ەلوردادا «كورىكتى قازاقستان - كوركەم قىتاي» فوتو كورمەسى اشىلدى-فوتو
«بيىل قازاقستان مەن قىتاي حالىق رەسپۋبليكاسى ءۇشىن ماڭىزدى جىل دەپ ەسەپتەيمىز. سەبەبى، بىرىنشىدەن، ەكى ەلدىڭ اراسىنداعى ديپلوماتيالىق قارىم- قاتىناستىڭ ورناعانىنا 25 جىل تولىپ وتىر. ەكىنشىدەن، بيىل قىتايدىڭ قازاقستانداعى تۋريزم جىلى. بۇل فوتو كورمە سول تۋرزيم جىلىنا دا ارنالعان. ويتكەنى، وسى فوتو كورمەگە كەلگەن كورەرمەندەر قازاقستان مەن قىتايدىڭ كورىكتى جەرلەرىن تاماشالاپ، سول جەرلەرگە بارعىلارى كەلەتىن بولادى. ۇشىنشىدەن، ەندى ساناۋلى كۇننەن كەيىن استانادا ەكسپو-2017 حالىقارالىق كورمەسى ءوز جۇمىسىن باستايدى. تورتىنشىدەن، ىنتىماقتاستىقتىڭ جاڭا دەڭگەيى ول - «ءبىر بەلدەۋ - ءبىر جول» جانە «نۇرلى جول» باعدارلامالارى»، - دەدى فوتو كورمەنىڭ اشىلۋىندا ءسوز سويلەگەن اسقار وماروۆ.
سونىمەن قاتار قازاقپارات باسشىسى 2013 -جىلى قىتاي كوشباسشىسى شي جينپيڭ استاناعا كەلگەن رەسمي ساپارى بارىسىندا نازاربايەۆ ۋنيۆەرسيتەتىندە ءدارىس وقىپ، العاش رەت «جىبەك جولى» ەكونوميكالىق بەلدەۋىن جۇزەگە اسىرۋ باستاماسىن الەم نازارىنا ۇسىنعانىن اتاپ ءوتتى.
«سول كەزدەن باستاپ ءبىزدىڭ لوگيستيكالىق- ەكونوميكالىق قارىم- قاتىناسىمىز كۇشەيىپ جاتىر. جاقىندا عانا بەيجىڭدە وتكەن «بەلدەۋ جانە جول» اتتى حالىقارالىق ىنتىماقتاستىق فورۋمىنا قاتىسقان ەلباسىمىز نۇرسۇلتان نازاربايەۆ ونىڭ اياسىندا شي جينپيڭمەن كەزدەسكەن بولاتىن. سوندا ەلباسىمىز: «قازاقستان مەن قىتاي اراسىنداعى ەكىجاقتى جانە كوپجاقتى ىنتىماقتاستىق ۇلگى الارلىقتاي بولدى. باسقا ەلدەر بىزدەن ۇيرەنە بەرسىن» دەگەن ەدى. سوندىقتان بۇل فوتو كورمە ءبىزدىڭ ەلدەرىمىزدىڭ مادەني، اقپاراتتىق جانە كوركەمدىك قارىم- قاتىناسىن بىلدىرەدى. وسى ورايدا «بارىس- كەلىس بولماسا، دوستىقتان قادىر بولمايدى» دەگەن قىتاي دانالىعىن ەسكە سالعىم كەلەدى. «قازاقتا دا «الىس تۋىسقاننان كورشى جاقىن» دەگەن ماقال بار. قازىرگى ۋاقىتتا قىتاي حالىق رەسپۋبليكاسىمەن قارىم- قاتىناسىمىز كۇشەيىپ جاتىر»، - دەدى ول.
ق ح ر ادەبي تۋىندىلاردىڭ شەت تىلدەرىندە باسىلۋى جانە تارالۋى جونىندەگى باسقارماسى باستىعىنىڭ ورىنباسارى فاڭ جىڭ حۋاي قىتاي مەن قازاقستاننىڭ دوستىق قارىم- قاتىناسىنىڭ دامۋ تاريحىندا كوپتەگەن ايرىقشا وقيعالاردىڭ ورىن العاندىعىن ەسكە سالىپ ءوتتى. سونىمەن قاتار ول بۇگىنگى كورمەگە ەكى ەلدىڭ تالاناتتى فوتوگرافتارى تۇسىرگەن بىرەگەي سۋرەتتەر قويىلعاندىعىن جانە ولار قىتاي مەن قازاقستان حالىقتارىنىڭ دوستىعىن نىعايتا تۇسەتىندىگىن باسا ايتتى.
«كورىكتى قازاقستان - كوركەم قىتاي» فوتو كورمەسى مەن وسى اتتاس فوتوالبوم ەكى جىبەك جولىنىڭ ومىردە جۇزەگە اسۋىنىڭ جارقىن ناتيجەسى سانالادى. ءبىز 2016 -جىلى «قازاقپارات» حالىقارالىق اقپارات اگەنتتىگىمەن ىنتىماقتاستىق تۋرالى كەلىسىمگە قول قويعان ەدىك. اتالعان قۇجاتقا سايكەس تاراپتار «كورىكتى قازاقستان - كوركەم قىتاي» بىرلەسكەن فوتوالبومىن شىعارۋى ءتيىس ەدى. بۇگىن مىنە سول كەلىسىمنىڭ ناتيجەسىن كورىپ وتىرمىز»، - دەدى فان جىڭ حۋاي.
اۆتور: مارلان جيەمباي
