استانادا ەلگە ورالعان وتانداسىمىزدىڭ ەلوردا تاريحىنا قاتىستى جاڭا كىتابى تانىستىرىلادى

استانا. قازاقپارات - قازاقستان رەسپۋبليكاسى ۇلتتىق مۋزەيىندە ۇلتتىق تاريحشىلار كونگرەسىنىڭ حاتشىسى، تاريح عىلىمىنىڭ دوكتورى، ەۋرازيا ۇلتتىق ۋنيۆەرسيەتىنىڭ پروفەسسورى

زيابەك قابىلدينوۆتىڭ «استانا: وتكەنى جانە بۇگىنى» اتتى كىتابىنىڭ تۇساۋ كەسەر ءراسىمى وتەدى، دەپ حابارلايدى ۇلتتىق مۋزەيدىڭ باسپا ءسوز قىزمەتى.

كىتاپتا استانانىڭ ەجەلگى تاريحىنان بۇگىنىنە دەيىنگى تاريحي وقيعالار قامتىلعان. كىتاپ «ەكسپو-2017» كورمەسى مەن استانامىزدىڭ الماتىدان اقمولاعا (استاناعا) كوشكەنىنە 20 جىل تولۋىنا وراي شىعىپ وتىر.

اتالمىش ەڭبەكتە كوپتەگەن ارحيۆتىك جانە جازبا ماتەريالدارمەن قوسا فولكلورلىق شىعارمالار دا قولدانىلعان.

اۆتور بۇل جۇمىستى جازۋ ءۇشىن م. ابسەمەتوۆ، ن. اعىبايەۆ، گ. الپىسبايەۆا، ك. اميروۆا، ب. دوسانوۆا، ا. كاكەن، م. قۇسايىنوۆ، ج. قاسىمبايەۆ، ا. سمايىل، د. شاحمانوۆ سىندى ولكەتانۋشى عالىمداردىڭ ەڭبەكتەرىنە سۇيەنگەن.

كىتاپ استانانىڭ وتكەنى مەن بۇگىنى قىزىقتىراتىن بارشا وقىرماندارعا ارنالعان. «استانا: وتكەنى جانە بۇگىنى» كىتابىنىڭ اۆتورى قابىلدينوۆ زيابەك ەرمۇحان ۇلى 1965-جىلعى 13- جەلتوقساندا رەسەيدىڭ ومبى وبلىسى، تاۆريچەسكي وبلىسىنداعى بايدالين (بايتۇياق) اۋىلىندا دۇنيەگە كەلگەن.

1991-جىلى ومبى مەملەكەتتىك ۋنيۆەرسيتەتىن «تاريح» ماماندىعى بويىنشا ءبىتىرىپ، «قازاق ءتىلى» قوعامىنىڭ ومبىداعى بولىمىندەگى «ومبى ءۇنى» گازەتىندە قىزمەت ەتكەن. 1997-جىلى كانديداتتىق، ال، 2003-جىلى رەسەي يمپەرياسى تەرريتورياسىنداعى قازاق حالقىن قالىپتاستىرۋ پروبلەمالارى تاقىرىبىندا دوكتورلىق دەسسەرتاتسياسىن قورعاعان.

500 گە جۋىق عىلىمي ەڭبەكتەر مەن پۋبليتسيستيكالىق ماقالالاردىڭ جانە بىرنەشە وقۋ قۇرالدارى مەن ءۇش مونوگرافيانىڭ اۆتورى.

2004-2017-جىلدار ارالىعىندا 30 دان استام وتاندىق جانە شەت ەلدىك عىلىمي جوبالارعا قاتىسقان. 2007-جىلعى قورىتىندى بويىنشا «قازاقستان ج و و- نىڭ ۇزدىك وقىتۋشىسى» جانە قازاقستان جۋرناليستەر وداعىنىڭ مۇشەسى. زيابەك قابىلدينوۆ عالىم رەتىندە قازاق دياسپوراسىنىڭ قالىپتاسۋى، ءدىن، كوشى-قون جانە قاۋىپسىزدىك، تىلدىك ساياسات، ۇلتتىق يدەيا، ۇلتارالىق قارىم-قاتىناس، قازاقستان تاريحى سىندى تاقىرىپتاردا زەرتتەۋلەر جۇرگىزىپ، قالام تەربەگەن.

ال، عالىمنىڭ «استانا: وتكەنى جانە بۇگىنى» كىتابى سوڭعى جازعان ەڭبەگى جانە ۇزاق جىلدىق ىزدەنىس پەن ەڭبەكتىڭ جەمىسى. كىتاپتىڭ تانىستىرىلىمى 2017-جىلعى 2- ماۋسىمدا ساعات 15:00-دە باستالادى.