حانويدا «قارا جورعا» ءبيىنىڭ قيمىلدارى شەتەلدىكتەردى تامساندىردى

بەيجىڭ- حانوي. قازاقپارات - ۆەتنام استاناسى حانويدا كوشپەندىلەردىڭ مادەنيەتى مەن ءداستۇرى، سان عاسىرلىق تاريحى، سونداي- اق قازاق پەن قىرعىز حالىقتارىنىڭ ۇلتتىق تاعامدارى كوپشىلىككە تانىستىرىلدى، دەپ حابارلايدى «قازاقپارات» ح ا ا قىتايداعى ءتىلشىسى.

 I am Nomad ءىس- شاراسىن حانوي ازيا ايەلدەرىنىڭ كلۋبى (Asian Woman and Friends in Hanoi Club) ۇيىمداستىردى. وعان شەتەلدىك ەلشىلەر، ۆەتنامنىڭ ىسكەري ايەلدەرى مەن وڭتۇستىك- شىعىس ازيا حالىقتارىنىڭ وكىلدەرى قاتىستى. قوناقتارعا ورتا ازيانىڭ عاجايىپ تابيعاتىنان جانە ونىڭ تاعىلىمى مول تاريحىنان سىر شەرتەتىن ۆيدەوروليك كورسەتىلدى.

 جيىنعا قاتىسۋشىلاردى كورمەگە قويىلعان ۇلتتىق زاتتار، اسپاپتار، قولونەر بۇيىمدارى كوبىرەك قىزىقتىردى. قىرعىزستاننىڭ وكىلى رەگينا گاتينا اتاقتى قىزعىز كومپوزيتورى اپاز جايناكوۆتىڭ «قىرعىز جەرى» ءانىن اسقاقتاتا ورىندادى. ال قازاقستاندىق ستۋدەنتتەر مەن ديپلوماتتاردىڭ ايەلدەرى ۇلتتىق كيىمدەرىن كيىپ، قازاقتىڭ قارا دومبىراسىن كۇمبىرلەتتى. كەش سوڭىندا قازاقستاندىقتار جينالعاندارعا «قارا جورعا» ءبيىن بيلەپ بەردى. «قارا جورعا» ءبيىنىڭ قيمىلدارى شەتەلدىكتەردىڭ تاڭدانىسىن تۋدىردى.

«بۇل شارانى ۇيىمداستىرۋداعى نەگىزگى ماقساتىمىز ۆەتنامدا تۇراتىن ءبىزدىڭ دوستارىمىزدى ۇلتتىق قۇندىلىقتارىمىزبەن تانىستىرۋ. وكىنىشكە وراي، وڭتۇستىك- شىعىس ازيا ەلدەرى ءبىز تۋرالى بىلە بەرمەيدى»، - دەدى حانوي ازيا ايەلدەرى كلۋبىنىڭ پرەزيدەنتى ايدا يشەناليەۆا.

جاپونيادان كەلگەن قوناق مايۋمي ماسۋدو جيىنداعى اسەرىمەن ءبولىستى.

«مەن بۇگىن ازيا ەلدەرىنىڭ تاريحى مەن مادەنيەتىنىڭ شەكسىزدىگىنە، الۋان تۇرلىلىگىنە ءتانتتى بولدىم. مەن ءوزىم ءۇشىن جاڭا دۇنيەلەردى اشتىم. ماعان اسىرەسە ۇلتتىق ءان مەن بي قاتتى ۇنادى»، - دەدى ول.