ەكسپو- نى ەكى كۇن ارالاعان ورالدىق تۋريستىڭ پىكىرى
استانادا اشىلعان كورمەنى العاشقىلاردىڭ ءبىرى بولىپ كورىپ قايتقان باتىس قازاقستان وبلىسىنىڭ تۇرعىنى جيدەگۇل امانعالي وسىنداي پىكىر ءبىلدىردى، دەپ حابارلايدى «قازاقپارات» ءتىلشىسى.
- العاشقىلاردىڭ قاتارىندا استاناداعى ەكسپو-2017 كورمەسىن كورىپ قايتتىق. دەلەگات رەتىندە ەمەس، ءوزىم، سانالى تۇردە، ەركىممەن باردىم، - دەپ جازدى ول الەۋمەتتىك جەلىدەگى پاراقشاسىنا.
بيلەتتى جۇمىس ورنىم الىپ بەرىپ، «قالايدا باراسىڭ!» دەگەن جوق، ءوزىم ساتىپ الدىم، ەكى رەت. ويتكەنى ءبىر كۇندە پاۆيلونداردى تۇگەل ارالاپ شىعۋ مۇمكىن ەمەس ەكەن. سونىڭ وزىندە بارىنە ۇلگەرە المادىم. بار بولعانى وتىز شاقتى ەلدىڭ «شاڭىراعىندا» بولدىم. ءبارى بىردەي تاڭعالدىرىپ شالقاڭنان تۇسىرمەسە دە، كورەم، بىلەم دەگەن كىسىنى قىزىقتىراتىن نارسە كوپ مۇندا. فينليانديا، پولشا، تۇركيا مەن ۇلى بريتانيا پاۆيلوندارى ەرەكشە ۇنادى. ا ق ش، جاپونيا، يزرايل دە بار جاقسىسىمەن بولىسۋگە كەلىپتى. ءبىرى ەنەرگيانى ۇنەمدەۋدىڭ ءتيىمدى جولدارىن ۇسىنسا، ەندى ءبىرى ادامنىڭ قيمىل- قوزعالىسىنان، كۇننەن، جەلدەن، جەردەن، سۋدان الىناتىن ەنەرگيانى قالاي جيناۋ، ساقتاۋ جانە قاي سالادا پايدالانۋعا بولاتىندىعىن كورسەتكەن.
پولياكتار ۇسىنعان «كوگىلدىر كومىر» (گولۋبوي ۋگول)، فيندەر ۇسىنعان قالدىقسىز تەحنولوگيا مەن كۇن باتارەيالارى ورناتىلعان ونىمدەر، اعىلشىندار ۇسىنعان لامپالار ەرەكشە تاڭعالدىردى. ۆولفرامنىڭ ورنىنا پايدالانىلعان گرافين دەپ اتالاتىن لامپا ىشىندەگى جىڭىشكە، نازىك سىمدار 7 جىلعا دەيىن قىزمەت ەتەدى ەكەن، ءارى لامپانى دا قىزدىرمايدى. بۇدان بولەك عارىش ءۇشىن، قۇرىلىس ءۇشىن، ءوندىرىس ءۇشىن پايداسى كوپ سان ءتۇرلى جوبالار بار. جاپوندىقتار مەن امەريكالىقتاردىڭ دا بەينەروليكتەرى ارقىلى ءبىراز اقپاراتقا قانىق بولدىم.
بۇدان بولەك شۆەتسيا، شۆەيساريا، لاتىن امەريكاسى، اۆستريا، سلوۆاكيا، تايلاند، تۇركيا، ازەربايجان، ءۇندىستان، سينگاپۋر، يوردانيا، كاريب ەلدەرى (كەيبىرىنىڭ اتىن ءبىرىنشى رەت ەستىدىم)، بىرىككەن اراب امىرلىكتەرى، چەحيا، مالايزيا ەلدەرىن ارالادىم. قازاقستاننىڭ پاۆيلونى ەسىگىن تەك 5-تە اشتى. كەشىگىپ كىردىك ءبىراز. سول سەبەپتى ءارقايسىسى 2 قاباتقا تاتيتىن 8 قاباتتى (16 نەمەسە ودان دا كوپ قاباتتىڭ ەسەبىندە) عيماراتتى اسىقپاي كورۋگە مۇمكىندىك بولمادى. بارىن سالعان ەندى، ءبىر مۋزەي دەرسىز. ەكسپو اياقتالعان سوڭ دا ەلىمىزدەگى كورنەكتى، تانىمدىق سيپاتتاعى كەرەمەت ورىنداردىڭ ءبىرى بولىپ قالارى انىق...
تۋريستەردىڭ سانى ازىرگە كوپ ەمەس. ەكسپو- نىڭ قاي جىلعى كورمەسى دە ورتاسىنا قاراي قىزادى دەگەندى ەستىگەن ەدىك. سونىڭ وزىندە كورەيا مەن قىتاي پاۆيلوندارىنا كىرۋ ءۇشىن كەمىندە 40-50 مينۋت كەزەكتە تۇراسىز. ابزالى كورگىڭىز، تانىسقىڭىز كەلەتىن ەلدەردىڭ ءتىزىمىن ويشا ناقتىلاپ العان دۇرىس. كورمە اۋماعى ۇلكەن بولعاندىقتان، ءجۇرىپ اياعىڭىز دا شارشايدى، بەلىڭىز دە اۋىرادى. بيلەت قۇنى جۇمىس كۇندەرى - 4000، ال سەنبى مەن جەكسەنبىدە - 6000 تەڭگە. ءبىر بيلەت سول اۋماققا ءبىر- اق رەت كىرۋگە جارامدى. قاقپادان شىعىپ كەتسەڭىز، سول بيلەتپەن كەرى كىرە المايسىز. شتريح كود ءبارىن ايتىپ قويادى. كورمە اۋماعىندا تاماقتاناتىن ارنايى ورىندار بار. تۇسكى اس باعاسى كىسى باسىنا - 1500 تەڭگە (شۆەد ۇستەلى). باسقا ۋاقىتتا قىمباتىراق. ۇشاق پەن پويىز بيلەتىنىڭ باعاسى دا بۇرىنعى. جالدامالى پاتەر باعاسى دا ەكى ەسە ءوسىپ كەتتى دەگەن جالعان اقپارات. دۇكەندەگى ازىق- تۇلىك تە ورالداعىمەن شامالاس. بۇل جەرگە قىزىل- جاسىل قىزىق كورەمىن، جالت- جۇلت ەتكەن ەكرانعا قارايمىن، فونتان مەن سيركتى تاماشالايمىن دەپ ەمەس، وزگە ەلدىڭ وزىق تەحنولوگياسىمەن تانىسامىن، ۇزدىك ونىمدەرىن كورەمىن دەپ كەلگەن دۇرىس شىعار. قىسقاشا - وسى، نەگىزى ايتاتىن نارسە كوپ»، - دەپ تۇيىندەيدى ويىن جيدەگۇل.
اۆتور: ەلجان ەرالى
