كيەلى ورىنداردى ارالايتىن ەكسپەديتسيا ساپارىن ۇلىتاۋدان باستايدى
بۇل تۋرالى QazaqGeography قوعامىنىڭ زاڭگەرى، QazaqGeography «كيەلى قازاقستان» ەكسپەديتسياسىنىڭ باسقارۋشىسى جانات ايتحوجين ورتالىق كوممۋنيكاتسيالار قىزمەتىندە ءمالىم ەتتى. ونىڭ ايتۋىنشا، «كيەلى قازاقستان» ەكسپەديتسيالار تسيكلىنىڭ 10 كۇنگە سوزىلاتىن العاشقى ساپارى ۇلىتاۋدان باستالادى. استانادان اۆتوكولىكپەن شىعاتىن ساياحاتشىلار ۇلىتاۋعا، ۇلىتاۋدان ارالعا، ارالدان ماڭعىستاۋ وڭىرىنە بەت الادى. «قازاقستاننىڭ كيەلى ورىندارىن زەرتتەۋ - ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنداعى مىندەتتەردىڭ ءبىرى ەكەنى بەلگىلى. وسىعان وراي، ەكسپەديتسيالار سيكلىن ۇيىمداستىرۋدى قولعا الدىق. ياعني، العاشقى ساپاردا باتىسقا ساپارلاپ، ءارى قاراي تۇتاس قازاقستاندى ارالايمىز» ، - دەدى «كيەلى قازاقستان» ەكسپەديتسياسىنىڭ باسقارۋشىسى جانات ايتحوجين.
سونىمەن بىرگە، ج. ايتحوجين كوپتەگەن كيەلى ورىنداردىڭ قاراۋسىز قالعانىن، ينفراقۇرىلىمنىڭ جوقتىعىن، ءار نىساننىڭ جاي- كۇيىن سارالاۋ قاجەتتىگىن باسا ايتتى. «كوپتەگەن ورىنداردىڭ قاراۋسىز قالعانى جاسىرىن ەمەس. كەيبىرىنە بارار جول جوق، ينفراقۇرىلىم جاسالماعان. ءبىزدىڭ ەكسپەديتسيانىڭ تاعى ءبىر مىندەتى - نىسانداردىڭ تۋريستىك الەۋەتىن باعالاۋ» ، - دەپ تولىقتىردى ول. ەكسپەديتسيا قۇرامىنا تاريحشىلار، ونەرتانۋشىلار، جۋرناليستەر جانە ءتۇسىرىلىم توبى ەنگەن. ساپار اياقتالعان سوڭ ەكسپەديتسيا تۋرالى عىلىمي- كوپشىلىك فيلم ءتۇسىرۋ جوسپارلانعان.
اۆتور: ايجان سەرىكجان قىزى
