پروكۋرور «قورعاستاعى» قاندى وقيعانىڭ جاي-جاپسارىن بايانداپ بەردى - كەسكىن

تالدىقورعان. قازاقپارات - الماتى وبلىسىنداعى «قورعاس» شەكارا ماڭى ىنتىماقتاستىق حالىقارالىق ورتالىعىنىڭ اۋماعىندا بولعان جايتتىڭ جاي-جاپسارىن پانفيلوۆ اۋدانىنىڭ پروكۋرورى ايدىن تورەبەكوۆ بايانداپ بەردى.

ونىڭ ايتۋىنشا، كۇدىكتى دە جاراقات العان، دەپ حابارلايدى قازاقپارات ءتىلشىسى.

اۋدان پروكۋرورى ا. تورەبەكوۆتىڭ سوزىنشە، 4- ماۋسىم كۇنى ساعات 15:00 دە كەۋدەسىنىڭ سول جاق تۇسىنان جاراقات العان ق. تولەگەنوۆتىڭ دەنەسى پانفيلوۆ اۋداندىق ورتالىق اۋرۋحاناسىنا جەتكىزىلدى.

پانفيلوۆ اۋدانىنىڭ تۇرعىنى اۋرۋحاناعا جەتكەنشە جان تاپسىرعان. ول قورعاس ش ح ى و اۋماعىندا 1995-جىلى تۋعان د. كارىپجانوۆپەن ەرەگەسىپ، كارىپجانوۆ تولەگەنوۆتىڭ كەۋدە تۇسىنا پىشاق سالعان.

وقيعادان كەيىن كۇدىكتى كارىپجانوۆ قاماۋعا الىندى. قاماۋعا الۋ كەزىندە د. كارىپجانوۆتىڭ وڭ جامباسىندا اشىق دەنە جاراقاتى بولدى. ونىڭ ايتۋىنشا، ول وسى قاقتىعىس كەزىندە جارالانعان.

بۇل فاكتى ق ر ق ك 99-بابى ءبىرىنشى تارماعى بويىنشا سوتقا دەيىنگى تەرگەۋدىڭ ءبىرىڭعاي تىزىلىمىنە تىركەلدى. قازىرگى تاڭدا بارلىق تەرگەۋ جۇمىستارى ءجۇرىپ جاتىر، دەپ مالىمدەدى اۋدان پروكۋرورى.

قوس ازاماتتىڭ بۇعان دەيىن تانىس ەكەندىكتەرى دە بەلگىلى بولدى. ولار قورعاس ش ح ى و اۋماعىندا ساۋداگەرلەردىڭ جۇگىن تاسىمالداپ، قىزمەتتەرىن كورسەتىپ، ناپاقالارىن تاۋىپ جۇرگەن.