شىڭعىس حاننىڭ قابىرىن تاپتىق دەگەن ەرلى-زايىپتى جوعارىدان حابار كۇتىپ وتىر

استانا. قازاقپارات - وڭتۇستىك قازاقستان وبلىسىندا ەرلى-زايىپتى ازاماتتاردىڭ شىڭعىس حاننىڭ قابىرىن تاپتىق دەپ جار سالعانىنا دا ءبىراز ۋاقىت بولعانى بەلگىلى.

بۇعان دەيىن ولار وزدەرىنە بەرىلگەن ايان ءتۇس ارقىلى بۇل ىسكە كىرىسكەندەرىن، قابىردى اشۋعا تاياپ تۇرعاندارىن، ەلباسى رۇقسات بەرسە ونى اشۋعا دايار ەكەندەرىن ايتقان بولاتىن.

بۇل اقپارات جۇرتشىلىق اراسىندا كەڭىنەن تالقىلاندى. ەرلى-زايىپتىلاردىڭ ءىسىن ەسى اۋىسقان جانداردىڭ ارەكەتىنە بالاپ جاتقاندار دا، وعان كۇمانمەن قاراۋشىلار دا، سەنبەسە دە قالاي بولار ەكەن دەپ قۇلاق ءتۇرىپ جۇرگەندەر دە از ەمەس.

كەشەگى اپتادا رەداكسيامىزعا وسى ماسەلە توڭىرەگىندە ايتارى بارىن ءبىلدىرىپ ءبىر ازامات كەلدى. ەسىمى - قۇربان ەكەن دەپ جازادى zamana.kz.

«وسىنىڭ ءبارى تەكتەن-تەك ەمەس. ەلىمىزگە ارۋاقتار تىلسىمنان حابار بەرىپ جاتىر، ولار بىزدەن قانداي دا ءبىر جاۋاپ ارەكەت كۇتۋدە دەپ ويلايمىن. قازاقستان الەمگە تانىلىپ، الدىنا ۇلكەن ماقساتتار قويىپ وتىر، وسىعان قاتىستى تىلسىم كۇشتەردەن قولداۋ دا بار سياقتى»، - دەپ ءسوزىن باستاعان ازامات ەلىمىزدە اۋليەلى جەرلەردىڭ كارتاسىن جاساۋ قولعا الىنعانىن العا تارتىپ، ارۋاقتارعا سەنۋ كەرەكتىگىن ايتتى.

«پرەزيدەنتىمىز رۋحاني ورلەۋ جونىندە ايتىپ جاتىر. سوعان قاراعاندا ارىس جاقتاعى ەرلى-زايىپتىلاردىڭ جازعان حاتى ەلباسىعا جەتكەن-اۋ دەپ ويلايمىن.

ءبىزدىڭ قازاق حالقى ارۋاققا سەنگەن، وندا اۋليەلىك قاسيەتتەر كوپ بولعان عوي. سولار اياق-استى بولىپ، تۇنشىعىپ جاتىر. قوعامدى جاعىمسىز نارسەلەر جايلاپ الدى، جەمقورلىق ءورشىپ تۇر. ەگەر رۋحاني باعىتتى قولعا الساق، مۇنداي كەلەڭسىزدىكتەر جويىلادى دەپ سەنەمىن»، - دەيدى قۇربان.

ءسوز ساپتاسىنا قاراعاندا، ول شىڭعىس حاننىڭ قابىرىن تاپتىق دەپ جۇرگەن ادامداردىڭ ارەكەتىنە سەنەتىن سياقتى. ايتۋىنشا، ول بيىلعى 20-ساۋىردە ارىس جاققا بارىپ، الگى ەرلى-زايىپتىلاردىڭ قازىپ جاتقان جەرىن كورىپ قايتىپتى.

قۇرباننان ەستىگەنىمىز، شىڭعىس حاننىڭ قابىرىن تاپتىق دەگەن ەرلى-زايىپتىلار ءالى دە سول وزدەرى قازعان جەردىڭ باسىندا تۇرىپ جاتىر ەكەن.

«قازىلعان جەردى كوردىم. 12 مەتر تەرەڭدىكتە، ۇزىندىعى 12 مەتردى قۇرايدى، - دەيدى ول، - توبەسىندە ارابشا جازۋلار بار، تومەندە «كۇلتەگىن» ەسكەرتكىشىندەگى سياقتى ەسكى تۇركى جازۋلارى بار.

قابىردى قازۋشىلار ەلباسى رۇقسات ەتسە، ونىڭ شىڭعىس حاندىكى ەكەنىن دالەلدەمەك. دالەلدەسە، كەيىن ارابتار كەلىپ، ول جەرگە كەسەنە سالادى دەيدى».

وسىلاي دەگەن ازامات ءوزىنىڭ ايان تۇستەردى، تىلسىم قۇبىلىستاردى ءجيى كورەتىنىن، ولارعا تەرەڭ ءمان بەرە قارايتىنىن ايتادى.

«2016-جىلى ساياباقتا اسپاننان ەكى جارىق ساۋلە كورگەن ەدىم. ارادا ءبىر اي وتكەندە وزبەكستان پرەزيدەنتى يسلام كاريموۆ قايتىس بولدى. كەيىن كوپ ۇزاماي ەكى ەل اراسىنداعى قارىم-قاتىناس جاڭا باعىت الا باستادى. ال تاياۋدا تۇسىمدە ءبىز جاققا ساۋد ارابياسىنىڭ پاتشاسى كەلگەنىن كوردىم. مۇنىڭ ءبارىن تەكتەن-تەك ەمەس دەپ ويلايمىن»، - دەيدى ول.