قازاقستاندىق «ارلانداردىڭ» فينالداعى قارسىلاستارى بەلگىلى بولدى

استانا. قازاقپارات - قازاقستاندىق كلۋب «استانا ارلاندارىنىڭ» بۇكىل الەمدىك بوكس سەرياسىنىڭ (WSB) فينالىندا جۇدىرىقتاساتىن قارسىلاستارى بەلگىلى بولدى، دەپ حابارلايدى قازاقپارات ءتىلشىسى.

ولار كۋبالىق «كۋبا دومادورەس» كومانداسىنىڭ بوكسشىلارى. «كۋبا دومادورەس» گاۆانادا وتكەن قارىمتا كەزدەسۋدە كولۋمبيالىقتاردى 5:0 ەسەبىمەن ويسىراتا ۇتتى.

وسىلايشا كۋبالىقتار قوس كەزدەسۋدىڭ ناتيجەسى بويىنشا 7:3 ەسەبىمەن باسىم ءتۇسىپ، فينالعا جولداما الدى. العاشقى سىندا «كولۋمبيا حەرويكوس» كومانداسى ءسال باسىمدىقپەن جەڭىسكە جەتكەن ەدى.

ال «استانا ارلاندارى» WSB جارتىلاي فينالىنىڭ قارىمتا كەزدەسۋىن لوندوندا بريتانيالىق «بريتيش لاينحارتس» ۇجىمىنا قارسى وتكىزىپ، قوس جەكپە-جەكتىڭ قورىتىندىسى بويىنشا 7:3 ەسەبىمەن باسىم ءتۇسىپ، فينالعا شىققان بولاتىن. ەندى فينالدا وتانداستارىمىز «كۋبا دومادورەسپەن» چەمپيوندىق اتاققا تالاسادى.