ديماش قۇدايبەرگەن قىتايدىڭ مۋزىكالىق جۇلدەسىنىڭ جەڭىمپازى اتاندى
شارانىڭ رەسمي ۆەب-سايتىندا داۋىس بەرۋ 22- مامىردان 10- ماۋسىم كۇندەرى ارالىعىندا بولىپ، جەڭىمپازدار ەسىمى 13- ماۋسىم كۇنى جاريالاندى.
بۇعان دەيىن حابارلاعانىمىزداي، ديماش بۇل شارانىڭ «ەڭ ۇزدىك شەتەلدىك تانىمال ءانشى» جانە «ەڭ تانىمال جاڭا ءانشى» نوميناتسيالارىنا ۇسىنىلعان بولاتىن. ەكى نوميناتسيا بويىنشا ديماش 8 قىتايلىق تانىمال ەسترادا انشىسىمەن باسەكەلەس بولدى.
ايتا كەتەيىك، «2017 MTV Global Chinese Music Awards» ماراپاتتاۋ كەشى 2- شىلدە كۇنى شنجىن قالاسىندا وتەدى. ول قىتايداعى ەڭ اۋقىمدى مۋزىكالىق شارا بولىپ سانالادى. شارا بارىسىندا 19 جەڭىمپاز ماراپاتتالاتىن بولادى.
2016-جىلى كورەيا ءانشىسى چون دجيحۋن (Rain) بۇل شارانىڭ «ەڭ ۇزدىك شەتەلدىك تانىمال ءانشى» نوميناتسياسىندا جەڭىسكە جەتكەن بولاتىن.
ەسكە سالا كەتەيىك، ديماش قىتايدىڭ «Singer 2017» ءان بايقاۋىنان كەيىن، قىتايدا «ازيانىڭ ەڭ تانىمال ءانشىسى»، «حالىقارالىق دارەجەدەگى تانىمال ءانشى» جانە «جىلدىڭ ەڭ تانىمال ءانشىسى» جۇلدەلەرىن جەڭىپ الدى.
اۆتور: مۇحتار قاليموللا ۇلى
