اناسى جەلىدە ءوزىن قايراتتىڭ كەلىنشەگىمىن دەپ جۇرگەن قىزدىڭ كىم ەكەنىن ايتتى

استانا. قازاقپارات - بەلگىلى پروديۋسەر گۇلزيرا ايداربەكوۆا جەلىدەگى ءوزىن قايراتتىڭ كەلىنشەگىمىن دەپ جۇرگەن قىز تۋرالى ويىمەن ءبولىستى.

سوڭعى ءبىر ايدىڭ كولەمىندە ينستاگرام جەلىسىندە جۇلدىز ابدۋكاريموۆا ەسىمىمەن تىركەلگەن بويجەتكەن ءوز سۋرەتتەرىن جۇكتەي باستادى. ول ءانشى قايرات نۇرتاس پەن ونىڭ اتا-اناسىن، تۋعان-تۋىستارى جانە ءىس ساپارلارى جايلى ءجيى جازىپ تۇرادى. ساناۋلى ۋاقىتتىڭ ىشىندە ءوز پاراقشاسىنا 30 مىڭعا جاقىن وقىرمان جيناپ ۇلگەردى.

جۇرت ينستاگرامداعى پاراقشاعا ءتۇرلى پىكىرلەرىن جازىپ، ءتىپتى پروديۋسەردى كەلىنىن ءۇي قاماقتا ۇستايتىن «قاتىگەز ەنە» دەپ تە ايىپتاعان ەدى.

ال ينستاگرام جەلىسىندەگى «كەلىن» جۇرتتى سەندىرۋ ءۇشىن ءتۇرلى ايلا-تاسىلدەر قولدانىپ باعۋدا. سەبەبى جۇرت ودان تىكەلەي ەفيرگە شىعۋىن تالاي مارتە سۇراعان بولاتىن. جاۋابى: «قالىڭدىق» فيلمى شىققاننان كەيىن مەنىڭ قازىرگى بەينەمدى كورەتىن بولاسىزدار. قازىرگە ەسكى سۋرەتتەرىمىزدى تاماشالاڭىزدار».

وسىعان بايلانىستى قايرات نۇرتاستىڭ اناسى ءارى پروديۋسەرى گۇلزيرا ايداربەكوۆادان ءوزىن قايراتتىڭ كەلىنشەگىمىن دەپ تانىستىرعان بويجەتكەن جايلى سۇراعان بولاتىنبىز.

«مەن ول پاراقشانى كوردىم. جۇرگىزىپ وتىرعان ادامنىڭ كىم ەكەنىن دە بىلمەيمىز. قازىر ءتۇسىرىلىم شارۋالارىنان، باسقا دا جۇمىستاردان مۇلدە قولىم بوساماي ءجۇر. ۋاقىتى كەلگەندە ارىز-شاعىم ءتۇسىرۋ دە ويىمىزدا بار»، - دەيدى ءانشىنىڭ اناسى.

الداعى ۋاقىتتا قايرات نۇرتاستىڭ كەلىنشەگىمىن دەگەن جەلى قولدانۋشىسى جاۋاپقا تارتىلۋى دا ابدەن مۇمكىن.

ەستەرىڭىزدە بولسا جەلىدەگى پاراقشادا قايرات نۇرتاسقا قاتىستى بارلىق جاڭالىق ءوز ۋاقىتىندا شىعىپ تۇرادى. ودان قالسا انشىگە ايتىلعان سىندارعا جاۋاپ جازىلعان كەزدەر دە بولدى.