الماتىلىقتار شەت ءتىلىن تەگىن ۇيرەنەتىن بولدى
«تىلدەر ساياباعى - پارك يازىكوۆ - Language Park» تىلدەر كۋرسىندا كەز- كەلگەن ادام اعىلشىن، قازاق تىلدەرىن ۇيرەنەتىن بولادى. ساباقتار 21 كۇنگە سوزىلادى اپتاسىنا ءۇش رەت وتەدى. ءبىلىم الامىن دەۋشىلەرگە ابىلاي حان اتىنداعى قازاق مەملەكەتتىك شەت تىلدەرى جانە حالىقارالىق قاتىناستار ۋنيۆەرسيتەتىنىڭ 5 تۇلەگى ءتالىم بەرمەك. « ءبىرىنشى ساباقتا شاكىرتتەردىڭ ءبىلىم دەڭگەيىنە قاراي توپقا ءبولىپ، «ەlementary» ، «Beginner» توپتارىمەن جۇمىس جاسايمىز. كۋرس بىتكەن سوڭ بارلىق قاتىسۋشىلارعا ارنايى سەرتيفيكات بەرىلەدى» ، - دەدى ايگەرىم شاكىم.
'' ءبىر ايتا كەتەرلىگى، ساباقتار اشىق اسپان استىندا جاسىل جەلەك ۇستىندە وتەدى. كەلەمىن دەۋشىلەرگە ەسىك اشىق. كەيبىر ازاماتتار ءوزىنىڭ وتباسىن تۇگەل الىپ كەلگەن. «مەن نەمىس ءتىلىنىڭ مامانىمىن. ءبىراق مەملەكەتتە ءۇش ءتىلدى دامىتۋ ساياساتى ءجۇرىپ جاتقاسىن، تىم بولماسا باستاۋىش اعىلشىن ءبىلىمىم بولسىن دەگەن ويمەن كەلدىم. وزىممەن بىرگە 5 بالامدى الىپ كەلدىم» ، - دەدى گۇلميرا دايرابايەۆا.
