ساپاربايەۆ اقتوبەنىڭ بۇرىنعى اكىمدەرى ۇكىمەتتى قالاي الداپ كەلگەنىن اشىق ايتتى
«وسىدان ەكى جىل بۇرىن ۇكىمەتكە قاعاز بارعان: «اقتوبە وبلىسىندا بىردە-ءبىر اپاتتىق جاعدايداعى، ءۇش اۋىسىمدا وقيتىن مەكتەپ جوق» دەلىنگەن. مەن ءوزىم تالاي ارالادىم. قۇلىپپەن جابىلىپ تۇرعان، وقۋعا بولمايتىن مەكتەپتەردى كوردىم. ەكىنشى قاعاز بارعان، وندا: «اقتوبە وبلىسىنا سۋارمالى جەر كەرەك ەمەس» دەگەن.
مەن ۇكىمەتكە «سۋارمالى جەردى كوبەيتۋ كەرەك» دەگەن ماسەلە قويامىن. ولار: «جوق، سەندەردەن سۋارمالى جەر كەرەك ەمەس دەگەن قاعاز كەلگەن» دەگەندى الدىعا تارتادى. اقتوبە وبلىسىندا تەك قانا مۇناي بولۋ كەرەك پا؟ مۇناي ەرتەڭ تاۋسىلادى، باعاسى تومەندەيدى، سوندا نە ىستەيمىز؟ الاقانىمىزدى جايىپ وتىرامىز با؟
نارىق زامانىندا ەكونوميكانىڭ بارلىق سالاسى دامۋ كەرەك. باس سالىپ ءبيداي مەن ارپانى ەگە بەرۋگە بولمايدى. مال شارۋاشىلىعىندا دا تەك قانا قوي مەن سيىر جانە جىلقىعا قاراپ وتىرماۋ كەرەك. قۇسپەن، ارامەن اينالىسۋعا بولادى. ونىڭ بارلىعى جۇمىس، تابىس، ونىڭ ءبارى سالىق. سوندىقتان كاسىپكەرلىك دەگەن مەملەكەت باسشىسىنىڭ بىزگە بەرگەن ەڭ ۇلكەن تاپسىرماسى»، - دەدى حالىقپەن كەزدەسۋىندە اقتوبە وبلىسىنىڭ اكىمى بەردىبەك ساپاربايەۆ.
وبلىس اكىمى جالقاۋلار مەن ارىز جازعىشتاردىڭ عانا ناشار ءومىر سۇرەتىنىن ايتتى.
«وسىدان 25 جىل بۇرىن قالاي ءومىر سۇردىك، قازىرگى جاعدايىمىز قالاي؟ قازىر جالقاۋلار مەن ارىز جازعىش ەرىككەندەر عانا ناشار ءومىر سۇرەدى. جۇمىس ىستەگىسى كەلمەسە نە ىستەيمىز؟ تاۋىپ بەرگەن جۇمىستى ىستەگىسى كەلمەيدى. 30 مىڭ تەڭگەگە، 50 مىڭ تەڭگەگە بارمايمىن دەپ وتىرادى»، - دەدى اكىم.
