قۋات نايمان: ديماشقا قايراتتاي بولۋ ءۇشىن ءالى ءبىراز ەڭبەكتەنۋ كەرەك

استانا. قازاقپارات - ەرەجەسىز جەكپە- جەكتەن الەم چەمپيونى قۋات نايمان ۇيلەنەتىنىن، قالىڭدىعىنا قويار نەگىزگى تالاپتارىن اشىق ايتتى. سپورتشى ۇنەمى ەرەكشە ويلارى مەن ونى جەتكىزۋدەگى باتىلدىعىنا وراي ب ا ق نازارىندا ەكەنى بەلگىلى.

 قۋات قايرات پەن ديماشتى سالىستىرعان بيبىگۇل اپاسىنا رەنجۋلى سياقتى كورىندى.

 ءارى ەل الدىندا جۇرگەن ەكى ءانشىنىڭ ونەرىنە قاتىستى ءوز باعاسىن بەردى. سپورتشى Stan.kz سايتىنا ارنايى سۇحبات بەرگەن ەدى.

ەرەجەسىز جەكپە- جەكتەن الەم چەمپيونى قۋات نايمان وزىنە قانداي قىزدار ۇنايتىنىن اشىق ايتتى.

«بالا كەزىمدە بويىم وتە قىسقا بولدى. 165 سم بولعان شىعار. ءوزىم وتە ءالسىز بولدىم. مەكتەپتە دە قاتاردىڭ سوڭىندا تۇراتىنمىن. اكەمە قاتتى رەنجيتىن ەدىم. بويىم نەگە الاسا دەپ. سودان بولار، اكەشىم بويى قىسقا قىز الساڭ ۇيگە كىرگىزبەيمىن دەيدى. اللاعا شۇكىر بويىم ءوسىپ، سىمباتتى جىگىتتەردىڭ قاتارىندامىن قازىر. سول سەبەپتى دە، قىزدارعا قوياتىن باستى تالابىم بويى ۇزىن بولۋ كەرەك. ال، مىنەز جاعىن ءوزىم تاربيەلەپ الامىن» ، - دەيدى قۋات نايمان.

گەنادي گولوۆكيندى قاتتى سىناپ، ءتىپتى وعان رينگتەن كەتۋگە كەڭەس بەرگەن سپورتشى مۇنداي سوزدەردى نە سەبەپتى ايتقانىن ءتۇسىندىردى.

«ايتۋ كەرەك، بوكستا كەز- كەلگەن سپورتشى قارسىلاسىن ءوزى تاڭدايدى. ءتىپتى جەكپە- جەككە ءبىر ساعات ۋاقىت قالعاندا دا كەزدەسۋدەن باس تارتا الاسىڭ. مەن كاسىبي سپورتشى رەتىندە ايتا الامىن، گەنادي باۋىرىمىز قارسىلاس تاڭداعاندا وتە ساق.

گولوۆكين وتە ءالسىز بوكسشىلاردى تاڭداپ الادى. مەنىڭ ويىمشا بۇل وتە ۇيات ارەكەت. مىسالى، گولوۆكيننىڭ كەز- كەلگەن كەزدەسۋىندە ونىڭ جەڭىسكە جەتەتىنىن سەزىپ وتىراسىڭ. ونى حالىق تا بىلەتىن شىعار. نەگە؟ سەبەبى، قارسىلاسىنىڭ تاجىريبەسىز ەكەنى بايقالىپ تۇرادى. ويلاپ قاراساق، گەنادي رەمبو ەمەس شىعار اتىپ جاتسا دا، جارىپ جاتسا دا ولمەيتىن.

 ۇنەمى جەڭە بەرۋ مۇمكىن ەمەس، جاسى دا 35 كە كەلدى. ءبىر كۇنى ناعىز كاسىبي بوكسشىمەن توبەلەسىپ، ۇتىلىپ قالسا قاسىقتاپ جيناعان ابىرويىن شەلەكتەپ توگىپ الۋى مۇمكىن ەمەس پە؟ سوندىقتان جۇلدىزى جانىپ تۇرعاندا، ارتى اشىلماي تۇرعاندا رينگتەن قازىر كەتكەنى ابزال. مەن جانىم اشىعاننان كەيىن وسىنداي كەڭەس بەردىم» ، - دەيدى سپورتشى.

قۋات نايمان گولوۆكينگە اقىل ايتىپ ءجۇرىپ، رەسەيدە ءوز قارسىلاسىنان وڭباي جەڭىلىپ قالعانىن مويىندادى. وسى تۇستا ءوزىن سىنايتىندارعا جاۋابى دا دايىن ەكەن.

 «ەل نە دەمەيدى... جالپى سىنعا دەگەن كوزقاراسىم ءتۇزۋ. مەنىڭ وسى كەزدەسۋدە ۇتىلسام دا، رەيتينگىم كوتەرىلدى. سەبەبى بۇل جوعارى دارەجەلى پروموۋشن. فايت نايتس ەۋروپا مەن رەسەيدەگى ءنومىرى ءبىرىنشى پروموۋشن.

سوندىقتان ول جاقتا ونەر كورسەتۋ كەز- كەلگەن سپورتشىنىڭ ارمانى. مەن جەڭىلسەم دە، سول رينگتىڭ كوك كىلەمىن كوردىم عوي. بۇل جەڭىلىسىم ءۇشىن ۇيالمايمىن، كەرىسىنشە ماقتانامىن. ال، مەنى سىناعاندارعا ايتارىم: «ۇيدە جاتىپ الىپ جار سالعانشا، ءوزىڭدى تۇزە» ، - دەيدى سپورتشى.

 سپورتشى شوۋ- بيزنەستەگى ءوزارا تارتىستار مەن سىندارعا قاتىستى ويلارىمەن ءبولىسىتى.

  «مەن ايتايىن. قايرات -  قازاق ەلىنىڭ سۇيىكتى ۇلى. ونىڭ اندەرىن بىلمەيتىن قازاق جوق شىعار. مەن دە ءجيى تىڭدايمىن. نۇرتاستىڭ قايراتى باعىندىراتىن بەلەستەرىن باعىندىرىپ قويعان. مۇنى ءبارى بىلەدى جانە مويىندايدى.

ال، ديماش ول كەشە شىققان بالا عوي. قىتايعا بارىپ ايقايلاپ، سول جاقتىڭ كورەرمەندەرىنە ۇنادى. ارتىنان قازاقتار دا ديماش ءبىزدىڭ ماقتانىشىمىز دەپ شۋلاپ جاتتى. بۇل بالانى اتاقتى ەتكەن تەك ب ا ق. تالانتى دا بار شىعار ەندى.

 ال قايرات نۇرتاس ناعىز ەڭبەكتىڭ ارقاسىندا ەلىنىڭ ەلەۋلىسىنە اينالعان ءانشى. ديماشقا قايرات بولۋ ءۇشىن ءالى ءبىراز ەڭبەكتەنۋ كەرەك. تاعى ءبىر ايتاتىنىم، مىسالى ءسىز ديماشتىڭ ءانىن كولىكتە تىڭدايسىز با؟ ارينە جوق. تىڭداعىڭىز كەلسە دە تىڭداي المايسىز. شىڭعىرعان جىگىتتى تىڭداعانشا قايراتتىڭ قوڭىر داۋىسىن تىڭدايسىز عوي... سول سەبەپتى ديماش بايقاۋلارعا قاتىسپاي وسىمەن توقتاپ قالسا ونى حالىق تەز ۇمىتىپ كەتەدى.

ال قايراتتى ۇمىتۋ مۇمكىن ەمەس. سەبەبى ونىڭ اندەرىن حالىق جاتقا بىلەدى. سوندىقتان بيبىگۇل اپانىڭ بۇل پىكىرىمەن كەلىسپەيمىن جانە ورىنسىز دەپ ەسەپتەيمىن» ، - دەدى سپورتشى.

قۋات نايمان جارىستار مەن جاتتىعۋلار ءۇشىن وزگە ەلدەرگە ءجيى قاتىنايتىن سپورتشى. ول ءار ەلگە بارعان كەزدە قازاقستاندى، قازاق حالقىن سالىستىرىپ، ارتىقشىلىعى مەن كەمشىل تۇستارىن باقىلاپ جۇرەتىنىن ايتادى.

ءتىپتى كەيدە، كەدەيلىكتەن كوز اشپايتىن قانداستارىنا جانى اشىپ، قازاقستاننىڭ اۋىلدارىندا ءومىر ءسۇرۋ دەڭگەيىن جاقسارتۋ ءۇشىن «نە ىستەۋگە بولادى» دەگەن ويلار ءوزىن ءجيى مازالايتىنىن ايتادى.

«مەن ءوزىم قاراپايىم وتباسىنان شىققانمىن. سوندىقتان قوعامدا نە بولىپ جاتقانىن تولىق بىلەمىن. اتا- بابالارىمىز قانشاما قان توگىپ قالدىرعان جەرىمىزدە دە از عانا قازاق تۇرامىز. ءبىراق باسىمىز ءبىر قازانعا سىيمايدى.

نەگە قازاق كوندۋكتور، نەگە قازاق بازاردا اربا سۇيرەيدى، نەگە قازاق كولىك تۇراعىندا قىزمەت ەتەدى؟ سەبەبى ءبىز ءبىر- ءبىرىمىزدى كورە المايمىز. اۋىز بىرشىلىك جوق. مىسالى، مەن تايلاند ەلىنە ءجيى بارىپ تۇرامىن. ول جاقتاعى حالىقتىڭ جاعدايى بىزدىكىمەن سالىستىرعاندا كەرەمەت. الىپ قاراساڭ جاي عانا ارال.

جەر قويناۋىندا بىزدەگىدەي قايناپ جاتقان مۇنايى جوق، بايلىعى جوق، التىنى، تەمىرى جوق. ءبىراق تۇرعىندارىنىڭ 90 پايىزى اۋقاتتى امدار. ال بىزدە نەگە ولاي ەمەس دەگەن ويلار مەنى ءجيى مازالايدى. سەبەبى بىزدە بىرلىك جوق» ، - دەپ ويىن تۇيىندەدى قۋات نايمان.