ق ر پرەزيدەنتىنىڭ كۋبوگى: لەۆيت كورەيلىك قارسىلاسىن جەڭدى

استانا. قازاقپارات - ەلوردادا باستالعان قازاقستان پرەزيدەنتى كۋبوگى ءۇشىن بوكستان حالىقارالىق تۋرنيردە ۆاسيلي لەۆيت ءبىرىنشى قارسىلاسىن جەڭدى.

بۇل جايىندا ق ر بوكس فەدەراتسياسىنان ءمالىم ەتتى، دەپ حابارلايدى قازاقپارات.

«بۇگىن ۆاسيلي لەۆيت ازيا چەمپيوناتىنا قاتىسقان وڭتۇستىك كورەيا بوكسشىسى ينك كيممەن شارشى الاڭدا كەزدەسىپ، تۋرنيردەگى ءبىرىنشى جەڭىسىنە قول جەتكىزدى»، - دەلىنگەن فەدەراتسيا حابارلاماسىندا.

ايتا كەتەرلىگى، بايراقتى باسەكەگە قازاقستان، يران، ءۇندىستان، رەسەي، موڭعوليا، فيليپپين، وزبەكستان، قىرعىزستان، ۋكراينا جانە كورەيا بىلعارى قولعاپ شەبەرلەرى قاتىسۋدا.

ەرلەردەن 82 جانە قىزدار 31 بوكسشى چەمپيوندىق اتاق پەن كۋبوك يگەرى اتانۋى ءۇشىن شارشى الاڭدا جۇدىرىقتاساتىن بولادى.

ايتا كەتەرلىگى، ءبىرىنشى ورىن العان بوكسشى 2 مىڭ، ەكىنشى ورىن العانى 1 مىڭ جانە ءۇشىنشى ورىن العانى 500 دوللار سىياقى الادى.

پرەزيدەنت كۋبوگىندا قازاقستان اتىنان 3 قۇراما قاتىسۋدا. ەرلەر كومانداسىندا 43 سپورتشى بار. ونىڭ 19 ى ۇلتتىق قۇرامانىڭ مۇشەسى، 16 سى وڭىرلەردىڭ بىلعارى قولعاپ شەبەرى جانە استانا ارلاندارى كلۋبىنىڭ 8 بوكسشىسى.

قىزدار قۇراماسى ساپىندا ۇلتتىق قۇرامانىڭ 13 جانە وڭىرلەردىڭ 16 بىلعارى قولعاپ شەبەرلەرى ەل نامىسىن قورعايدى.

فينالدىق كەزدەسۋلەر 10- ماۋسىمدا وتەدى.

اۆتور: مارلان جيەمباي