ەرجان شىنكەيەۆ: قازاق كۇرەسىنەن ءومىر بويىنا شەتتەتىلگەن جوقپىن
قازىر ەلىمىزدىڭ 14 وبلىسى مەن استانا جانە الماتى قالالارىنان ىرىكتەلىپ شىققان ەڭ مىقتى 34 بالۋان اتالمىش دودانىڭ فينالدىق سىنىنا قىزۋ دايىندىق ۇستىندە. ولاردىڭ قاتارىندا 2013-جىلى وتكەن «قازاقستان بارىسى» جارىسىندا باسى داۋعا قالىپ ەكى جىلعا قازاق كۇرەسىنەن شەتتەتىلگەن ەرجان شىنكەيەۆ تە بار.
اراعا ەكى جىل سالىپ، قازاق كۇرەسىنە قايتا ورالعان قاراعاندىلىق ەرجان شىنكەيەۆكە ارنايى قوڭىراۋ شالىپ، «قازاقستان بارىسى» تۋرنيرىنە دايىندىعى جايىندا اڭگىمە وربىتتىك.
- ەرجان تەمىربەك ۇلى ءسىزدى 2013-جىلعى «قازاقستان بارىسى» تۋرنيرىنىڭ فينالدىق دوداسىندا بەيبىت ىستىبايەۆپەن بولعان بەلدەسۋدە ورىن العان داۋعا بايلانىستى قازاق كۇرەسىنەن ەكى جىلعا شەتتەتكەنى ەسىمىزدە. بيىل قايتادان ءداستۇرلى تۋرنيرگە ورالعانىڭىزدى، «قاراعاندى بارىسى» اتاعىن يەلەنگەنىڭىزدى ەستىپ جاتىرمىز...
- ءيا، قازاق كۇرەسى ءار قازاقتىڭ قانىندا بار قاسيەتتى ونەر. بۇل ءبىزدىڭ ءتول سپورتىمىز. سوندىقتان ودان ءبىر جولا قول ءۇزىپ كەتۋ مۇمكىن ەمەس. ءبىر ساتسىزدىككە بولا قولدى ءبىراق سىلتەۋ جىگىتتىككە سىن. سول كەزدەگى تورەشىلەردىڭ قاتەلىگىنەن ەكى جىلعا «قۇرباندىققا» شالىندىم. ءبىراق، مەنى ەشكىم قازاق كۇرەسىنەن ءومىر بويىنا شەتتەتكەن جوق. وتكەن ءىس ءوتتى. وتكەن كۇنگە وكپە ءوشتى. ەندى جاڭا كوڭىل-كۇيمەن قايتا ورالىپ جاتىرمىن.
- «ەكى جىل قازاق كۇرەسىنەن وتەتىن ەشقانداي جارىستارعا قاتىسپايسىڭ» دەگەندە قانداي كوڭىل-كۇيدە بولدىڭىز؟
- ول كۇندەردىڭ ءبارى ارتتا قالدى. ەندى ونى ەسكە الىپ قايتالاۋدىڭ قاجەتى جوق دەپ ەسەپتەيمىن. ءبىراق، دالادا قالعان جوقپىن. وزدەرىڭىز دە بىلەسىزدەر مەن دزيۋدودان ۇلتتىق قۇرامانىڭ مۇشەسىمىن. سول قۇرامادا كۇنى بۇگىنگە دەيىن جاتتىعىپ، ەل ءىشى-سىرتىنداعى جارىستارعا قاتىسىپ ءجۇرمىن. دزيۋدودان وليمپيادا ويىندارىنا بارماعانىم بولماسا وزگە الەمدىك، حالىقارالىق دودالاردا ەل نامىسىن ابىرويمەن قورعاپ كەلەم. سوندىقتان قازاق كۇرەسىنەن شەتتەتكەن ەكى جىلدا ەسكەرۋسىز قالعان كۇنىم بولعان ەمەس.
- بيىلعى «قازاقستان بارىسىنا» دايىنىدىعىڭىز قالاي؟
- ءبىر-ەكى اي بولىپ قالدى. تەك وسى «قازاقستان بارىسى» تۋريرىنە دايىندالىپ جاتىرمىن. كوڭىل-كۇيىم دە، جاتتىعۋىم دا كەرەمەت.
- اڭگىمەڭىزگە نازار سالساق، بۇرىنعى كەتكەن ەسەلەرىڭىزدى قايتارۋعا ءبىرجولا بەكىنگەن سياقتىسىز؟
- ارينە، قانداي جارىس بولماسىن جوعارى كوڭىل-كۇيمەن بارۋ كەرەك. ءار سپورتشىدا «جەڭەم» دەگەن تالاپ-جىگەر بولماسا نە ءۇشىن جارىسقا بارادى. مەن بۇيىرسا باس جۇلدەنى الۋ ءۇشىن بەلدەسەم.
- قازاق كۇرەسىندەگى باستى قارسىلاستارىڭىز كىم؟
- ەشكىمدى بولە جارمايمىن. قازاقتىڭ بالۋاندارىنىڭ بارلىعى مىقتى. ءوز باسىم كىم بولسا دا بەلدەسۋگە دايىنمىن. كۇرەس دەگەن قىزىق سپورت. كەيدە اتاعى تاۋداي الىپتاردى وپ-وڭاي وماقاستىرا لاقتىرا سالاسىڭ. كەيدە بارماقتاي بالادان ويلاماعان جەردەن جىعىلىپ قالاسىڭ. سوندىقتان، اناۋ مەنىڭ قارسىلاسىم، مىناۋ ماعان قارسىلاس ەمەس دەۋ ابەستىك.
- «قازاقستان بارىسىنا» ءوزىڭىز قاتىسپاعان سوڭعى جىلدارداعى بەلدەسۋلەرىنە قانداي باعا بەردىڭىز؟ تورەشىلەردىڭ ادىلدىگىن قالاي باعالادىڭىز؟
- مەن ءبىراق نارسەنى بىلەم. قازاق كۇرەسى سوڭعى جىلدارى وتە جاقسى جوعارى دەڭگەيدە دامىپ كەلەدى. سونى بىلەم. ال «قازاقستان بارىسىنا» باعانى مەن ەمەس حالىق بەرەدى. ال بىزگە كەرەگى تورەشىلەردىڭ ادىلدىگى...
- اڭگىمەڭىزگە راحمەت!
اۆتور: كۇنسۇلتان وتارباي
