قازاقستاندىق تۋريستەر مىنگەن اۆتوبۋس تۇركيادا جول اپاتىنا ۇشىرادى
قازاقستان، رەسەي جانە ۋكراينادان بارعان تۋريستەر جۇما كۇنى ەكسكۋرسياعا دەمرەگە بارا جاتادى.
«رەسەيدىڭ 24 ءتۋريستى، ۋكراينا مەن قازاقستاننىڭ تۋريستەرى مىنگەن اۆتوبۋس اپاتقا ۇشىرادى. ولارعا جۇك كولىگى كەلىپ سوعىلعان»، - دەپ مالىمەت بەردى رەسەيدىڭ انتالياداعى باس كونسۋلدىعىنىڭ كونسۋلى الەكسەي شيۆانوۆ.
ونىڭ سوزىنە سۇيەنسەك، بەس رەسەيلىك، ونىڭ ىشىندە ەكى بالا بولماشى جاراقات الىپ، اۋرۋحاناعا جەتكىزىلدى، امبۋلاتوريالىق كومەك كورسەتىلگەن سوڭ ۇيلەرىنە جىبەرىلگەن.
اۆتوبۋس پەن جۇك كولىگىنىڭ سوقتىعىسۋىنان قازاقستان ازاماتى زارداپ شەككەنىن Sputnik قازاقستانعا سىرتقى ىستەر مينيسترلىگىنىڭ باسپا ءسوز قىزمەتىنىڭ جەتەكشىسى ءانۋار جايناقوۆ حابارلادى.
«تۋريستەردىڭ اراسىندا قازاقستان ازاماتى بار. وتىز جاستاعى ايەلمەن انتالياداعى ءبىزدىڭ ديپلوماتتار بايلانىسقا شىقتى. ول اياعىن جاراقاتتاپ العان، وعان مەديتسينالىق كومەك كورسەتىلدى. اۋرۋحاناعا جاتقىزۋ قاجەت بولماعان»، - دەدى جايناقوۆ.
ونىڭ ايتۋىنشا، جول اپاتى سالدارىنان تۋريستەر جەڭىل جاراقات العان. قازىرگى ۋاقىتتا قازاقستاندىق ايەل قوناق ۇيدە، ول دەمالىسىن جالعاستىرماق.
رەسەيدىڭ ب ا ق وكىلدەرىنىڭ اقپاراتىنا جۇگىنسەك، اۆتوبۋستا TEZ Tour كومپانياسىنىڭ 44 تۋريست بولعان. جۇك كولىگى جولدىڭ شەتىندە توقتاپ تۇرعان اۆتوبۋسقا سوعىلعان.
