پروموۋتەر قانات يسلامنىڭ الداعى جوسپارلارى تۋرالى ايتىپ بەردى

استانا. قازاقپارات - وتانداسىمىز استاناداعى بوكس كەشىنە دەيىن تاعى ءبىر كەزدەسۋ وتكىزەدى ەكەن.

ءبىرىنشى ورتا سالماقتاعى WBO NABO جانە WBA Inter- Continental تۇجىرىمدارى بويىنشا الەمنىڭ جاڭا چەمپيونى قانات «QAZAQ» يسلامنىڭ (24-0, 19 كو) پروموۋتەرى نەلسون لەپوس بوكسشىنىڭ كەلەسى كەزدەسۋىن قاشان وتكىزەتىندىگىن جانە الەمنىڭ بۇرىنعى چەمپيوندارى ميگەل كوتتو (40-5, 33 ك و) مەن دجەيمس كيركلەندكە (32-2, 28 ك و) قارسى جەكپە-جەك تۋرالى پىكىرىن ءبىلدىردى.

«قانات يسلام كەلەسى كەزدەسۋىن شىلدە ايىندا وتكىزەدى. قارسىلاس ءالى انىقتالعان جوق. كەلەسى كەزدەسۋ فلوريدادا ءوتۋى مۇمكىن. بۇل بوكس كەشىندە كيركلەندە تە ونەر كورسەتۋى مۇمكىن. قازىرگى ۋاقىتتا بۇل تۋرالى كەلىسسوزدەر جۇرگىزىلىپ جاتىر. بۇل بوكس كەشىندە ەكەۋى دە (يسلام مەن كيركلەند) جەڭىسكە جەتەتىن بولسا، ولار 9- قىركۇيەك كۇنى استانادا كەزدەسۋلەرى ىقتيمال»، - دەيدى لوپەس ESPN ارناسىنا بەرگەن سۇقباتىندا.

پروموۋتەردىڭ ايتۋىنشا، ەگەر قانات يسلام الداعى بۇل ەكى كەزدەسۋىندە دە جەڭىسكە جەتەتىن بولسا، وندا كوتتامەن كەزدەسۋگە جول اشىلادى. پۋەرتوريكالىق بوكسشى ءوزىنىڭ كەلەسى كەزدەسۋىن 26- تامىز كۇنى لوس-اندجەلەستە جاپونيالىق بوكسشى يوسيحيرو كامەگايعا (27-3-2, 24 ك و) قارسى وتكىزەدى. جەكپە-جەكتە ءبىرىنشى ورتا سالماقتاعى WBO چەمپيوندىق بەلبەۋى ساراپقال سالىنادى.

«ەگەر بۇل كەزدەسۋدە كوتتو جەڭىسكە جەتپەيتىن بولسا، ءبىز ءۇشىن قاتتى ماڭىزدى ەمەس: ءبىز كەز-كەلگەن چەمپيونمەن كەزدەسۋگە دايىنبىز»، - دەيدى لوپەس.

ەسكە سالايىق، قانات يسلام ءوزىنىڭ سوڭعى كەزدەسۋىن 26- مامىر كۇنى مەكسيكالىق نوربەرتو گونسالەسكە قارسى وتكىزىپ، 12 راۋندتىڭ قورىتىندىسى بويىنشا تورەشىلەردىڭ شەشىمىمەن جەڭىسكە جەتتى. ءسويتىپ ورتا سالماقتاعى WBO NABO جانە WBA WBA Inter-Сontinental  تۇجىرىمى بويىنشا چەمپيوندىق بەلبەۋلەرىن جەڭىپ الدى. قازىرگى ۋاقىتتا وتانداسىمىزدىڭ ەنشىسىندە 24 كەزدەسۋ بار جانە بوكسشىمىز ونىڭ بارلىعىندا جەڭىسكە جەتكەن. 19 كەزدەسۋدە ول قارسىلاستارىن نوكاۋتقا جىبەرگەن.

بۇل جەڭىسىنەن كەيىن يسلام BoxRec پورتالىنىڭ رەيتينگىندە ءبىرىنشى ورتا سالماقتاعى بوكسشىلاردىڭ اراسىندا 27 ساتىعا جوعارىلاپ، 26- ورىنعا جايعاستى.

قانات يسلامنىڭ سوڭعى كەزدەسۋىنەن كەيىن قازاقستاندىق بوكسشى مەن كيركلەندتىڭ كومانداسى جەكپە-جەك وتكىزۋ ءۇشىن كەلىسسوز جۇرگىزىپ جاتىر دەگەن مالىمەت شىققان بولاتىن. بۇل كەزدەسۋ 9- قىركۇيەك كۇنى ەلوردامىز استانا قالاسىندا ءوتۋى ىقتيمال. امەريكالىق بوكسشى بۇل كەزدەسۋ ءۇشىن قازاقستانعا كەلۋگە دايىن ەكەنىن دە ايتتى.

ايتا كەتەيىك، 33 جاستاعى كيركلەند ءوزىنىڭ سوڭعى كەزدەسۋىن 2015-جىلى مەكسيكالىق ساۋل «كانەلو» الۆارەسكە قارسى وتكىزىپ، جەڭىلىپ قالعان ەدى. جالپى ول كاسىپقوي بوكسشى 34 كەزدەسۋ وتكىزىپ، ونىڭ 32 جەڭىسكە جەتكەن.