وسكەمەننەن استاناعا جاياۋ كەلگەن قازاق ازاماتى: بۇل الەم كوز تىككەن شاراعا قوسقان ازدا بولسا ۇلەسىم
قازاقپارات اگەنتتىگى تاباندىلىقپەن، ەرلىك جىگەرىمەن 1000 شاقىرىمعا جۋىق الىس جولدى ارتقا قالدىرعان قازاق ازاماتىمەن بولعان سۇحباتتى نازارلارىڭىزعا ۇسىنادى .
- عالىمجان توقتار ۇلى ەڭ اۋەلى ءوزىڭ تۋرالى ايتىپ بەرسەڭىز، قاي جەردىڭ ازاماتىسىز، نەگىزگى ماماندىعىڭىز قانداي؟
- مەن 1988 -جىلى قىتايدىڭ التاي ايماعىنا قاراستى جەمەنەي اۋدانىندا دۇنيەگە كەلدىم. قازاق ەلىنە ات باسىن بۇرعانىما 7 جىل بولدى. نەگىزگى ماماندىعىم ماشينا جاساۋ سالاسى. سپورتقا بالا كۇنىمنەن قىزىعامىن.
- بۇل ساپاردىڭ باستى ماقساتى نە؟ يدەيا قالاي تۋدى؟
- بۇل يدەيا مەنىڭ كوپتەن بەرى كوكەيىمدە جۇرگەن ەدى. جوعارىدا ايتىپ وتكەنىمدەي، قازاق ەلىنە كەلگەنىمە 7 جىل بولىپ قالدى. ەل ازاماتى رەتىندە الەم كوز تىككەن ۇلكەن شاراعا از دا بولسا ۇلەس قوسقىم كەلدى. اتا جۇرتقا كەلۋدەگى ماقساتىمدا ءوز ەڭبەگىمدى، كۇش- جىگەرىمدى وتانىما ارناۋ ەدى. سول ءۇشىن بەلدى بەكەم بۋىپ، ەلورداداعى «ماڭگىلىك ەل» قاقپاسىن بەتكە الىپ جاياۋ تارتىپ وتىردىم. قازاقتىڭ ۇلانعايىر كەڭ ساحاراسىن ءوز تابانىممەن باسىپ، ەكسپو حالىقارالىق كورمەسىن جۇرتشىلىققا ناسيحاتتاۋ باستى ماقساتىم بولدى.
- جولدا قانداي قيىندىقتار، قىزىقتار بولدى؟
- مەنىڭ جولداعى قيىندىعىم، كەزىندە اتتىڭ جالىندا ءجۇرىپ، قان مەن تەرىن توگىپ، اق نايزانىڭ ۇشىمەن وسىنشاما جەردى بىزگە مۇرا ەتكەن بابالارىمىزدىڭ ىستەرىنىڭ الدىندا تۇككە تۇرعىسىز دەپ بىلەمىن. ارينە، ءاربىر ءىستى باستاۋ قيىن. العاشقى كۇندەرى اياعىم اۋىرىپ، سىرەسىپ قالعان كۇندەر بولدى. بىرتىندەپ ۇيرەنىپ كەتتىم. كۇننىڭ ىستىعى، جولداعى ماسا- شىركەيدىڭ دە اۋرەسى كوپ بولدى. اسىرەسە، استاناعا جاقىنداعان ەكى كۇندە الدىمنان قارسى جەل تۇرىپ جۇگىرۋگە اۋىر بولدى. الايدا، قوناقجاي قازاق جۇرتىنىڭ كەڭ پەيىلى، جولداعى جانكۇيەرلەرىمنىڭ دەمەۋى ءبارىن ۇمىتتىرىپ جىبەرەدى.
- جولداعى تاماق، جاتىن ورىن ماسەلەسىن قالاي شەشتىڭدەر؟
- بۇل ساپارعا ەشقانداي ارنايى مەكەمەلەردىڭ ارالاسۋىنسىز، تۋعان- تۋىس، جولداس- جورالارىمنىڭ كومەگىمەن شىقتىم. سوڭىمنان ايەلىم ەركەگۇل مۇقيات قىزى كولىكپەن ەرىپ وتىردى. ءبىر دارىگەرىمىز بار. تاماقتى دا وزىمىزبەن الىپ جۇرگەنبىز. تۇندە جول ۇستىندە تۇنەسەك دەپ وزىمىزبەن بىرگە شاتىر دا الا شىققانبىز. كەيدە دالادا، كەيدە قۇدايى قوناق بولىپ جولداعى اۋىلدارعا قونىپ وتىردىق. ءبىزدىڭ كەلە جاتقانىمىزدى الدىن الا ءبىلىپ، تەلەفون شالىپ، « ءبىزدىڭ ۇيگە قونىڭدار» دەپ قوناقجايلىلىق تانىتقان اعايىندار از بولمادى. كەيبىر كىسىلەر قازاق سالتى بويىنشا الدىمنان ايران، قىمىز الىپ شىعىپ، اتالار باتاسىن بەردى.
- ءار كۇنى نەشە ساعات جول ءجۇردىڭ، دەمالىس ۋاقىتىڭ قالاي؟
- مەنىڭ كۇندەلىكتى جۇگىرۋ، تىنىعۋ ءتارتىبىن كولىكپەن ەرىپ شىققان ايەلىم قاداعالاپ وتىردى. تاڭەرتەڭ ساعات 6 دا تۇرىپ، 6:30 عا دەيىن تاڭعى اسىمدى ءىشىپ، ساعات 7 دەن جۇگىرۋدى باستاپ كەتەمىن. ءبىر كۇنگى جۇگىرۋ مەجەسى - 8 ساعات، جۇگىرۋ ۇزاقتىعى - 60-80 شاقىرىم.
- مىنە بۇگىن كوزدەگەن ماقساتىڭا جەتىپ، ەكسپو -2017 كورمەسىنىڭ الدىندا تۇرسىڭ، ەلگە ءبىر اۋىز تىلەگىڭدى ايتساڭ؟
- بارشا قازاق ەلىن ەكسپو -2017 حالىقارالىق كورمەسىنىڭ اشىلۋىمەن قۇتتىقتايمىن! بۇل ءبىزدىڭ ەلدىگىمىزدىڭ ، بىرلىگىمىزدىڭ ارقاسى. وسىنى ءار- ءبىر قازاق سەزىنسە دەيمىن. قۇدايعا شۇكىر، بۇل كۇندە ەلىمىزدى بۇكىل الەم مويىندادى. بۇل كورمە سونىڭ ايعاعى. ماعان جانكۇيەرلىك تانىتقان، تىلەۋلەس بولعان بارلىق جاندارعا العىسىمدى بىلدىرەمىن. قازاق ەلىنىڭ الار اسۋى بۇدان دا بيىكتەي بەرسىن دەپ تىلەيمىن!
اۆتور: ريزابەك نۇسىپبەك ۇلى
