ش ى ۇ «شاڭحاي سەگىزدىگىنە» اينالادى - نۇرسۇلتان نازاربايەۆ

استانا. قازاقپارات - شاڭحاي ىنتىماقتاستىق ۇيىمى «شاڭحاي سەگىزدىگىنە» اينالادى. بۇل تۋرالى بۇگىن ەلوردادا ءوتىپ جاتقان ش ى ۇ- عا مۇشە مەملەكەتتەر باسشىلارى كەڭەسىنىڭ كەڭەيتىلگەن وتىرىسىندا ق ر پرەزيدەنتى نۇرسۇلتان نازاربايەۆ ايتتى،

دەپ حابارلايدى قازاقپارات.

«ءبىز ءۇشىن ۇيىمىمىز اياسىنداعى پراكتيكالىق ىنتىماقتاستىقتى ىلگەرىلەتۋ بويىنشا مۇمكىندىگى زور قادامداردى ازىرلەۋ ماڭىزدى. حالىقارالىق جانە وڭىرلىك ماسەلەلەر بويىنشا پىكىر الماسۋ دا پايدالى بولادى. وسىدان 12 جىلى بۇرىن ءدال وسى استانادا ەكى ەلگە، ءۇندىستان مەن پاكىستانعا ۇيىمىمىزدىڭ بايقاۋشىسى مارتەبەسىن بەرۋ تۋرالى شەشىمگە قول قويىلۋىنىڭ سيمۆولدىق ءمانى بار. ءبىزدىڭ وتىرىسىمىزدىڭ ماڭىزدىلىعى ۇيىمىزعا بۇل ەلدەر كىرگەلى وتىر، ۇيىمىمىز كەڭەيۋدە. ەندىگى ۋاقىتتا شىۇ- نىڭ جاۋاپكەرشىلىك ايماعى ءۇش ميللياردتان استام ادام تۇراتىن اۋماقتى، الەمنىڭ جالپى ىشكى ءونىمىنىڭ شامامەن ۇشتەن ءبىرىن قامتيتىن بولادى. وسىلايشا، ۇيىم ءوزىنىڭ ينستيتۋتتىق دامۋىنىڭ «شانحاي سەگىزدىگى» رەتىندەگى جاڭا كەزەڭىنە اياق باستى»، - دەدى نۇرسۇلتان نازاربايەۆ.

مەملەكەت باسشىسى بۇگىندە ش ى ۇ- عا ىرگەلەس ءبىرقاتار وڭىردەگى جاعدايدىڭ ۋشىعۋىنا، گەوساياسي شيەلەنىستىڭ ارتۋىنا كۋا بولىپ وتىرعانىمىزدى اتاپ ءوتتى.

«وسىعان بايلانىستى ءبىزدىڭ كەڭەسىمىزدىڭ ش ى ۇ- عا مۇشە مەملەكەتتەر باسشىلارىنىڭ حالىقارالىق تەرروريزمگە بىرلەسە قارسى تۇرۋ تۋرالى مالىمدەمەسىن قابىلداۋ باستاماسى دەر كەزىندە كوتەرىلگەن قادام بولماق. بۇگىن ءبىز قول قويماق بولىپ وتىرعان ەكسترەميزگە قارسى ءىس- جيمىل جونىندەگى شىۇ كونۆەنتسياسىنىڭ دا وزەكتىلىگىن اتاپ وتكىم كەلەدى. ءبىزدىڭ ەلدەرىمىزدىڭ قورعانىس ۆەدومستۆولارىنىڭ ءتيىمدى ءوزارا ءىس- قيمىلىن ارتتىرۋعا، پراكتيكالىق ىنتىماقتاستىعىن نىعايتۋعا «بەيبىت ميسسيا» تەرروريزمگە قارسى بىرلەسكەن وقۋ- جاتتىعۋى ايتارلىقتاي ۇلەس قوسادى»، - دەدى ەلباسى.

قازاقستان پرەزيدەنتى وتكەن كەزەڭ ىشىندە ش ى ۇ ءتۇرلى حالىقارالىق بىرلەستىكتەرمەن ىنتىماقتاستىقتى نىعايتۋ بويىنشا دا زور جۇمىستار جۇرگىزگەنىن ايتتى.

«2016 -جىلدىڭ قاراشاسىندا بۇۇ باس اسسامبلەياسىنىڭ ش ى ۇ- مەن ىنتىماقتاستىق جونىندەگى قارارى قابىلداندى. ش ى ۇ مەن ب ۇ ۇ- نىڭ ترانس ۇلتتىق ەسىرتكى قىلمىسىنا قارسى كۇرەس ماسەلەلەرى جونىندەگى جوعارى دەڭگەيدەگى بىرلەسكەن ءىس- شارالارىنىڭ قورىتىندىسىن قولدايمىز. ش ى ۇ مەن قىزىل كرەست حالىقارالىق كوميتەتى قارىم- قاتىناسىن راسىمدەۋدىڭ كەلەشەگى زور كورىنەدى. سونىمەن قاتار ش ى ۇ- نىڭ ە ا ە و- مەن، ي ى ۇ- مەن ءوزارا ءىس- قيمىلىن جولعا قويۋعا قولداۋ بىلدىرەمىز. بۇل جايىندا بۇگىن مەملەكەت باسشىلارى شاعىن قۇرامداعى وتىرىستا ايتتى»، - دەدى نۇرسۇلتان نازاربايەۆ.

 ايتا كەتەيىك، كەڭەيتىلگەن قۇرامداعى وتىرىسقا ق ر پرەزيدەنتى نۇرسۇلتان نازاربايەۆ، ق ح ر ءتوراعاسى شي جينپيڭ، وزبەكستان پرەزيدەنتى شاۆكات ميرزيەيەۆ، قىرعىزستان پرەزيدەنتى المازبەك اتامبايەۆ، رەسەي پرەزيدەنتى ۆلاديمير پۋتين، تاجىكستان پرەزيدەنتى ەمومالي راحمون، شىۇ بايقاۋشى مەملەكەتتەرىنىڭ باسشىلارى: اۋعانستان پرەزيدەنتى اشراف گاني احمادزاي، موڭعوليا پرەزيدەنتى تساحياگيين ەلبەگدورج، بەلارۋس پرەزيدەنتى الەكساندر لۋكاشەنكو مەن يران يسلام رەسپۋبليكاسى سىرتقى ىستەر ءمينيسترىنىڭ ورىنباسارى يبراگيم راحيمپۋردىڭ، ءۇندىستان پرەمەر- ءمينيسترى نارەندرا مودي مەن پاكىستان يسلام رەسپۋبليكاسىنىڭ پرەمەر- ءمينيسترى مۋحاماد ناۆاز شاريف، ش ى ۇ باس حاتشىسى راشيد اليموۆ، ش ى ۇ وڭىرلىك لاڭكەستىككە قارسى قۇرىلىمى اتقارۋشى كوميتەتىنىڭ ديرەكتورى ەۆگەنيي سىسويەۆ، ب ۇ ۇ باس حاتشىسى انتونيۋ گۋتتەريش، ازياداعى ءوزارا ىقپالداستىق جانە سەنىم شارالارى كەڭەسىنىڭ اتقارۋشى ديرەكتورى گۋن تسزيانۆەي، ت م د اتقارۋشى كوميتەتىنىڭ ءتوراعاسى، اتقارۋشى حاتشىسى سەرگەي لەبەديەۆ، ۇجىمدىق قاۋىپسىزدىك شارت ۇيىمى باس حاتشىسىنىڭ ورىنباسارى امانجول جانقۇليەۆ، وڭتۇستىك- شىعىس ازيا مەملەكەتتەرى قاۋىمداستىعىنىڭ باس حاتشىسى لە لىونگ مين قاتىسۋدا.

اۆتور: مارلان جيەمباي