رۋسلان ءابدىرازاقوۆ: «قازاقستان بارىسىنداعى» باستى قارسىلاسىم - اعام ۇلان رىسقۇل

استانا. قازاقپارات - بيىلعى وسىمەن جەتىنشى مارتە جالاۋى جەلبىرەيتىن قازاق كۇرەسىنەن «قازاقستان بارىسى» تۋرنيرىندە مەنىڭ باستى جانە ەڭ قاۋىپتى قارسىلاسىم، ءوزىمنىڭ تۋعان اعام - ۇلان رىسقۇل، دەپ اتاپ ءوتتى رۋسلان ءابدىرازاقوۆ قازاقپارات تىلشىسىنە بەرگەن سۇحباتىندا.

29- مامىر كۇنى الماتىداعى بالۋان شولاق اتىنداعى سپورت سارايىندا قازاق كۇرەسىنەن «الماتى بارىسى» تۋرنيرى وتكەن بولاتىن.

وندا رۋسلان ءابدىرازاقوۆ «الماتى بارىسى» اتانىپ، استانادا شىلدەنىڭ 2 ءسى كۇنى وتەتىن فينالدىق دوداعا جولدامانى جەڭىپ العان ەدى.

بۇگىن رۋسلان قازاقپارات تىلشىسىنە سۇحبات بەرىپ، جارىسقا دايىندىعى جانە باستى قارسىلاستارى تۋرالى ايتىپ بەردى.

- رۋسلان، «قازاقستان بارىسىنا» دايىندىعىڭىز قالاي؟

- جامان ەمەس. دايىندىعىم وتە جاقسى. الماتىداعى وقۋشىلار سارايىندا باپكەرىمىز ەكەۋمىز ايانباي تەر توگىپ جاتىرمىز. ەڭ باستىسى، فينالعا دەيىن جاتتىعۋ بارىسىندا جاراقات الىپ قالۋدان امان بولساق بولعانى.

- قاتەلەسپەسەم، «قازاقستان بارىسىنا» 2013-جىلى عانا ءبىر-اق رەت قاتىسا الماي قالدىڭىز. قالعان جىلدارى ۇزبەي قاتىسىپ كەلەسىز. وتكەن كۇندەرىڭىزدەن قالعان «اتتەگەن-ايلارىڭىز» بار ما؟

- ارينە، بار. فينالعا جەتىپ تۇرىپ سۇرىنگەن ءساتىم بولدى. فينالعا جەتپەي سۇرىنگەن ءساتىم بولدى. بۇنىڭ بارلىعىنىڭ ار جاعىندا ءبىر «اتتەگەن-اي» قالادى. ءبىراق، «ءبىر ساتسىزدىك ءبىر ساباق» دەمەي مە؟ بيىل ونداي وكىنىشتەرگە جول بەرمەۋگە تىرىساتىن بولامىن.

- بيىلعى ماقساتىڭىز...

- بيىل تەك باس جۇلدە ءۇشىن عانا كۇرەسەمىن.

- باستى قارسىلاستارىڭىز تۋرالى ايتىپ وتسەڭىز.

- «قازاقستان بارىسىنا» جالپى 34 بالۋان قاتىسادى. ونىڭ ءبىرى - ءوزىممىن. قالعان  33 ءىنىڭ بارلىعى - مەنىڭ قارسىلاسىم. ونىڭ ىشىندە وسالدارى بولمايدى. وتكەندە ءبىر ارىپتەستەرىم «ءبىز تەك ساعان دايىندالىپ جاتىرمىز» دەپ قالدى. سوندا ولاردىڭ دا باستى قارسىلاستارى مەن سياقتىمىن. وزگە بالۋاندار مەن ءۇشىن دايىندالىپ جاتسا، مەن سول بالۋاندار ءۇشىن دايىندالىپ جاتىرمىن.

- سونىڭ ىشىندە ءوزىڭىز كىمنەن قاۋىپتەنەسىز؟

- تەك، اعام ۇلاننان.

- ەگەر فينالعا دەيىن، نە فينالدا جولىعىپ قالساڭىزدار نە ىستەيسىز؟

- مەنى وسى سۇراق قاتتى ويلاندىرىپ ءجۇر. قازىر اللادان جاتسام دا، تۇرسام دا اعامدى فينالعا دەيىن جولىقتىرماسا ەكەن دەپ تىلەيمىن. جولىقتىرسا، تەك فينالدا كەزدەستىرسە ەكەن دەيمىن.

- 2010-جىلى العاشقى تۋرنيردە اعاڭىزعا جول بەرگەنىڭىزدى جۇرت جاقسى بىلەدى. بيىل دا جولىعىپ قالدىڭىز دەلىك، تاعى دا جول بەرەسىز بە؟

- ءيا، ول جىلى جول بەرگەنىم راس. شىنى كەرەك، ول كەزدە ۇلان ماعان قاراعاندا بابىندا بولدى. ونىڭ ۇستىنە، قازاقى تاربيە الىپ وسكەندىكتەن، اعامنىڭ جولى ۇلكەن ەكەنىن ءتۇسىندىم. سوندىقتان، وعان جولىمدى بەردىم. باپكەرلەرىم دە وسىنداي شەشىمگە كەلدى. باعىنا قاراي، سول تۋرنيردە اعام «تۇڭعىش «قازاقستان بارىسى» دەگەن اتقا قول جەتكىزدى. ەندى، بيىل تاعى دا جولىمىز ءتۇيىسىپ جاتسا نە ىستەيتىنىمىزدى بىلمەيمىن. ونىڭ ۇستىنە مەن الماتى قالاسىنىڭ اتىنان سىنعا تۇسسەم، ول الماتى وبلىسىنىڭ نامىسىن قورعايدى. بۇيىرتقانىن كورەمىز. فينالدا جولىعىپ جاتساق، مەنىڭ ءوز تۇسىندا جاساعان ىنىلىك قۇرمەتىمدى بۇل جولى اعالىق ىزەتىمەن قايتاراتىن شىعار دەپ ويلاپ قويامىن (كۇلدى).

- وسىعان دەيىن ەكەۋىڭىز دە  قىزىلوردا وبلىسىنىڭ نامىسىن قورعاپ كەلدىڭىزدەر، نەگە بيىل ءبىرىڭىز الماتى قالاسىنا، ەكىنشىڭىز الماتى وبلىسىنا اۋىسىپ كەتتىڭىزدەر؟

- سىر ءوڭىرى قاشاندا ءبىز ءۇشىن ىستىق. تالاي تۇلعالاردى، تالاي چەمپيونداردى تۋدىرعان ءوڭىر. ءبىز سپورتتا ۇلكەن جەتىستىكتەرگە وسى وڭىردە ءجۇرىپ قول جەتكىزدىك. الايدا اعام ەكەۋىمىز الماتى وبلىسىنىڭ تۋمالارىمىز. قازىر سىر وڭىرىندە مىقتى-مىقتى بالۋاندار ءوسىپ كەلەدى. سول جاس بالۋانداردىڭ جولىن بوگەمەي، ولارعا دا مۇمكىندىك بەرەيىك دەگەن ويمەن بۇرىنعى تۋعان ولكەمىزدىڭ تۋىنىڭ استىنا قايتا ورالدىق.

- اڭگىمەڭىزگە راحمەت! تەك ساتتىلىك جولداس بولسىن.

اۆتور: كۇنسۇلتان وتارباي