نىعماتۋلين: بيۋدجەت قارجىسىنا قاتىستى قۋلىق ارەكەتتەردى دوعارۋ كەرەك
اتاپ ايتقاندا، بۇگىن ءماجىلىستىڭ جالپى وتىرىسىندا 2016 -جىلعى رەسپۋبليكالىق بيۋدجەتتىڭ اتقارىلۋى تۋرالى ەسەپتەردى تالقىلاۋ بارىسىندا مەملەكەتتىڭ قاراجاتىن ءتيىمدى يگەرۋدىڭ جاۋاپكەرشىلىگى ماسەلەسى كوتەرىلدى، ن. نىعماتۋليننىڭ اتاپ وتۋىنشە، كەيبىر كۆازيمەملەكەتتىك سەكتوردىڭ سۋبەكتىلەرى ءوز شوتتارىندا قوماقتى قارجى بولا تۇرا، الداعى قارجىلىق جىلعا الاتىن بيۋدجەتتىك قارجىنىڭ كولەمىن ساقتاپ قالۋ ءۇشىن قوسىمشا ميللياردتاعان سومانى سۇراۋدى جالعاستىرۋدا.
سونىمەن قاتار مەملەكەتتىك ورگاندار ولارعا قولداۋ جاساۋدا.
«مەملەكەتتىك قارجىنى اۋدارعانى ءۇشىن ەشقانداي جاۋاپكەرشىلىك بولماي تۇر. وسى ورايدا بيۋدجەتتىك قارجىعا قاتىستى ايلا- شارعى جاساۋدى دوعارۋ كەرەك. ياعني جىل سوڭىنا قاراي بۇل قاراجاتتىڭ يگەرىلمەۋ قاۋپى تۋىنداعاندا وسى جۇمسالماعان قارجىنى كۆازيمەملەكەتتىك سەكتوردىڭ شوتىنا اۋدارۋ نەمەسە ۇلتتىق كومپانيالاردىڭ ەنشىلەس ۇيىمدارىنىڭ جارعىلىقتى كاپيتالىن تولتىرۋعا باعىتتاۋ باستالادى»، - دەپ ەسكەرتتى ن. نىعماتۋلين.
ءسوز سوڭىندا ءماجىلىس ءتوراعاسى قاراستىرىلعان قارجى شىن مانىندە ەلدىڭ ەكونوميكاسىنا جۇمىس ىستەۋى ءۇشىن كۆازيمەملەكەتتىك سەكتوردى قارجىلاندىرۋ تەتىگىن وزگەرتۋدى جانە بيۋدجەتتىك باعدارلامالار اكىمشىلەرىنىڭ جاۋاپكەرشىلىگىن ارتتىرۋدى قامتيتىن قادامداردى پىسىقتاۋ كەرەكتىگىن اتاپ ءوتتى.
اۆتور: رۋسلان عابباسوۆ
