شي جينپيڭنىڭ قازاق تىلىندەگى «ەل باسقارۋ جونىندە» اتتى كىتابى تانىستىرىلدى
«ق ح ر ءتوراعاسى شي جينپيڭنىڭ قازاق تىلىندە جارىق كورگەن «ەل باسقارۋ جونىندە» كىتابىنىڭ تۇساۋكەسەرى ەكى ەلدىڭ اراسىنداعى ديپلوماتيالىق قارىم- قاتىناستاردىڭ ورناۋىنىڭ 25 جىلدىعى تۇسىندا ءوتىپ وتىرۋىنىڭ تەرەڭ سيمۆولدىق ءمانى بار دەپ ويلايمىن.
وسى جىلداردا ەكىجاقتى قارىم- قاتىناستار ءوزارا ۇدايى سەنىمدى ءار كونسترۋكتيۆتى جاعدايدا دامىپ كەلەدى. قىتاي قازاقستاننىڭ ستراتەگيالىق وداقتاسى ءارى باستى ساۋدا- ەكونوميكالىق سەرىكتەستەرىنىڭ ءبىرى بولىپ تابىلادى. قازىرگى تاڭدا قازاقستان مەن قىتايدىڭ قارىم- قاتىناستارى جاڭا دەڭگەيگە كوتەرىلىپ وتىر. عاسىرلار بويى شىعىس پەن باتىستى جالعاستىرىپ كەلگەن ۇلى جىبەك جولىنىڭ بۇگىندە ەكىنشى تىنىسى اشىلدى دەپ ايتۋعا بولادى. ق ح ر- دىڭ باستاماشىلىق تانىتىپ جانە جۇزەگە اسىرىپ جاتقان «ءبىر بەلدەۋ، ءبىر جول» باعدارلاماسى ۇلى جىبەك جولى بويىنداعى كوپتەگەن ەلدەردىڭ ىنتىماقتاستىعى ءۇشىن زور مۇمكىندىكتەر اشادى»، - دەدى كىتاپتىڭ تانىستىرىلىمىندا ءسوز سويلەگەن ق ر پرەزيدەنتى كەڭسەسى باسشىسىنىڭ ورىنباسارى باقىتجان تەمىربولات.
ال قىتايدىڭ قازاقستانداعى توتەنشە جانە وكىلەتتى ەلشىسى جاڭ حانحوي اتالعان كىتاپتا قىتاي حالقىنىڭ ۇلى ارمانىن قالاي جۇزەگە اسىرۋى تۋرالى باياندالعانىن ايتتى.
«قىتاي مەن قازاقستاننىڭ بىرلەسە وتىرىپ، بۇل كىتاپتى جارىققا شىعارۋى ەكى ەلدىڭ ىنتىماقتاستىعى ءۇشىن بارىنشا ماڭىزدى شارا. ەكى ەلدىڭ ءبىر- بىرىنەن تاجىريبە الماسۋىنا سەپتىگىن تيگىزىپ، مەملەكەتتەردىڭ بىرلەسكەن ستراتەگيالارىنا تىڭ سەرپىلىس بەرەدى. بۇعان قوسا ەكى ەلدىڭ قارىم- قاتىناستارىنىڭ دەڭگەيى جوعارى ەكەندىگىن اڭعارتادى. ق ر پرەزيدەنتى نۇرسۇلتان نازاربايەۆتىڭ ارنايى شاقىرۋىمەن ق ح ر ءتوراعاسى شي جينپيڭ مىرزا قازاقستانعا ءۇشىنشى رەسمي ساپارىمەن كەلەدى جانە ش ى ۇ- عا مۇشە مەملەكەتتەر باسشىلارىنىڭ وتىرىسىنا، ەكسپو-2017 مامانداندىرىلعان حالىقارالىق كورمەسىنىڭ رەسمي اشىلۋ سالتاناتىنا قاتىسادى»، - دەدى جاڭ حانحۇي.
ق ر تۇڭعىش پرەزيدەنتى - ەلباسى قورى جانىنداعى الەمدىك ەكونوميكا جانە ساياسات ينستيتۋتىنىڭ ديرەكتورى ەرجان سالتىبايەۆ شي جينپيڭنىڭ «ەل باسقارۋ جونىندە» كىتابى 2014 -جىلدان بەرى 100-دەن استام مەملەكەتتە 6 ميلليون دانامەن باسىلىپ شىققانىن اتاپ ءوتتى.
«بۇل كىتاپتىڭ قازاق تىلىندە اۋدارىلۋى مەملەكەت باسشىسىنىڭ ۇزدىك زامانۋي ادەبيەتتەردى قازاق تىلىنە اۋدارۋ بويىنشا قويعان تاپسىرمالارىنا جاۋاپ بەرىپ، مەملەكەتتىك تىلدەگى ادەبيەت قورىن تولىقتىرادى. سونىمەن قاتار وقىرمان اۋديتورياسى ايتارلىقتاي ۇلعايادى»، - دەدى ول.
ايتا كەتەيىك، كىتاپتا شي جينپيڭنىڭ 2012 -جىلدىڭ 15 - قاراشاسىنان 2014 -جىلدىڭ 13- ماۋسىمىنا دەيىن كوپشىلىك الدىندا سويلەگەن 79 ءسوزى، سۇحباتى، بايانداماسى، وقىعان دارىستەرى مەن قۇتتىقتاۋ حاتتارى ەنگەن.
اۆتور: مارلان جيەمباي
