استانادا جابىق جاساندى سۋ ايدىنى اشىلادى
نىسان الداعى شىلدە ايىندا پايدالانۋعا بەرىلەدى جانە ەلورداداعى جالعىز جابىق اكۆاپارك بولادى دەپ كۇتىلۋدە. ساۋىق كەشەنىنە ءتۇرلى اتتراكسيوندارى بار سۋ پاركى، شەشىنۋ بولمەلەرى، مونشالار مەن دەمالىس جانە تاماقتانۋ ورىندارى ورناتىلادى. عيماراتتىڭ جالپى اۋدانى 8,5 مىڭ شارشى مەتر. سۋ پاركىنىڭ ءبىرىنشى قاباتىندا قاۋىپسىزدىك دەڭگەيى جوعارى جەتى توبەشىك پەن ەكى باسسەين بولادى. سۋدىڭ تەمپەراتۋراسى 32 گرادۋستان جوعارى بولمايدى. باسسەيننىڭ بىرىنە جوبالاۋشىلاردىڭ ۇسىنىسىمەن تولقىن اسەرىن تۋدىراتىن قوندىرعى ورناتۋ جوسپارلانىپ وتىر. بۇل دەمالۋشىلارعا تەڭىزدىڭ تولقىنىن سەزىنۋگە مۇمكىندىك بەرەدى.
مەيماندارعا جايلى بولۋى ءۇشىن پارك اۋماعىنا جىلى ەدەندەر مەن كليمات باقىلاۋ قىزمەتى ورناتىلادى. ەكىنشى قاباتىندا سپا ايماقتار، مونشالار مەن حاۋىزداردىڭ بىرنەشە ءتۇرى اشىلادى. بۇدان بولەك پاركتىڭ اينالاسىندا اعىسى شامالى جانە قاتتى «جالقاۋ وزەندەر» جاساۋ كوزدەلگەن. پاركتە ءبىر مەزگىلدە 1,5 مىڭ ادام دەمالا الادى.
«مۇمكىندىگى شەكتەۋلى ازاماتتار پارككە كەلىپ ۋاقىتىن جايلى وتكىزە الادى. ولارعا ارناپ ەكىنشى قاباتقا ەش قيىندىقسىز كوتەرىلۋى ءۇشىن جەدەلساتى ورناتتىق»، - دەدى مەردىگەر كومپانيانىڭ وكىلى مەديا ورتالىقتىڭ تىلشىسىنە.
اكۆاپارك تولىعىمەن ستاندارتتارعا ساي ساپا تالاپتارىنا جاۋاپ بەرە الادى. بۇل وتباسىمەن جايلى ءارى قاۋىپسىز دەمالۋعا مۇمكىندىك بەرەدى دەدى ول. بۇعان دەيىن استانا اكىمدىگىنىڭ مەديا ورتالىعى شىلدە ايىندا ەلوردادا اينالمالى اتتراكتسيون اشىلادى دەپ حابارلاعان بولاتىن. اتتراكتسيون - قازاقستانداعى ەڭ بيىك دوڭگەلەك بولادى. بيىكتىگى 65 مەترلىك نىسان الماتىلىق اتتراكتسيوننان 5 مەترگە ۇلكەن.
