قازاقستان ورتالىق ازيانىڭ تۇراقتىلىعىنا اقشانى ايامايدى - دەپۋتات اشىمبايەۆ

استانا. قازاقپارات - ق ر پارلامەنت ءماجىلىسىنىڭ دەپۋتاتى ماۋلەن اشىمبايەۆتىڭ ايتۋىنشا، ورتالىق ازيادا تۇراقتىلىق بولماي، قازاقستاننىڭ دامۋى ەكىتالاي.

سوندىقتان قازاقستان كەز كەلگەن ۋاقىتتا ايماقتىڭ تۇراقتىلىعىنا اقشا بولۋگە دايىن، دەپ حابارلايدى قازاقپارات ءتىلشىسى. «ءيا، ورتالىق ازيادا تۇراقتىلىق بولماسا، قازاقستاننىڭ ويداعىداي دامۋى دا مۇمكىن ەمەس. ءبىز ونى جاقسى تۇسىنەمىز. سول سەبەپتى قازاقستان ايماقتىڭ تۇراقتىلىعىنا اقشا قۇيۋعا اركەز دايىن. وسىعان بايلانىستى ءتيىستى نورماتيۆتىك-قۇقىقتىق اكتىلەر دە ماقۇلداندى. ماسەلەن، قىرعىزستانعا 100 ميلليون ا ق ش دوللارى كولەمىندە كومەك بەرۋ تۋرالى شارت بار. اتالعان كومەككە تاۋارلار مەن قىزمەتتەر دە كىردى. دەگەنمەن، باسىم بولىگى - اقشا. جالپى، بىزدە ارنايى زاڭناما بار. وعان سايكەس، قازاقستان ايماقتىڭ دامۋىنا وڭ اسەر ەتەتىن جوبالار مەن باستامالاردى قارجىلاندىرا الادى»، - دەدى ماۋلەن اشىمبايەۆ بۇگىن استانادا باستالعان كونفەرەنتسيادا.

ونىڭ ايتۋىنشا، قازاقستان ب ۇ ۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە الىنعاندا ورتالىق ازيانىڭ تۇراقتىلىعى ماسەلەسىن باستى باعدار دەپ بەلگىلەگەن بولاتىن. وسى ورايدا ايماقتى دامىتۋ مەن قاۋىپسىزدىك شارالارىن نىعايتۋ ماسەلەسى جوعارى دەڭگەيدە كوتەرۋدى كوزدەيدى.

«ءبىزدىڭ ديپلوماتتار ب ۇ ۇ قاۋىپسىزدىك كەڭەسىندە وسى ماسەلەنى جان-جاقتى تالقىلاپ، الەمدىك قاۋىمداستىققا جەتكىزەتىن بولادى. قازىردىڭ وزىندە ءبىرقاتار شارالار قولعا الىنىپ وتىر»، - دەپ اتاپ كورسەتتى دەپۋتات.