ورتالىق ازيا وداعىن قۇرۋ ماسەلەسىنە ءبارىبىر ورالامىز - ءماجىلىس دەپۋتاتى

استانا. قازاقپارات - ق ر پارلامەنت ءماجىلىسىنىڭ دەپۋتاتى ماۋلەن اشىمبايەۆ ورتالىق ازيادا جاڭا ايماقتىق بىرلەستىكتى قۇرۋ ماسەلەسىن قايتا كوتەردى، دەپ حابارلايدى قازاقپارات ءتىلشىسى.

«مەن بىلەمىن، ول يدەيانى اركىم ءارقالاي قابىلدايدى. دەگەنمەن، ەرتە مە، كەش پە، ءبىز ورتالىق ازيا ايماعىندا جاڭا بىرلەستىكتى قۇرۋ ماسەلەسىنە ورالامىز. بۇعان دەيىن بۇل جەردە ورتالىق ازيا وداعىن قۇرۋ باستامالارى بولعان. ونىڭ جايىن ءبارىمىز جاقسى بىلەمىز. ازىق-تۇلىك، سۋ-ەنەرگەتيكالىق جانە كولىك-كوممۋنيكاتسيالىق باعىتتا ءۇش كونسورتسيۋم دا قاراستىرىلدى. سونىڭ اياسىندا بىرىگۋ ماسەلەسى دە تالقىلاندى. ءتىپتى، ورتالىق ازيا بانكىن دە قۇرىپ ۇلگەردىك. الايدا، اتالعان جوبالاردىڭ بىردە-ءبىرى ىسكە اسپاي قالدى. سوندىقتان الداعى ۋاقىتتا بۇعان دەيىنگى باستامالاردى جاڭا تۇرعىدان قاراستىرىپ، قولعا الۋعا بولادى دەپ ويلايمىن»، - دەدى م. اشىمبايەۆ بۇگىن استانادا باستالعان كونفەرەنتسيادا.

ونىڭ ايتۋىنشا، ورتالىق ازيا ايماعىندا ناقتى ءبىر بىرلەستىك قۇرىلسا ول سونىڭ اياسىندا عانا شەكتەلىپ قالماۋى قاجەت. ەۋرازيالىق ەكونوميكالىق وداق باعىتىندا ءوزارا ينتەگراتسيانى، قىتايدىڭ «ءبىر بەلدەۋ - ءبىر جول» جوباسى بويىنشا، ءتىپتى ءۇندىستان مەن پاكىستان سياقتى مەملەكەتتەرمەن اراداعى بايلانىستاردى نىعايتقان اسا ماڭىزدى.

ايتا كەتەيىك، بۇگىن استانادا قازاقستاننىڭ ستراتەگيالىق زەرتتەۋلەر ينستيتۋتىنىڭ ۇيىمداستىرۋىمەن ورتالىق ازياداعى قاۋىپسىزدىك ماسەلەلەرىنە ارنالعان جىل سايىنعى كونفەرەنتسيا باستالدى. بيىلعى كونفەرەنتسيانىڭ تاقىرىبى - «جاھاندىق ترانسفورماتسيا جاعدايىنداعى ورتالىق ازيا». جيىنعا وزبەكستان، قىرعىزستان، قىتاي مەن رەسەيدىڭ ساراپشىلارى قاتىسۋدا.

اۆتور: ارمان اسقاروۆ