ەكسپو- عا كەلەتىن تۋريستەر ەڭ قىمبات قوناقۇي نومىرلەرىن برونداپ جاتىر

استانا. قازاقپارات - ەكسپو كورمەسىنە كەلەتىن تۋريستەر قىمبات قوناقۇي نومىرلەرىن برونداپ جاتىر. بۇل رەتتە، ەلوردادا قولايلى باعادا پاتەرلەر مەن حوستەل نومىرلەرىن الۋعا بۇرىنعىشا مۇمكىندىك مول، دەپ حابارلادى استانا اكىمدىگىنىڭ مەديا ورتالىعىنان.

 «استانا كونۆەنش بيۋرو» ج ش س ديرەكتورىنىڭ ورىنباسارى اسقار ادامبەكوۆتىڭ ايتۋىنشا، مەيماندار تاراپىنان «بەس» نەمەسە «ءتورت جۇلدىزدى» قوناقۇيلەرگە سۇرانىس جوعارى، ال ارزانىراق باعاداعى قوناقۇي، حوستەل، جاتاقحانالاردا ورىن كوپ.

«كورمەنىڭ العاشقى كۇندەرى قوناقۇي جەلىلەرى 100  پايىز تولدى. بەس نەمەسە ءتورت جۇلدىزدى قوناقۇيلەردە ءتىپتى بوس ورىن قالمادى. ال باسقا نومىرلەردە، ايتالىق، ءۇش جۇلدىزدى قوناقۇيلەردە ورىن جەتكىلىكتى» - دەدى ا. ادامبەكوۆ. ەلوردا اكىمدىگى قازاقستاندىق تۇرعىن ءۇي سەگمەنتىندە (قوناقۇيلەر) باعالار شەتەلدىكتەر ءۇشىن عانا ەمەس، ەلدىڭ ءار وڭىرىنەن كەلەتىن قوناقتارعا دا قولجەتىمدى دەپ سانايدى. باعانىڭ تەز قۇبىلۋىنا جول بەرمەۋ ماقساتىندا قالا بيلىگى جالعا بەرۋشىلەردىڭ ارنايى قاۋىمداستىعىن قۇردى.

«ءبىز http://Torlet.com پلاتفورما- سايتىن قۇردىق. بۇل ۆەبسايت ارقىلى ونلاين تۇرعىدا تۇراتىن ورىندى تاڭداپ، برونداۋعا بولادى»، - دەدى استانا قالاسى اكىمىنىڭ ورىنباسارى ماليكا بەكتۇروۆا مەديا ورتالىقتىڭ تىلشىسىنە.

 رەسمي مالىمەتتەرگە سۇيەنسەك، ەكسپو- نىڭ العاشقى كۇندەرى ەلورداعا 10 مىڭنان استام قوناق كەلگەن. الەمدىك جۇلدىزداردىڭ كونسەرتى وتەتىن كۇندەرى مەن ءىرى شارالار كەزىندە تۋريستەر جان- جاقتان اعىلادى دەپ كۇتىلۋدە.