نازىم قىزايباي: باستى ارمانىم - توكيو وليمپياداسى - فوتو

استانا. قازاقپارات - ەسىمىن سپورت تاريحىنا التىن ارىپتەرمەن قالدىرعان قازاق قىزدارى ساناۋلى عانا. سولاردىڭ ءبىرى قازاق قىزدارى اراسىندا تۇڭعىش رەت بوكستان ەكى دۇركىن الەم چەمپيونى اتانعان نازىم قىزايباي.

كەشە عانا استانا تورىندە بوكستان حالىقارالىق ق ر پرەزيدەنتى كۋبوگى ءوز مارەسىنە جەتكەن بولاتىن.

وسى دودادا ەل نامىسىن ابىرويمەن قورعاپ، تاعى ءبىر مارتە ءوزىنىڭ مىقتىلىعىن دالەلدەگەن قىزايباي جەڭىس تۇعىرىنىڭ ەڭ بيىك ساتىسىنان كورىندى.

جارىستان كەيىن بوكسشى ارۋىمىزدى اڭگىمەگە تارتىپ، ىشكى ويلارىمەن بولىسكەن ەدىك.

- جەڭىسىڭىز قۇتتى بولسىن...

- راحمەت!

- وسى تۋرنيردە قاتەلەسپەسەم ءتورت جەكپە-جەك وتكىزدىڭىز. قاي كەزدەسۋ وزىڭىزگە قيىندىق تۋدىردى؟

- ءيا، ءتورت كەزدەسۋ وتكىزدىم. تورتەۋى دە وڭاي بولعان جوق. ءبىراق، ءار قارسىلاستىڭ ءوز ەرەكشەلىگى، ياعني ارتىقشىلىعى مەن كەمشىلىگى بولادى. سوعان قاراي جۇمىس ىستەي ءبىلۋ كەرەك. سوندا عانا جەڭىسكە جەتۋگە بولادى.

- فينالدا جاينا شەكەربەكوۆامەن جۇدىرىقتاستىڭىز. ەكەۋىڭىزدە جەڭىس ءۇشىن ايانىپ قالمادىڭىزدار. ءبىر-بىرلەرىڭىزگە اياماي سوققى جاسادىڭىزدار. ەكەۋىڭىز رينگ سىرتىندا قانشالىقتى جاقىن ارالاساسىزدار؟

- شەكەربەكوۆا مەنىڭ سپورتتا دا، ومىردە دە ەڭ سىرالعى ارىپتەسىم. جانە جاقىن دوسىم. ەكەمىز جاتتىعۋلاردا دا بىرگە جاتتىعامىز. كەيدە جارىستارعا دا بىرگە اتتانامىز. رينگتە قارسىلاس بولساق تا ومىردە جاقسى دوسپىز.

- ءسىز بوكستان قازاق قىزدارى اراسىنداعى جەڭىستى جولدارىڭىز ەڭ كوپ سپورتشىلارىمىزدىڭ ءبىرىسىز. جەڭىسكە جەتۋدىڭ كىلتى نەدە؟

- ونىڭ تۇك قۇپياسى جوق. ەڭ باستىسى قاجىماي ەڭبەكتەنۋ. جاتتىعۋعا قانشالىقتى تەر توكسەڭ، سونشالىقتى جەڭىستىڭ ءدامىن تاتاسىڭ. سوسىن، بوكستاسىپ ءجۇرىپ باسىڭدى دا ىستەتۋ كەرەك. قارا كۇشپەن ايلانى ۇشتاستىرا الماساڭ دا جەڭىستىڭ تۇعىرى الىستاي بەرەدى. بىرەۋ سوققىمەن قاتار اياقپەن دە جاقسى جۇمىس جاسايدى. اياقپەن دەگەندە تەبەدى ەكەن دەپ ويلاماڭىز (كۇلىپ). ءبىر ورىندا تۇرا بەرسەڭ دە قارسىلاسىڭا ەسە جىبەرىپ الۋىڭ مۇمكىن. سول ءۇشىن اياقتى دا جاقسى باسقارا ءبىلۋ كەرەك. جۇدىرىعىڭدى سىلتەپ بارا جاتىپ، ويلانا دا ءبىلۋ كەرەك.

- ريو-دە-جانەيرو وليمپياداسىنىڭ الدىندا استانادا وتكەن ليتسەنزيالىق الەم بىرىنشىلىگىندە ەكىنشى مارتە الەم چەمپيونى اتاندىڭىز. الايدا ريو وليمپياداسىنا بارۋعا نە كەدەرگى بولدى؟

- ول تۋرالى ادەتتە مۇلدە ويلاعىم كەلمەيدى. ۇمىتىپ كەتەيىن دەسەم دە سىزدەر وسىلاي ەسىمە تۇسىرەسىزدەر. بۇل تاقىرىپتى قوزعاماي-اق قويساق قايتەدى.

- نەگە؟ ايتا الماي جۇرگەن قۇپياڭىز بولسا وقىرمان قاۋىممەن بولىسكەنگە نە جەتسىن...

- جاقسى دۇنيەلەر بولسا ارينە بولىسكەنگە نە جەتسىن. ومىردە نەشە ءتۇرلى وقيعالار بولادى ەكەن. كەيدە ءومىر ءسىز جانە مەن ويلاعاننان 180 گرادۋسقا ءبىر ساتتە اينالىپ كەتەدى ەكەن. سوندىقتان، ءار ىسكە بايىپپەن قاراۋ كەرەك. جاقسىلىق پەن جاماندىق تەتە دەگەن ۇعىمنىڭ اقيقات ەكەنىن ءتۇسىنىپ جاتىرمىز. سپورتتا كەيدە جولىڭدى ءوزىڭ بوگەيسىڭ، كەيدە بىرەۋ بوگەيدى. ءبىراق، الدىڭا قويعان ماقساتىڭدى ەشقاشان جوعالتپاۋ كەرەك ەكەن.

- تۇسىنىكتى. ەندى الدا توكيو وليمپياداسى كەلە جاتىر...

- ءيا، قازىرگى مەنىڭ بار ارمانىم سول توكيو. بالا كەزدەن بەرگى ارمانىم - وليمپياداعا بارۋ، ەلىمنىڭ بايراعىن وليمپيادادا جەلبىرەتۋ بولاتىن. توكيو جاقىنداعان سايىن سول ارمانىم وزىمە قول بۇلعاپ كەلە جاتقان سياقتى سەزىلە بەرەدى...

- وسىدان ءبىراز ۋاقىت بۇرىن ءسىزدى كاسىپقوي بوكسقا اۋىسۋى مۇمكىن دەگەن اقپاراتتار جەلدەي ەستى. كاسىپقوي بوكس قىزىقتىرمادى ما؟

- ريودان قالىپ قويعان سوڭ ونداي وي بولدى. كەلىسىمشارت ۇسىنعان بەلگىلى كومپانيالار بولدى. ولاردىڭ شارتىمەن تانىستىم، قۇجاتتار كوڭىلىمنەن شىقپادى. سول ءۇشىن ءبىر ەمەس بىرنەشە رەت تۇسكەن ۇسىنىستان باس تارتتىم. باستى ارمانىم - توكيو وليمپياداسى!

- اڭگىمەڭىزگە راحمەت!

اۆتور: كۇنسۇلتان وتارباي