ءۇرىمجى- الماتى- استانا پويىز مارشرۋتى ىسكە قوسىلادى

 استانا. قازاقپارات - اعىمداعى جىل قازاقستانداعى قىتاي تۋريزمى جىلى دەپ اتالعانى بەلگىلى. ال وسى اۋقىمدى شارا ەكى ەل ءۇشىن قانشالىقتى تابىستى بولماق؟ بۇل ماسەلە بەيجىڭدە وتكەن تۋريزم سالاسىنداعى ىنتىماقتاستىق بويىنشا قازاقستان -  قىتاي تۋريستىك فورۋمىندا تالقىلاندى.

وعان 50 دەن استام وتاندىق تۋروپەراتور مەن قىتايدىڭ 300 گە جۋىق كومپانياسى قاتىستى.

دەن حايحۋن قازاقستاننىڭ تاڭعاجايىپ تابيعاتى مەن تازا اۋاسى تۋريستەر ءۇشىن تاپتىرماس ورىن دەپ تامسانادى. جەرگىلىكتى تۋريستىك كومپانيا وكىلى ساياحاتتاۋشىلاردى نەگىزىنەن ەكوتۋريزممەن قىزىقتىراتىنىن ايتادى. ويتكەنى قازىر قىتايلار ءۇشىن تامىلجىعان تابيعات قانا ەمەس، ساف تازا اۋامەن تىنىستاۋ وتە ماڭىزدى. سوندىقتان بيىل قازاقستانداعى قىتايدىڭ تۋريزم جىلىن پايدالانىپ، بارىنشا ناسيحات جۇمىستارىن جۇرگىزىپ جاتىر.

 دەن حايحۋن، قىتايلىق تۋريستىك كومپانيا وكىلى:

 -  بيىل ەكى ەلدىڭ تۋريزم سالاسىنا سەرپىن اكەلگەن تابىستى جىل بولادى دەپ سەنەمىن. عاجايىپ تابيعات قانا ەمەس، استانادا وتەتىن ەحرو كورمەسى دە قىتايلىق تۋريستەردىڭ نەگىزگى تاڭداۋى بولارى انىق. بۇگىنگە دەيىن ءبىز الەۋمەتتىك جەلىدە، اقپارات قۇرالدارىندا قازاقستاندى تانىستىرۋ جۇمىستارىن جۇرگىزدىك. قازىر تۋريستىك ۆيزا اشىپ، استاناعا العاشقى توپتى جىبەرسەك دەپ وتىرمىز.

 دەن حايحۋن بەيجىڭدەگى قازاق- قىتاي تۋريستىك فورۋمى ەكى ەلدىڭ وسى سالاداعى ىنتىماقتاستىعىن نىعايتا تۇسەتىنەن سەنەدى. بۇگىنگى شارادان استانا حالىقارالىق كورمەسى تۋرالى مول اقپارات الدىم دەيدى. قىتايداعى قازاقستان ەلشىلىگىنىڭ كونسۋلدىق قىزمەتى EXPO قارساڭىندا كۇشەيتىلگەن جۇمىس تارتىبىنە كوشكەن. قۇجاتتاردى قابىلدايتىن تەرەزە مەن قىزمەتكەرلەر سانىن ارتتى. ەلەكتروندى كەزەك پەن تولەم قابىلدايتىن تەرمينالدار ورناتىلدى.

نۇرالى بوكەيحانوۆ، «اتامەكەن» ۇلتتىق كاسىپكەرلەر پالاتاسى ءتوراعاسىنىڭ ورىنباسارى:

 -  ارينە، بىزدە دامىتاتىن جەرلەرىمىز وتە كوپ. ءبىراق مەنىڭ ويىمشا، ءبىزدىڭ كومپانيالار دايىن. ويتكەنى ءوزىڭىز كورىپ تۇرعانداي، قازاقستاننان 50 دەن استام كومپانيا كەلىپ وتىر. بارلىعى قىتاي تۋريستەرىمەن جۇمىس ىستەۋگە دايىن جانە وزدەرىنىڭ ۇسىناتىن بەلگىلى ءبىر تۋرپاكەتتەرى بار.

 قازاقستان قىتايلىق تۋريستەر ءۇشىن استانا مەن الماتىدا 72 ساعات ۆيزاسىز رەجيم جۇيەسىن ەنگىزۋى مۇمكىن. ياعني قازاق جەرى ارقىلى ترانزيتپەن وزگە ەلگە ۇشىپ كەتەدى نەمەسە وسى ۋاقىت ارالىعىندا بۋراباي، قاپشاعاي سياقتى ويىن- ساۋىق ورتالىقتارىنا بارىپ ۇلگەرەدى.

 لي شيحۋن، قىتايدىڭ تۋريزم ىستەر جونىندەگى مەملەكەتتىك باسقارما باسشىسىنىڭ ورىنباسارى:

 -  مۇنداي فورۋمدار ەكى ەلدىڭ وسى سالاداعى ارىپتەستىگىنە سەرپىن بەرەدى. سونىمەن قاتار قازاقستاننىڭ مادەنيەت جانە تۋريزم ۆيتسە- ءمينيسترىنىڭ فورۋمعا قاتىسۋى، ونىڭ ماڭىزدىلىعىن ارتتىرا ءتۇستى. وسىنداي جيىن ارقىلى ەكى ەلدىڭ تۋريزم سالاسىنداعى ارىپتەستىگىن تاعى ءبىر ساتىعا كوتەرەمىز دەپ سەنەمىن.

قازىر قازاقستان مەن قىتاي قالالارىنا اپتاسىنا 42 اۋە رەيس قاتىنايدى. تاياۋدا ءۇرىمجى- الماتى- استانا جانە كەرى باعىتتاعى پويىز مارشرۋتى ىسكە قوسىلادى. بۇل EXPO- عا باراتىن تۋريستەر ءۇشىن ىڭعايلى بولىپ وتىر.

 اۆتورى: ن. بەكەن

www.24.kz