نۇرسۇلتان نازاربايەۆ قازاقستاندىق-قىتايلىق «كومپوزيتور» فيلمى جايىندا ءسوز قوزعادى

استانا. قازاقپارات - بۇگىن اقوردادا ەلىمىزگە رەسمي ساپارمەن كەلگەن ق ح ر ءتوراعاسى شي جينپيڭمەن شاعىن جانە كەڭەيتىلگەن قۇرامداعى كەلىسسوزدەردەن كەيىنگى بىرلەسكەن مالىمدەمە بارىسىندا ەلباسى نۇرسۇلتان نازاربايەۆ قىتايلىق ارىپتەسىمەن «كومپوزيتور» فيلمىن تالقىلاعاندىعىن ايتتى، دەپ حابارلايدى قازاقپارات.

«مادەني ىنتىماقتاستىق ماسەلەسىن، ونىڭ ىشىندە «كومپوزيتور» دەگەن اتاۋمەن كينو فيلم ءتۇسىرۋ جونىندەگى بىرلەسكەن جوبانى تالقىلادىق. ول قازاق كومپوزيتورى باقىتجان بايقاداموۆ پەن بىزگە قازىرگى قىتاي مۋزىكاسىنىڭ كلاسسيگى رەتىندە تانىمال شي شينحايانىڭ دوستىعىنا ارنالعان»، - دەدى نۇرسۇلتان نازاربايەۆ.

ايتا كەتەرلىگى، ەكى ەلدىڭ مەملەكەت باسشىلارىنىڭ شاعىن جانە كەڭەيتىلگەن قۇرامداعى كەلىسسوزدەرىنىڭ قورىتىندىسى بويىنشا ءبىرقاتار قۇجاتقا قول قويىلعان ەدى. ولاردىڭ اراسىندا ق ر مەن ق ح ر ۇكىمەتتەرى اراسىنداعى بىرلەسكەن كينو ءوندىرىسى سالاسىنداعى ىنتىماقتاستىق كەلىسىمى، «قازاقستان» ت ر ك مەن قىتايدىڭ ورتالىق تەلەۆيدەنيەسى اراسىنداعى ءوزارا تۇسىنۋشىلىك جانە ىنتىماقتاستىق مەموراندۋمى بار.

اۆتور: مارلان جيەمباي