استانادا ەلباسىنىڭ قىتاي تىلىنە اۋدارىلعان جيناعى تانىستىرىلدى
تانىستىرىلىم اياسىندا جيناقتىڭ 50 داناسى ەلباسى كىتاپحاناسىنا تارتۋ ەتىلدى. جيناقتى قىتاي الەۋمەتتىك عىلىمدار اكادەمياسى (بەيجىڭ قالاسى) قىتاي تىلىنە اۋدارعان جانە باسپادان شىعارۋ جۇمىستارىمەن اينالىسقان.
تانىستىرىلىم بارىسىندا پرەزيدەنت كەڭسەسى باسشىسىنىڭ ورىنباسارى باقىتجان تەمىربولات ق ح ر قوعامدىق عىلىمدار اكادەمياسىنىڭ قۇرىلعانىنا 40 جىل تولعان مەرەيتويىمەن قۇتتىقتادى.
«مۇنداي اتاۋلى مەرەيتوي 17- مامىر كۇنى تويلاندى. مەرەيتويعا قاتىستى ق ح ر ءتوراعاسى شي جينپيڭنىڭ قۇتتىقتاۋىنان-اق اكادەميانىڭ بەدەلىن باعامداۋعا بولادى. اكادەميانىڭ زەرتتەمەلەرى مەن باسىلىمدارى قىتايدا عانا ەمەس، شەت مەملەكەتتەردە دە تانىمال. ءوز كەزەگىندە، ءۇش جىل بۇرىن عانا قۇرىلعان ق ر تۇڭعىش پرەزيدەنتىنىڭ كىتاپحاناسى از ۋاقىتتا كىتاپحانا، مۋزەي، ارحيۆ، مادەني-گۋمانيتارلىق، ءبىلىم بەرۋ جانە تالداۋ قىزمەتتەرىن اتقاراتىن ءىرى ورتالىققا اينالدى. كەشە وسىندا ق ح ر ءتوراعاسى شي جينپيڭنىڭ مەملەكەتتىك باسقارۋ تۋرالى كىتابى قازاق تىلىندە جارىق كوردى»، - دەپ حابارلادى ول.
تۇساۋكەسەرگە ارنايى كەلگەن قىتاي الەۋمەتتىك عىلىمدار اكادەمياسىنىڭ پرەزيدەنتى ۆان ۆەيگۋان جيناققا قۇندى دەرەكتەر ەنگەنىن اتاپ ءوتتى.
«بارلىق قاتىسۋشىلاردى جيناقتىڭ جارىق كورۋىمەن قۇتتىقتايمىن. بۇل كىتاپتا قازاقستان پرەزيدەنتىنىڭ مەملەكەتتى باسقارۋ تۇجىرىمدامالارى، ماقساتتارى مەن جۇمىس مانەرى تۋراسىندا وتە قۇندى قۇجاتتار جيناقتالعان. بۇل كىتاپپەن تانىسۋ ارقىلى پرەزيدەنت نازاربايەۆتىڭ الەمدىك دەڭگەيدەگى ساياساتكەر عانا ەمەس، ۇلت كوشباسشىسى اتاعىنا شىن مانىندە لايىق فيلوسوف، دانىشپان ەكەنىن كورەمىز»، - دەدى ۆان ۆەيگۋان.
جيناق ق ر پرەزيدەنتى كەڭسەسىنىڭ قولداۋىمەن دايىندالعان. وعان الەم جۇرتشىلىعى قىزىعۋشىلىق تانىتقان ەلباسىنىڭ باستامالارى، جولداۋلارى جانە ماقالالارى ەنگەن.
ايتا كەتەيىك، 7-10- ماۋسىم كۇندەرى قازاقستانعا ق ح ر ءتوراعاسى شي جينپيڭ مەملەكەتتىك ساپارمەن كەلەدى جانە شاڭحاي ىنتىماقتاستىق ۇيىمىنىڭ (ش ى ۇ) سامميتى مەن «استانا ەكسپو-2017» حالىقارالىق كورمەسىنىڭ اشىلۋ سالتاناتىنا قاتىسادى.
اۆتور: ايجان سەرىكجان قىزى
