جۇمىسقا قابىلەتتى ازاماتتار ەڭبەك ەتپەسە، الەۋمەتتىك كومەك تولەنبەيدى - مينيستر دۇيسەنوۆا
ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆانىڭ ايتۋىنشا، جاڭا فورمات اياسىندا كوپبالالى جانە از قامتىلعان وتباسىلارعا بەرىلەتىن ءۇش ءتۇرلى جاردەماقىلار بىرىكتىرىلەدى. سونىڭ بارلىعى ءبىر اتاۋلى الەۋمەتتىك كومەك رەتىندە بەرىلەتىن بولادى. حالىق قۇجات ماشاقاتىنان دا قۇتىلادى. ءۇش جەرگە قۇجات اپارۋدىڭ قاجەتى جوق. ءبارىن جۇمىسپەن قامتۋ ورتالىعىنا تاپسىرۋعا بولادى.
«سوسىن بۇگىندە ءۇش جاردەماقىنىڭ جالپى سوماسى از قامتىلعان وتباسىنىڭ ءاربىر مۇشەسىنە اي سايىن 6396 تەڭگەنى قۇراپ وتىر. ال جاڭا جۇيەدە كۇنكورىس دەڭگەيىنىڭ 40 پايىزدان 50-گە كوتەرىلۋىنە بايلانىستى ءاربىر جان باسىنا قوسىمشا بەرىلەتىن كومەكتىڭ سوماسى شامامەن 2500 تەڭگەگە ارتقالى وتىر. وسىنىڭ ناتيجەسىندە اتاۋلى جاردەماقىنىڭ مولشەرى ورتاشا ەسەپپەن قازىر بەرىلىپ جۇرگەن ءۇش جاردەماقىدان 25 پايىزعا ارتىق بولادى. ول ءۇشىن كەلەسى جىلعى بيۋدجەتتە 42,8 ميلليارد تەڭگە قاراستىرىلعان»، - دەيدى دۇيسەنوۆا. ءمينيستردىڭ سوزىنە قاراعاندا، جاڭا فورماتتاعى اتاۋلى الەۋمەتتىك كومەكتىڭ وزىندىك شارتتارى دا بار. وتباسىدا ەڭبەككە قابىلەتتى ازاماتتاردىڭ بارلىعى جۇمىسپەن قامتۋ شارالارىنا (مەملەكەتتىك باعدارلامالار اياسىندا وقىتۋ، كاسىبي بىلىكتىلىكتى ارتتىرۋ، جۇمىسقا تۇرۋ، كاسىپ اشۋ شارالارىنا - اۆت. ) قاتىسۋى شارت. ەگەر ونداي ادامدار جۇمىسپەن قامتۋ شارالارىنان باس تارتسا، وندا اتاۋلى الەۋمەتتىك كومەك تاعايىندالمايدى.
«الايدا كامەلەتتىك جاسقا تولماعان بالالارعا، بالا كۇتىمىمەن وتىرعان انالارعا، ناقتى سەبەپتەرگە بايلانىستى جۇمىس ىستەي المايتىندارعا الەۋمەتتىك كومەك ەشبىر شارتسىز تاعايىندالىپ، تولەنەتىن بولادى»، - دەپ اتاپ كورسەتتى دۇيسەنوۆا.
اۆتور: ارمان اسقاروۆ
