تۇرىكمەنستاندا تاعى ەكى تەڭىز سۋىن تۇشىلاندىراتىن زاۋىت سالىنادى

استانا. قازاقپارات - بالقان ءۋالاياتىندا (وبلىس) ەكى تەڭىز سۋىن تۇشىلاندىراتىن زاۋىت سالۋ جوسپارلانىپ وتىر، دەپ حابارلايدى ت د ح اگەنتتىگى.

قۋاتى تاۋلىگىنە 50 مىڭ تەكشە مەتر تازا سۋ وندىرۋگە جەتەتىن زاۋىتتىڭ ءبىرى ەكەرەم اتىرابى (اۋدان) ەسەنگۋلى اۋىلىندا سالىنباقشى. تاۋلىگىنە 5 مىڭ تەكشە مەتر تازا سۋ وندىرەتىن ەكىنشى زاۋىت حازار قالاسىندا سالىنادى دەپ جوسپارلانىپ وتىر. تۇرىكمەنستاننىڭ اۋىل جانە سۋ شارۋاشىلىعى مينسترلىگى بۇل نىسانداردىڭ جوباسى جانە قۇرىلىسى بويىنشا حالىقارالىق تەندەر جاريالادى. تەندەر بويىنشا وتىنىشتەر قابىلداۋ 14 - شىلدەگە دەيىن جالعاسادى. بۇگىنگى تاڭدا تۇرىكمەننىڭ تەڭىز جاعالاۋىندا تەڭىز سۋىن تۇشىلاندىراتىن بىرنەشە زاۋىت جۇمىس ىستەيدى. ولاردىڭ ءبىرى كيانلى اتىرابىنداعى تۇرىكمەنباسى اۋىلىنداعى قۋاتتىلىعى تاۋلىگىنە 50 مىڭ تەكشە مەتر سۋ وندىرەتىن ستانساسى جانە اۆاز كۋرورتىنداعى قۋاتتىلىعى تاۋلىگىنە 35 مىڭ تەكشە مەتر تۇشى سۋ شىعاراتىن قوندىرعى.