الماتىدا بيىل ءۇي كەزەگىندە تۇرعان ءاربىر ءتورتىنشى وتباسى پاتەرلى بولادى -فوتو
ايتا كەتۋ كەرەك، پاتەرلەر بۇرىنعى اتلەت اۋىلىنان بەرىلدى.
قالا اكىمىنىڭ ايتۋىنشا، ەل پرەزيدەنتىنىڭ تاپسىرماسى بويىنشا الماتىدا «نۇرلى جول» باعدارلاماسىنىڭ ينفراقۇرىلىمدىق جوبالارىنا 20 ميلليارد تەڭگە، ال داعدارىسقا قارسى باعدارلاما اياسىندا تۇرعىن ءۇي قۇرىلىسىنا رەسپۋبليكالىق بيۋدجەتتەن 33 ميلليارد تەڭگە بولىنگەن.
قالادا وتكەن جىلدان بەرى كەزەكتە تۇرعاندارعا 4 مىڭعا جۋىق پاتەر بەرىلگەن.
بۇل كورسەتكىش 2014-2015 -جىلدارمەن سالىستىرعاندا ەكى ەسەگە ارتىق.
«الماتىدا «نۇرلى جول» باعدارلاماسى اياسىندا العاشقى بەس جىل ىشىندە قۇنى 140 ميلليارد تەڭگە بولاتىن 670 مىڭ شارشى مەتر تۇرعىن ءۇي سالىنادى. جىل قورىتىندىسى بويىنشا ءۇي كەزەگىندە تۇرعان ءاربىر ءتورتىنشى وتباسى تيەسىلى پاتەرىن الادى. بۇگىن ءبىز كەزەكتە تۇرعان 120 وتباسىعا پاتەر كىلتتەرىن تاپسىرامىز، ولاردىڭ اراسىندا مۇگەدەكتەر، كوپبالالى جانە تولىق ەمەس وتباسىلار، مەملەكەتتىك قىزمەتكەرلەر، بيۋدجەت قىزمەتكەرلەرى، اسكەريلەر بار. بۇلاردىڭ باسىم كوپشىلىگى - پاتەر جالداپ نەمەس تۋىستارىنىڭ ءۇيىن پانالاپ، پاتەر كەزەگىندە ۇزاق تۇرعاندار» - دەدى ب. بايبەك.
الماتى اكىمى حالىققا پاتەر ءبولۋدى بارىنشا اشىق جۇرگىزۋ ءۇشىن ءتۇرلى شارالاردىڭ جۇزەگە اسقانىن جەتكىزدى. بۇدان بىلاي ءۇي كەزەگىنە قويۋ جانە كەزەكتىڭ جىلجۋى ەلەكتروندى ۇكىمەت پورتالى ارقىلى جۇرەتىن بولادى. سونىمەن قاتار، العاش رەت كەزەكتىڭ ەلەكتروندى ينۆەنتاريزاتسياسى ەنگىزىلگەن، ياعني كەزەكتە تۇرعاندار جىل سايىن تۇرعىن ءۇي باسقارماسىنا كەلمەي - اق ديستانتسيالىق جۇيە ارقىلى وزىنە قاتىستى مالىمەتتى بىلەدى. تاعى ءبىر جاڭالىق، س م س- حابارلار ارقىلى دا قاجەتتى مالىمەتتى الۋعا بولادى. بۇلاردان وزگە، كەزەكتە تۇرعاندار اراسىندا اۆتونومدى كەستە ارقىلى پاتەر ءبولۋ مەحانيزمى جىل اياعىنا دەيىن ەنگىزىلەدى.
اتلەتتەر اۋىلىنىڭ كەشەنى 23 گەكتار اۋماقتى الىپ جاتىر، مۇندا 14 تۇرعىن ءۇي بار. ونىڭ اينالاسى زاماناۋي ۆيدەباقىلاۋ جۇيەسىمەن، ءورت قاۋىپسىزدىگمەن تولىق قامتىلعان. اۋىل كەشەنىندە حقكو، ەمحانا، سۋپەرماركەت، بانك جانە پوشتا بولىمشەلەرى، پوليتسيانىڭ تىرەك پۋنكتى جۇمىس ىستەيدى. اتلەتتەر اۋىلىن سالۋعا زاماناۋي ءارى ەكولوگيالىق تازا ماتەريالدار پايدالانىلدى.
اتاپ وتەرلىك جايت، الاتاۋ اۋدانى قۇرىلعالى بەرى مۇنداعى تۇرعىندار سانى 1,5 ەسەگە ارتىپ، 200 مىڭ ادامعا جەتتى. سەگىز جىل ىشىندە اۋداندى دامىتۋعا قالا بيۋدجەتىنەن 200 ميلليارد تەڭگەدەن استام قارجى ءبولىندى، سونىڭ ارقاسىندا حالىقارالىق دەڭگەيدەگى الماتى ارەنا سپورت نىسانى، اكىمدىك، سوت، پروكۋراتۋرا، سالىق، ارنايى ح ق ك و، ءا ى ى د عيماراتتارى، زاماناۋي مادەني نىساندار، مەكتەپتەر، بالا باقشالار، ەمحانالار مەن اۋرۋحانالار ىسكە قوسىلدى. جاڭا مەشىت سالىنىپ جاتىر. ۇلكەن الماتى كانالىنىڭ اينالاسى، بورالداي وزەنىنىڭ جاعالاۋى اباتتاندىرىلدى.
اۆتور: گۇلميرا عوسمانالي
