ەكسپوعا كەلەتىن تۋريستەر استانادان شالعاي وڭىرلەرگە ساياحاتتاۋعا قۇلىقتى ەمەس
بۇل جايىندا ۇكىمەتتە وتكەن باسپا ءسوز ءماسليحاتىندا ق ر ۇلتتىق ەكونوميكا ءبىرىنشى ۆيتسە-ءمينيسترى رۋسلان دالەنوۆ ءمالىم ەتتى، دەپ حابارلايدى قازاقپارات.
«ءبىز الداعى ۋاقىتتا ەكسپوعا كەلۋشىلەر جايىندا مالىمەتتەر جيناستىرۋدامىز. بارلىق شەتەلدىك تۋريستەردەن ءىشىنارا ساۋالناما الدىق. ءىشىنارا 14 مىڭ ادامعا ساۋالناما جۇرگىزدىك. ولاردان اۋەجايلاردا، ۆوكزالداردا، اۆتوستانسالاردا جالپى شەتەلدىك تۋريستەر جۇرەتىن بارلىق جەردە سۇرادىق. بارلىق تۋريستەردىڭ 91 پايىزى كورمە جايىندا بىلەدى جانە ۇشتەن ەكىسى وعان بارۋعا دايىن»، - دەدى ول.
ونىڭ ايتۋىنشا، شەتەلدىكتەردىڭ باسىم بولىگى قوناق ۇيلەرگە ورنالاسىپ، شارالارعا بارۋدى جانە استانادا كەمىندە 2 كۇن بولۋدى جوسپارلاۋدا. «شەتەلدىكتەردىڭ ءبىرازى عانا استاناعا جاقىن اۋداندارعا، بۋرابايعا باراتىندىعىن، ودان دا ازى اقمولا مەن قاراعاندى وبلىستارىنا ساپارلايتىندىقتارىن ايتتى. استانادان شالعاي وڭىرلەرگە بارعىسى كەلەتىندەر تىم از»، - دەدى دالەنوۆ.
سونىمەن قاتار ءبىرىنشى ۆيتسە-مينيستر وتاندىق تۋريستەرگە قاتىستى دەرەكتەرمەن ءبولىستى. «ەكسپوعا قاتىستى وتانداستارىمىزدان دا ساۋالناما الدىق. 21 مىڭ ءۇي، پاتەردە ساۋالناما جۇرگىزىلدى. زەرتتەۋ ناتيجەسىندە ساۋالناما قاتىسۋشىلاردىڭ بارلىعى دا كورمە جايىندا بىلەدى. 40 پايىز وعان بارۋعا، 68 پايىزى بيلەت ساتىپ الۋعا دايىن ەكەندىگىن ءبىلدىردى. ولاردىڭ باسىم بولىگى تۋعان-تۋستارىنىڭ نەمەسە تانىستارىنىڭ ۇيلەرىنە توقتايتىندىقتارىن، كەمىندە 2 كۇن بولاتىندىقتارىن ايتۋدا»، - دەدى ول.
اۆتور: مارلان جيەمباي
