ات سپورتى تۇرلەرىنەن «ەكسپو كۋبوگى» باستالدى

استانا. قازاقپارات - بۇگىن ەلوردا تورىندە ات سپورتى تۇرلەرىنەن «ەكسپو كۋبوگى» جارىسى باستالدى، دەپ حابارلايدى قازاقپارات ءتىلشىسى.

جارىستا جۇيرىكتەر 25 شاقىرىمدىق الامان بايگە جىبەرىلسە، 15 شاقىرىمدىق توپ بايگە، 7 شاقىرىمدىق جورعالار جارىسى وتكىزىلەدى.

سونىمەن قاتار 7 شاقىرىمعا قۇنان بايگە، 2400 جانە 1800 مەتر قاشىقتىقتا ۇشقىر اتتار سىنالادى. جارىستىڭ جۇلدە قورى - 63,6 ميلليون تەڭگە (200000 دوللار). اقشالاي سىياقى بەسىنشى ورىنعا دەيىن بەرىلەدى.

ناقتىراق ايتىپ وتسەك، الامان بايگەدە باس جۇلدەگە 10 ميلليون تەڭگە، ەكىنشى ورىنعا 5 ميلليون، ءۇشىنشى ورىنعا 1,5 ميلليون تەڭگە بەرىلسە، مارەگە ءتورتىنشى كەلگەن جانە بەسىنشى بولىپ جەتكەن شاباندوزعا تيىسىنشە 1 ميلليون مەن 500000 تەڭگە سىياقى بەرىلەدى.

توپ بايگەدە جەڭىمپازعا 5 ميلليون تەڭگە، كۇمىس جۇلدەگەرگە 2 ميلليون، ءۇشىنشى ورىنعا 1 ميلليون، مارەگە ءتورتىنشى كەلگەن ادامعا 500 مىڭ، بەسىنشى ورىنعا 300 مىڭ تەڭگە تاعايىندالادى.

قۇنان بايگەدە باس جۇلدەگە 3 ميلليون، كۇمىس جۇلدەگەرگە 1,5 ميلليون، قولا جۇلدەگەرگە 1 ميلليون، ءتورتىنشى ورىنعا 500 مىڭ جانە بەسىنشى ورىنعا 300 تەڭگە تىگىلەدى.

جورعا اتتار جارىسىندا جەڭىمپاز 1,5 ميلليون، كۇمىس جۇلدەگەر 700 مىڭ تەڭگە، قولا جۇلدەگەر 400 مىڭ، ءتورتىنشى جانە بەسىنشى ورىندى قاناعات تۇتقان ادام 200 مىڭ جانە 100 مىڭ تەڭگە الادى.

جارىسقا ەلىمىزدىڭ 14 وبلىسى مەن استانا جانە الماتى قالالارىنان شاباندوزدار قاتىسادى. سونداي-اق، رەسەي، قىرعىزستان، تاجىكستان، تۇركيا، بولگاريا مەن باسقا دا ەلدەردەن شاباندوزدار كەلەدى.

تاعى ءبىر ايتا كەتەرلىگى جارىستىڭ ءۇزىلىسى كەزىندە «تەڭگە ءىلۋ»، «جامبى اتۋ»، «قىز قۋۋ»، قازاقى تازى يتتەر جارىسى سياقتى ۇلتتىق سپورت تۇرلەرىنەن كورسەتىلىمدەر ۇيىمداستىرىلادى.

جارىس مادەنيەت جانە سپورت مينيسترلىگى، ۇلتتىق سپورت تۇرلەرى قاۋىمداستىعى، استانا قالاسىنىڭ اكىمدىگى، الماتى وبلىسىنىڭ اكىمدىگى مەن قازاقستاننىڭ بايگە تۇرلەرى قوعامىنىڭ ۇيىمداستىرۋىمەن وتەدى.

اۆتور: كۇنسۇلتان وتارباي