قىتاي ش ى ۇ دامۋىنا زور ەڭبەك سىڭىرگەنى ءۇشىن قازاقستاندى جوعارى باعالايدى - شي جينپيڭ
بۇل تۋرالى بۇگىن ەلوردادا ءوتىپ جاتقان ش ى ۇ- عا مۇشە مەملەكەتتەر باسشىلارى كەڭەسىنىڭ كەڭەيتىلگەن وتىرىسىندا ق ح ر ءتوراعاسى شي جينپيڭ ءمالىم ەتتى، دەپ حابارلايدى قازاقپارات.
«ۇيىمنىڭ ءىس باسىنداعى تۇراقتى ەكى ورگانىنىڭ قىزمەتىن جوعارى باعالاي كەلە قىتاي تارابى ش ى ۇ حاتشىلىعىنا قوسىمشا 10 ميلليون يۋان ءبولۋ تۋرالى شەشىم قابىلدادى. قىتاي ءتوراعا رەتىندە ۇيىمنىڭ دامۋىنا زور كۇش-جىگەر مەن ەڭبەك سىڭىرگەنى ءۇشىن قازاقستاندى جوعارى باعالايدى. قىتاي ش ى ۇ ءتوراعالىعىن قابىلدايدى جانە 2018-جىلدىڭ ماۋسىمىندا كەزەكتى سامميتىن ۇيىمداستىرادى»، - دەدى شي جينپيڭ.
سونىمەن قاتار ول قىتايدىڭ ۇيىم قاتارىنا ءۇندىستان مەن پاكىستاننىڭ قوسىلۋىن قولدايتىندىعىن جانە ش ى ۇ اياسىنداعى ىنتىماقتاستىققا دايىن ەكەندىگىن اتاپ ءوتتى. سونىمەن قاتار ق ح ر ءتوراعاسى ۇزاق مەرزىمدى تاتۋ كورشىلىك جانە دوستىق ىنتىماقتاستىق تۋرالى شارتتىڭ ەرەجەلەرىن جۇزەگە اسىرۋ بويىنشا بەس جىلدىق كەزەڭگە ارنالعان ءىس-قيمىل جوسپارىن ازىرلەۋ قاجەت دەگەن ۇسىنىسىن ءبىلدىردى.
«ءبىز ش ى ۇ- نىڭ ساۋدانى جەڭىلدەتۋ پروتسەدۋرالارى تۋرالى كەلىسىمىنە قول قويۋدى باستاي الار ەدىك. حالىقارالىق اۆتوموبيل تاسىمالى ءۇشىن جايلى جاعداي جاساۋ تۋرالى ش ى ۇ- عا مۇشە مەملەكەتتەردىڭ ۇكىمەتتەرى اراسىنداعى كەلىسىمدە قاراستىرىلعان ترانسشەكارالىق باعدارلاردىڭ بەلگىلەنگەن ۋاقىتتا اشىلۋىن جاقتايمىز»، - دەدى شي جينپيڭ.
اۆتور: مارلان جيەمباي
