۇزافار ۋا ال- مانسۋر سايد باھادۋر حان

4. ايچۋاق يبن حان ابۋلحايىر يبن حادجى

5. سۇلتان الايھي ال- عافۋر ال راحيم ال- عۋفران

6. اللاھۋمما ادجالي ال- قابراھۋ راۋداتان مين رياددين الدجاننان

7. ۋالا تادجالي حافراتين مين ال- نيرانۋ حافرات. كافا بيل- ماۋت

8. تاريح 1227 سانا 15 ساۋىردە رەحلات ەتدى سەكسان بەش ياشىندا (بۇگىنگى جىل ساناۋىمىز بويىنشا 1812-جىلى 15- ساۋىردە 85 جاسىندا قايتىس بولعان)

9. (تورەنىڭ تاڭباسى) ارتقى جاعى:

1 كىشى يۋزىنىڭ قازاق حالقى ىشىندە

2. حۇكۇمەت يەلەيۋب حانلىق ىشىندە

3. ولۋب رازى م.. .. سىندە

4. ەتدى ...

5. حاياتىندا ەكى ۇعلى حان ولدى

6. ءبىرى جانتورە ءبىرى شيرعازى

7. ءمۇشاريف استاناسى تاعالا م.....م

8. قويىبدۇر ەنشى... العازى سۇلتان ايشۋاق ءابىلحايىرۇلى 1797-1805-جىلدار ارالىعىندا كىشى ءجۇزدىڭ حانى بولعان. حاندىققا 1797-جىلى 70 جاسىندا قول جەتكىزىپ، 78 جاسىندا ءوز ەركىمەن باس تارتقان. ورنىنا ۇلى جانتورە حان سايلانعان. وسىعان دەيىن اقجايىق اۋدانىنان 1795-1797-جىلدارى حان بولعان ەسىم نۇرالى ۇلىنىڭ جانە 1805-1809-جىلدارى حان بولعان تەرەكتى اۋدانىنان جانتورە ايشۋاق ۇلىنىڭ قۇلپىتاستارى تابىلعان بولاتىن.

مىنە، ەكەۋىنىڭ ورتاسىندا حان بولعان ايشۋاق ءابىلحايىرۇلىنىڭ دا قۇلپىتاسى تابىلىپ، اۋدارىلدى. قۇلپىتاستى اۋدارعان مۇراتبەك جاحاتوۆ پەن جۋرناليست قازبەك قابجان»، دەدى جانتاس سافۋللين.

اۆتور: ەلجان ەرالى