ەلباسى: ازاماتتاردىڭ سوتقا سەنىم ارتقاندىعى جونىندە ايتۋعا ءالى ەرتە

استانا. قازاقپارات - قازاقستان پرەزيدەنتى نۇرسۇلتان نازاربايەۆ جوعارعى سوت ءتوراعاسى قايرات ءماميدى قابىلدادى، دەپ حابارلايدى اقوردانىڭ باسپا ءسوز قىزمەتى.

كەزدەسۋدە مەملەكەت باسشىسىنا «100 ناقتى قادام» ۇلت جوسپارى اياسىندا سوت رەفورماسىن ىسكە اسىرۋ جانە سوت تورەلىگىن اتقارۋ جۇمىستارى جونىندە ەسەپ بەرىلدى.

ەلباسى سوت جۇيەسىنىڭ جانە بۇكىل قۇقىق قورعاۋ سالاسىنىڭ الدىندا تۇرعان جۇمىستاردىڭ اۋقىمدى ەكەنىن اتاپ ءوتتى.

- ازاماتتار سوتقا سەنىم ارتىپ، كومەك الۋ ءۇشىن جۇگىنگەندە، شەشىم ءادىل بولىپ، ولاردىڭ قۇقىقتارى ناقتى قورعالعاندا عانا زاڭنىڭ تولىق ۇستەمدىگى قامتاماسىز ەتىلەدى. قازىر ولاي دەۋگە ءالى ەرتە، - دەدى قازاقستان پرەزيدەنتى.

مەملەكەت باسشىسى سوت پروتسەسىندە جارىسپالىلىقتىڭ جوقتىعىنا توقتالىپ، ادۆوكاتۋرانىڭ دامۋى ءالسىز ەكەنىنە نازار اۋداردى.

 - سوت جۇيەسىن جەتىلدىرۋ جونىندەگى بارلىق شارالار كەشەندى تۇردە اتقارىلۋعا ءتيىس. جەرگىلىكتى پوليتسيا جۇمىسىنا سىن ايتىلۋدا. بيزنەسكە جانە سالىققا قاتىستى تەكسەرۋلەر سانى ازايماي وتىر. وسى سالاداعى جۇمىستى جونگە كەلتىرۋ كەرەك، - دەدى نۇرسۇلتان نازاربايەۆ.

ق. ءمامي مەملەكەت باسشىسىنا قۇقىق قورعاۋ سالاسىندا جۇزەگە اسىرىلعان رەفورمالار سوت جۇيەسىنە وڭ اسەر ەتكەنىن باياندادى.

- رەسپۋبليكادا سوتتار تۇراقتى رەجىمدە جۇمىس ىستەۋدە. بيىل 5 ايدىڭ ىشىندە سوتتارعا 512 مىڭنان استام قىلمىستىق، ازاماتتىق جانە اكىمشىلىك ىستەر كەلىپ ءتۇستى. سولاردىڭ 417 مىڭنان استامى بەلگىلەنگەن پروتسەسسۋالدىق مەرزىمدە قارالدى، - دەدى جوعارعى سوت ءتوراعاسى.

بۇدان بولەك، ق. ءمامي قازاقستان پرەزيدەنتىنە ازاماتتاردىڭ سوتتارعا شاعىمدانۋى كوبەيىپ كەلە جاتقانى، سونداي- اق ەلەكتروندىق سوت جۇيەسىن ەنگىزۋ ناتيجەلەرى تۋرالى باياندادى.

 نۇرسۇلتان نازاربايەۆ كەزدەسۋ قورىتىندىسى بويىنشا ءبىرقاتار ناقتى تاپسىرما بەردى.