ەرتەڭگى ايقاس فينالعا شىعۋعا جول سالاتىن باستى قادام - نۇرلان اقۇرپەكوۆ

استانا. قازاقپارات - ەلوردالىق «استانا ارلاندارىنىڭ» باس جاتتىقتىرۋشىسى  نۇرلان ساكەن ۇلى قازاقپارات تىلشىسىنە بەرگەن سۇحباتىندا «ەرتەڭگى ايقاس فينالعا شىعۋعا جول سالاتىن باستى قادام» ەكەنىن ايتىپ بەردى.

- نۇرلان ساكەن ۇلى ەرتەڭ قوستاناي تورىندە شاكىرتتەرىڭىز  ۇلى بريتانيانىڭ كومانداسىمەن جارتىلاي فينالدىق كەزدەسۋدىڭ العاشقى ايقاستارىن وتكىزبەك. دايىندىقتارىڭىز قالاي؟

- دايىندىعىمىز وتە جاقسى. بوكسشىلارىمىز بۇرىننان وسى جوبادا جۇرگەن تاجىريبەلى. سوندىقتان تەك شاكىرتتەرىمنەن جەڭىس كۇتىپ وتىرمىن. 49 كەلىدە ەرمەك ماديەۆ، 56 كەلىدە ءىلياس سۇلەيمەنوۆ، 64 كەلىدە ءدىلمۇرات ميجيتوۆ، 75 كەلىدە ءوزىمنىڭ ءتول شاكىرتىم ءابىلحان امانقۇل بار. ال 91 كەلىدە جەرگىلىكتى بوكسشى انتون پينچۋك ەل نامىسىن قورعايدى. پينچۋك ءوز جەرلەستەرى الدىندا بارىن سالام دەپ وتىر.

- قارسىلاستارىڭىز تۋرالى نە بىلەسىزدەر؟

- ءبىز قارسىلاستارىمىزدى جاقسىلاپ زەرتتەدىك. ولاردىڭ ۇشەۋى تازا اعىلشىن، ەكەۋى لەگيونەر بوكسشى ەكەن. سونىڭ ىشىندە 49 كەلى مەن 64 كەلى سالماقتاعى بوكسشىلارى عانا تاجىريبەلى كورىندى بىزگە. ال قالعان ءۇش سالماقتاعى بوكسشىلارىنان ەرەكشە ءبىر كەرەمەتتى ازىرگە بايقاي المادىق.

- بۇيىرسا ويسىراتا جەڭەمىز دەپ جوسپارلاپ وتىرسىزدار عوي؟

- سپورت سونداي ماقساتپەن عانا ورلەيدى. ءوز باسىم الدىن الا بولجام جاساعاندى اسا قالامايمىن. ءبىراق، شاكىرتتەرىم شەتىنەن جەڭىسكە لايىق دەپ ەسەپتەيمىن. ولار جاتتىعۋدى وتە تىڭعىلىقتى، قۇلشىنىسپەن جاسادى. بارلىعى دا جەڭىس ءۇشىن جۇدىرىقتاسادى.

- وسىدان ءبىراز ۋاقىت بۇرىن «ارلاندارعا» ۇلتتىق قۇرامانىڭ بوكسشىلارى كومەككە كەلۋى مۇمكىن دەگەن اقپاراتتار ەستىپ ەدىك...

- ءيا، ونداي جوسپارلار بولعان. ءبىراق، ازىرگە ناقتىلى بەلگىسىز. باسشىلىق ۇلتتىق قۇرامانىڭ باس باپكەرى مىرزاعالي ايتجانوۆقا: «الدا الەم بىرىنشىلىگى جاقىنداپ كەلەدى. ارلاندارعا بوكسشىلارىڭدى بەرەمىن دەپ جۇرگەندە، ولار ويلاماعان جەردەن جاراقات الىپ قالىپ، الەم بىرىنشىلىگىنەن قالىپ قويماڭدار»، دەپ ەسكەرتىپتى. ءبىز جارتىلاي فينالدىڭ العاشقى جانە قارىمتا كەزدەسۋىندە تازا ءوز بوكسشىلارىمىزدى سىنعا سالامىز. ەگەر، اللا قالاپ، فينالعا شىعىپ جاتساق قانا ۇلتتىق قۇرامادان كومەك سۇراۋىمىز مۇمكىن.

- ەگەر فينالعا شىقساڭىزدار قاي كوماندا قارسىلاس بولۋى مۇمكىن؟

- ەكىنشى توپتا كۋبا مەن كولۋمبيا اراسىنداعى جەڭىمپاز كوماندامەن شىعامىز. كۋبانى جاقسى بىلەسىزدەر، وتە مىقتى كوماندا. ال كولۋمبيا دا وسال ەمەس. بۇيىرتقانىن كورەمىز.

- بيىلعى ماۋسىمدا تورەشىلەر جاعىنان بۇرا-تارتۋشىلىقتىڭ قۇربانى بولعان كەزدەرىڭىز بولدى ما؟

- ونداي-ونداي سپورتتا كوپ كەزدەسەدى. ءبىراق، وسى جوباعا قاتىسقان العاشقى جىلداردان بەرى قاراي تورەشىلەر قانداي قىسىم جاساسا دا جۇلدەگەرلەر قاتارىنان قالىپ كورگەن ەمەسپىز. ەكى رەت چەمپيون اتاندىق. بيىلدا سول جەتىستىكتى قايتالاعىمىز كەلەدى. جالپى، اعىلشىندار ءوز جەرىندە وتەتىن جارىستاردا بۇرا تارتۋشىلىقتى كوپ جاسايدى. سوندىقتان ەرتەڭگى جارىستا بارىنشا ايقىن باسىمدىقپەن ۇتۋىمىز كەرەك. ەرتەڭگى ايقاس فينالعا شىعۋعا جول سالاتىن باستى قادام.

- اڭگىمەڭىزگە راحمەت! ساتتىلىك تىلەيمىز...

اۆتور: كۇنسۇلتان وتارباي