قىزدار ۋنيۆەرسيتەتى جازعى دايىندىق مەكتەبىن بيىل دا جالعاستىرادى
دەپ حابارلايدى قازاقپارات.
اتالعان ءبىلىم ورداسىنىڭ حابارلاۋىنشا، جازعى مەكتەپتى ۇيىمداستىرۋداعى باستى ماقسات - الماتى وبلىسىنىڭ شالعاي اۋداندارىنداعى الەۋمەتتىك جاعدايى تومەن وتباسىلاردىڭ 10 - سىنىپتى اياقتاپ، 11- سىنىپقا كوشكەن وقۋشى قىزدارىن ۇ ب ت- نىڭ جاڭا فورماتىمەن مىندەتتى جانە تاڭداۋ پاندەرى بويىنشا دايىنداۋ.
ەسكە سالا كەتەيىك، «جازعى دايىندىق مەكتەبى» اتتى الەۋمەتتىك جوبا وتكەن 2016 -جىلى العاش رەت الماتى وبلىسى اكىمى ا. باتالوۆتىڭ قولداۋىمەن باستاۋ الىپ، الماتى وبلىسىنداعى الەۋمەتتىك جاعدايى تومەن وتباسىلاردىڭ قىزدارىنا ارنالىپ، قولداۋ كورسەتۋ ماقساتىندا ۇيىمداستىرىلعان ەدى. وتكەن جىلى بۇل جوبا بويىنشا جازعى مەكتەپتە 86 وقۋشى قىز ءبىلىم السا، بيىلعى جىلى 200-دەن استام وقۋشى قىز قاتىسۋعا نيەت ءبىلدىرىپ، تىركەلىپ وتىر. تىركەۋ ەلەكتروندى تۇردە 29 - مامىرعا دەيىن جۇرگىزىلدى.
جازعى دايىندىق مەكتەبىنە جەتىم، جارتىلاي جەتىم، كوپبالالى وتباسى، اتا- اناسى مۇگەدەك، اۋىل مەكتەبىنىڭ وقۋشىلارى قابىلداندى. ءوتىنىش بىلدىرۋشىلەردىڭ باسىم بولىگى - الماتى قالاسىنىڭ جانە وبلىسىنىڭ وقۋشىلارى. وقۋشىلارعا ءبىر اي بويى ۋنيۆەرسيتەتتىڭ بىلىكتى وقىتۋشى- پروفەسسورلار قۇرامى ساباق بەرەپ، بىلىمدەرىن شىڭدايتىن بولادى. وقۋ كۋرسى اياسىندا قىزداردى اسەم قالا الماتىنىڭ كورىكتى جەرلەرىن ارالاتۋ، ۋنيۆەرسيتەت ىشىلىك نەبىر قىزىقتى ءىس- شارالارعا قاتىستىرۋ، تەاترلار مەن قالانىڭ ءتۇرلى مادەني شارالارىنا اپارۋ كوزدەلگەن. وقۋ ورنىنداعى التى فاكۋلتەت بويىنشا ءار كۇنگە «اشىق ەسىك» كۇنىن دە وتكىزۋ جوسپارلانۋدا. سونىمەن قاتار، قىزدار ءۇشىن الماتى قالاسىنداعى ءىرى جوعارى وقۋ ورىندارىنىڭ (ءال- فارابي اتىنداعى قازۇۋ، س. اسفەندياروۆ اتىنداعى مەديتسينالىق ۋنيۆەرسيتەت، ت. جۇرگەنوۆ اتىنداعى ونەر اكادەمياسى جانە ت. ب.) تىنىس- تىرشىلىگىمەن تانىستىرۋ ەكسكۋرسياسى ۇيىمداستىرىلادى. ماۋسىم ايىنىڭ سوڭىنا دەيىن جالعاساتىن وقۋ تەگىن جۇرگىزىلەتىن بولادى. مەكتەپ وقۋشىلارىنا قىزدار ۋنيۆەرسيتەتىنىڭ جاتاقحاناسىنان تەگىن ورىن دا قاراستىرىلعان. وقۋ بارىسىندا قىزدار ۋنيۆەرسيتەتكە قاراستى عىلىمي كىتاپحانانى، «اققۋ» باسسەينى مەن ترەناجەر زالدارىن دا قولدانۋعا مۇمكىندىك الادى.
اۆتور: مارلان جيەمباي
