كۋبا الىنبايتىن تاس قامال ەمەس - نۇرلان اقۇرپەكوۆ

استانا. قازاقپارات - قازاق بوكس مەكتەبىنىڭ قانشالىقتى قارىمدى ەكەنىن «استانا ارلاندارى» الەمگە جىل سايىن دالەلدەپ كەلەدى.

ەشقاشان جۇلدەسىز قالىپ كورمەگەن «ارلاندارىمىز» بيىل ءتورتىنشى مارتە فينالعا شىعىپ وتىر. جاقىندا وتانداستارىمىز بۇكىل الەمدىك بوكس سەرياسىنىڭ (WSB) جەتىنشى ماۋسىمىنداعى جارتىلاي فينالدا بريتانيالىق «بريتيش لاينحارتس» كلۋبىمەن ەكى جەكپە-جەگىنىڭ قورىتىندىسى بويىنشا 7:3 ەسەبىمەن ۇتىپ، تاعى دا فينالعا شىقتى.

ەندى شەشۋشى سىندا وتانداستارىمىز كۋبالىق «كۋبا دومادورەس» كومانداسىمەن چەمپيوندىق اتاقتى ساراپقا سالادى.

وسىعان وراي، «استانا ارلاندارىنىڭ» باس جاتتىقتىرۋشىسى نۇرلان اقۇرپەكوۆتى اڭگىمەگە تارتىپ، بوكسشىلاردىڭ دايىندىعى جايىندا شاعىن سۇحبات العان ەدىك.

- وتكەندە عانا سۇحبات بەرىپ، اللا قالاسا، فينالعا شىقساق، ۇلتتىق قۇرامادان كومەك سۇرايمىز دەپ ەدىڭىز. جالپى فينالعا دايىندىقتارىڭىز قالاي؟

- ءيا، سۇرىنبەي فينالعا جەتتىك. ەندى چەمپيون اتانۋ عانا قالدى. ەگەر بيىل تاعى دا چەمپيون بولساق، بۇكىل الەمدىك بوكس سەرياسى تاريحىنا «ارلانداردىڭ» ەسىمى التىن ارىپتەرمەن جازىلايىن دەپ تۇر. بۇل جوبا جۇزەگە اسقالى بىزدەي جەتىستىكتى ەشقانداي كوماندا قايتالاعان ەمەس. ءبىز - قازىردىڭ وزىندە ەڭ كوپ جۇلدەگەر اتانعان كوماندامىز. ال «التىن» ارىپتەرمەن تاريح پاراعىنا قالۋ ءۇشىن بىزگە ۇلتتىق قۇرامانىڭ كومەگى اۋاداي قاجەت. الايدا، بۇل ماسەلە ءالى شەشىلمەي جاتىر. ال ءوز بوكسشىلارىمىز كۇندەلىكتى جاتتىعۋلارىن ويداعىداي جاساپ جاتىر.

- ۇلتتىق قۇرامانىڭ كومەگىنە نە كەدەرگى بولىپ جاتىر؟

- ولاردىڭ كۇنتىزبەلىك كەستەسى بىزگە سايكەس بولماي جاتىر. بۇكىل الەمدىك بوكس سەرياسىنىڭ نەگىزگى جوسپارى بويىنشا فينالدىڭ العاشقى ايقاسى وسى ايدىڭ 24 ءى كۇنى كۋبادا ءوتۋى ءتيىس. ال قارىمتا كەزدەسۋ 1- شىلدەدە قازاقستاندا وتەدى دەلىنگەن. ۇلتتىق قۇراما تۋرا وسى ۋاقىتتا 10 كۇندىك وقۋ-جاتتىعۋعا تۇركياعا كەتەدى ەكەن.

- ەندى نە ىستەمەك ويداسىزدار؟

- قازىر بۇكىل الەمدىك بوكس كەڭەسىنە حات جازىپ، فينالدىڭ ۋاقىتىن وزگەرتۋگە ۇسىنىس جاساساق دەگەن ويدامىز. ءبىراق، ولار كەلىسە مە، كەلىسپەي مە ول جاعى بەلگىسىز. ءبىراق. ۇلتتىق قۇرامادان كومەك بولماسا دا ءبارىبىر جۇدىرىقتاسامىز. شەگىنەرگە جول جوق.

- كۋبا بوكسشىلارى سونشالىقتى مىقتى ما؟

- كۋبا بوكسشىلارى الىنبايتىن تاس قامال ەمەس. وسىعان دەيىن جولىقتىق. 2015-جىلى تۋرا وسى كۋبالىقتارمەن فينالدا جولىمىز ءتۇيىسىپ، چەمپيوندىق اتاققا ءبىز قول جەتكىزگەنبىز. سول جەتىستىكتىڭ كەزدەيسوق ەمەس ەكەنىن دالەلدەپ، بيىل دا ولاردان ايلامىزدى اسىرساق دەپ قولدان كەلگەن جۇمىستى جاساپ جاتىرمىز. ءبارىن شارشى الاڭ كورسەتەدى. بۇيىرعانىن كورەمىز.

- بيىل چەمپيون بولساق، «ارلانداردىڭ» ەسىمى التىن ارىپتەرمەن جازىلادى دەپ جاتسىز. وتكەن جەتىستىكتەرگە قىسقاشا توقتالىپ، وقىرمان قاۋىمنىڭ ەسىنە قايتالاپ تۇسىرە كەتسەڭىز...

- ەلوردامىزدا قۇرىلعان «ارلاندارىمىز» 2013 جانە 2015-جىلدارى چەمپيون اتاندى. 2013-جىلى ۋكراينا بوكسشىلارىن ۇتساق، 2015-جىلى بيىلعى قارسىلاسىمىز كۋبانى قاپى قالدىردىق. ال العاشقى 2011-جىلى فينالدا فرانسيا بوكسشىلارىنا ءبىر عانا ەسەپ ايىرماشىلىعىمەن ەسە جىبەرىپ، كۇمىس مەدالدى قانجىعاعا بايلادىق. 2012، 2014 جانە 2016-جىلدارى ۇزدىك ۇشتىكتى تۇيىندەپ، قولا مەدالعا قول جەتكىزدىك. مىنە، بيىل تاعى فينالعا شىعىپ تۇرعانىمىزدى ەسكەرسەك، جۇلدەسىز قالعان جىلىمىز جوق ەكەنىن كورۋگە بولادى. دۇنيەجۇزىلىك بوكس سەرياسى جوباسىندا جەڭىپ العان جۇلدەلەر جاعىنان ەشبىر كوماندا قازاقستاندىق «استانا ارلاندارىنىڭ» شالىمىنا جەتپەيدى.

- ەگەر فينالدا ۇلتتىق قۇرامادان كومەك بولماسا، ءوز بوكسشىلارىڭىزدان كىمدەرگە ءۇمىت ارتاسىزدار؟

- ءالى كىمدەردىڭ جۇدىرىقتاساتىنىن انىقتاعان جوقپىز. بوكس فەدەراتسياسىنىڭ باسشىلىعى ۇلتتىق قۇرامادان بىزگە كومەك بەرۋگە كەلىسە مە، كەلىسپەي مە، ءبىرىنشى وسى ماسەلەنى شەشىپ العان سوڭ بارىپ، كىمدەردىڭ جۇدىرىقتاساتىنىن انىقتايتىن بولامىز.

- اڭگىمەڭىزگە راحمەت!

اۆتور: كۇنسۇلتان وتارباي