قازاقستاندىق كينودراماتۋرگ قىتايلىق ارىپتەستەرىنە جىبەك جولى تۋرالى ورتاق جوبا جاساۋدى ۇسىندى

الماتى. قازاقپارات - الماتىدا قىتاي كينوفەستيۆالى اياسىندا شىڭجاڭ ۇيعىر اۆتونوميالىق اۋدانى كينوسىنىڭ كۇندەرى ءوتىپ جاتىر، دەپ حابارلايدى قازاقپارات ءتىلشىسى.

بۇگىن شاكەن ايمانوۆ اتىنداعى «قازاق فيلم» كينوستۋدياسىنا ش ۇ ا  اقپارات، باسپا ءسوز جانە تەلەراديو باسقارما باسشىسى ۋان شىچەن باستاعان ءبىر توپ قىتاي كينەماتوگرافيستەرى كەلدى.

قىتاي كينەماتوگرافيستەرىن «قازاق فيلمنىڭ» ەكسپەرتتىك كەڭەسىنىڭ تەڭ ءتوراعاسى بەكبولات شەكەروۆ جانە قازاق كينوسىنىڭ مەترلەرى ءاسانالى ءاشىموۆ، ساتىبالدى نارىمبەتوۆ سياقتى بەلگىلى كينەماتوگرافيستەر قارسى الدى.

قىتايدان كەلگەن قوناقتارعا كينوستۋديا اۋماعىندا ەكسكۋرسيا جاسالدى. ولارعا «قازاق حاندىعى» سەريالىنىڭ دەكوراتسياسى، ءتۇسىرىلىم الاڭدارى، كوستيۋم قويماسى، تاسپا-زەرتحانالىق كەشەنى كورسەتىلدى. سونداي-اق قوناقتارعا قازىر وندىرىستە ءجۇرىپ جاتقان «مۇزبالاق» تولىق مەتراجدى انيماتسيالىق فيلمىنىڭ ترەيلەرى كورسەتىلدى.

«قازاق فيلم» كينوستۋدياسىنا قوناققا كەلگەندەرىڭىزگە قۋانىشتىمىز. وزدەرىڭىز بىلەتىندەي، 9 ماۋسىم كۇنى قىتاي باسپا ءسوز، كينو، راديو جانە تەلەكورسەتىلىم ماسەلەلەرى بويىنشا مەملەكەتتىك اكىمشىلىك پەن قازاقستان رەسپۋبليكاسى مادەنيەت جانە سپورت مينيستىرلىگى اراسىندا كينو ءوندىرىس سالاسى بويىنشا ۇكىمەتارالىق كەلىسىمگە قول قويىلدى.

بۇل قۇجات بويىنشا ءبىزدىڭ مەملەكەتتەردىڭ كينوماتوگرافيستەرى بىرلەسكەن جوبالار جاساۋعا مۇمكىندىك الادى. «قازاق فيلم» كينوستۋدياسىندا «كومپوزيتور» اتتى قازاقستان-قىتاي بىرلەسكەن جوباسىن جۇزەگە اسىرا باستاعانىن ايتقىم كەلەدى. بۇل جوبا ەكى ەل كينوماتوگرافيستەرى اراسىنداعى التىن كوپىر بولادى دەپ ۇمىتتەنەمىن»، - دەدى، «قازاق فيلمنىڭ» ەكسپەرتتىك كەڭەسىنىڭ تەڭ ءتوراعاسى بەكبولات شەكەروۆ.

ءوز كەزەگىندە، شۇاا اقپارات، باسپا ءسوز جانە تەلەراديو باسقارما باسشىسى ۋان شىچەن قازاقستاندىق كينەماتوگرافيستەرگە قۇرمەت كورسەتكەندەرى ءۇشىن العىسىن ءبىلدىردى.

«بىزگە تاريحى مول كينوستۋديانى كورۋگە مۇمكىندىكتى بەرگەندەرىڭىزگە العىس بىلدىرەمىز جانە ءبىز بىرلەسكەن جوبالار تۋرالى سىزدەردىڭ ۇسىنىستارىڭىزدى قاراستىرۋعا دايىن ەكەنىمىزدى اتاپ وتكىم كەلەدى»، - دەدى ۋان شىچەن.

دوڭگەلەك ۇستەل بارىسىندا ارىپتەستەر قازاقستان مەن قىتاي كينەماتوگرافياسىنداعى ماسەلەلەر مەن جەتىستىكتەر تۋرالى پىكىر الماستى. كينودراماتۋرگ نۇرلان سانجار قىتايلىق ارىپتەستەرىنە جىبەك جولى تۋرالى جوبا جاساۋعا ۇسىنىس تاستادى. ۇلتى قازاق قىتايلىق اكتەر دانيار تولقىن «قازاق فيلمنىڭ» «تۇمار» كينوكارتيناسىنىڭ كاستينگىنە قاتىسىپ ۇلگەردى.