قازاقستان قىتايمەن مۇناي كەلىسىمشارتتارىن ۇزارتۋ ماسەلەسىن قارايدى
دەپ حابارلايدى قازاقپارات.
«قازاقستاندا وندىرىلەتىن مۇنايدىڭ 25 پايىزى قىتاي كومپانيالارىنىڭ ۇلەسىنە تيەسىلى. قازىرگى ۋاقىتتا ولار كەلىسىمشارتتى ۇزارتۋ ماسەلەلەرىن كوتەرىپ وتىر. ءبىز تىڭعىلىقتى قاراستىراتىن بولامىز. ويتكەنى ولار ءبىزدىڭ جاقسى سەرىكتەسىمىز، بىرلەسىپ جۇمىس ىستەيمىز. سىزدەرمەن بىرلەسىپ جۇمىس ىستەگەن وسى جىلداردا قازاقستان ارقىلى 100 ميلليون توننادان استام مۇناي، 180 ميلليارد تەكشە مەتردەن استام گاز جەتكىزىلدى. قىتايلىق شەكاراشىلار مالىمەتتەرىنە سايكەس تاۋار اينالىمى 46، ال ءبىزدىڭ مالىمەتتەر بويىنشا 30 پايىز وسكەن. مۇنداي ايىرماشىلىق نەلىكتەن ورىن العاندىعىن بىلمەيمىن»، - دەدى ق ر پرەزيدەنتى.
نۇرسۇلتان نازاربايەۆ قىتايدان 51 كاسىپورىندى قازاقستانعا كوشىرۋ تۋرالى ۋاعدالاستىق بار ەكەندىگىن، بۇگىنگى كۇنى ونىڭ ۇشەۋى جۇمىس ىستەپ تۇرعانىن، التاۋى بويىنشا جۇمىستار جۇرگىزىلىپ جاتقانىن ايتتى.
«ءسىزدىڭ ۇلى جىبەك جولىن دامىتۋعا باعىتتالعان «ءبىر جول، ءبىر بەلدەۋ» يدەياڭىزدى ايرىقشا اتاپ وتكىم كەلەدى. ءسىز ونى العاش رەت بىزدە جاريا ەتتىڭىز جانە ءبىز ۇلى جىبەك جولى مەن «نۇرلى جولدى» بەلسەندى قولدادىق. وسى ۋاقىتتىڭ ىشىندە قازاقستان قىتايدىڭ شەكاراسىنان كاسپيي تەڭىزىنە دەيىن تەمىر جول توسەپ شىعىپ، قورعاس پەن الماتىنى جالعاستىردى. وسىلايشا، قازاقستان مەن بۇكىل ورتالىق ازيانى قىتايمەن بايلانىستىرۋ ماسەلەسى تۇبەگەيلى شەشىلدى»، - دەدى نۇرسۇلتان نازاربايەۆ.
ايتا كەتەرلىگى، ق ح ر ءتوراعاسى قازاقستانعا وسىمەن ءۇشىنشى رەت رەسمي ساپارمەن كەلىپ وتىر. ساپار اياسىندا ول ەرتەڭ ش ى ۇ سامميتىنە، سونىمەن قاتار ەكسپو-2017 حالىقارالىق مامانداندىرىلعان كورمەسىنە قاتىساتىن بولادى.
اۆتور: مارلان جيەمباي
