الماتىدا شالا تۋعان نارەستەلەردىڭ كوز جانارىن ەمدەيتىن اپپارات الىندى

استانا. قازاقپارات -  الماتىلىق وفتالمولوگتار شالا تۋعان نارەستەلەردىڭ كوز جانارىن ەمدەيتىن لازەرلىك اپپارات الدى. قۇرىلعىعا دەگەن سۇرانىس جوعارى. ويتكەنى ەلىمىزدە جىل سايىن 20 مىڭعا جۋىق بالا ايى- كۇنى جەتپەي ومىرگە كەلەدى.

 ولاردىڭ 40 پايىزىنا رەتينوپاتيا دياگنوزى قويىلادى. اۋرۋدىڭ بۇل ءتۇرى شالا تۋعان نارەستەلەردە عانا بولادى. بۇعان دەيىن ولاردىڭ باسىم بولىگى مۇگەدەك بولىپ قالاتىن. ەندى لازەرلىك اپپاراتتىڭ ارقاسىندا بالالاردىڭ جارىق دۇنيەنى كورۋ مۇمكىندىگى ارتا تۇسەدى. قازاقستاندا وسىنداي سەگىز اپپارات بولسا، ونىڭ ەكەۋى الماتىدا.

 اسەل ءشارىپوۆا، كوز اۋرۋلارى ق ا ز ع ز ي وفتالمولوگى:

- ەسكەرەتىن جايت، دياگنوز قويىلعاننان كەيىن 24-72 ساعاتتىڭ ىشىندە ەمدەگەن عانا ءتيىمدى. دەر كەزىندە ەمدەمەسە، كوزدىڭ ىشكى تور قابىعى قاباتتانىپ، نارەستە ءومىر بويى زاعيپ بولىپ قالادى. ەڭ باستىسى، دياگنوزدى دۇرىس قويىپ، ەم- دومدى تەز باستاۋ كەرەك.

www.24.kz