قازاقستاندا قىزدار مەن ۇلدارعا ءجيى قويىلاتىن ەسىمدەر بەلگىلى بولدى

استانا. قازاقپارات - ۇكىمەتتە وتكەن باسپا ءسوز ءماسليحاتىندا ق ر ۇلتتىق ەكونوميكا ءبىرىنشى ۆيتسە- ءمينيسترى رۋسلان دالەنوۆ ەلىمىزدە قىزدار مەن ۇلدارعا ءجيى قويىلاتىن ەسىمدەردى اتادى، دەپ حابارلايدى قازاقپارات.

  «بالا تۋۋ كورسەتكىشى ماڭعىستاۋ وبلىسىندا ەڭ جوعارى. بۇل وڭىردە مىڭ تۇرعىنعا شاققاندا 31 ادامنان كەلەدى. ال تۋۋ كورسەتكىشىنىڭ ەڭ تومەن دەڭگەيى سولتۇستىك قازاقستان وبلىسىندا بايقالادى. وبلىستا مىڭ تۇرعىنعا شاققاندا 14 ادام»، - دەدى ءبىرىنشى ۆيتسە- مينيستر.

ونىڭ دەرەگىنشە، 2016 -جىلى 400 مىڭ ءسابي دۇنيەگە كەلسە، ونىڭ 207 مىڭى ۇل، 193 مىڭى قىز بالا.

 «ەر بالالار ءجيى ومىرگە كەلەدى. 2017 -جىلدىڭ ءساۋىرى مەن وتكەن ايدا 29 مىڭ ءسابي دۇنيەگە كەلدى. ونىڭ 15 مىڭ ۇل، 14 مىڭعا جۋىعى قىز بالا. 2017 -جىلدىڭ ساۋىرىندە قىزدار اراسىنداعى ەڭ تانىمال ەسىمدەر قاتارىندا ايزەرە دەگەن ات بولدى. بۇل ەسىم 437 قىزعا بەرىلگەن. ودان كەيىن ايارۋ 398 بالاعا بەرىلدى. رايانا ەسىمى دە تانىمال بولىپ كەلەدى. ءانشىنىڭ قۇرمەتىنە وراي بەرىلىپ جاتقان شىعار. بۇل ەسىمدى 319 قىز يەلەندى. ۇلدار اراسىندا 279 بالاعا ءاليحان، 260 بالاعا ايسۇلتان جانە 217 بالاعا نۇريسلام ەسىمدەرى بەرىلگەن»، - دەدى دالەنوۆ.

اۆتور: مارلان جيەمباي