استانا تۇرعىندارى قايتادان تىركەۋگە تۇرۋى كەرەك

استانا. قازاقپارات - مىندەتتى الەۋمەتتىك مەديتسينالىق ساقتاندىرۋ جۇيەسىنىڭ ەنگىزىلۋىنە بايلانىستى ءاربىر ازامات جۇمىسى بار، يا بولماسا، جۇمىسى جوق ادام رەتىندە تىركەۋگە تۇرۋى ءتيىس.

 وسىعان وراي بارلىق اقپارات جازىلعان پاراقشالاردى اكىمدىك قىزمەتكەرلەرى كوپقاباتتى ۇيلەرگە جەكەلەي بارىپ، تاراتىپ ءجۇر، دەپ حابارلايدى قازاقپارات ءتىلشىسى.

 «2017 - جىلى 1 - شىلدەدەن باستاپ قازاقستان رەسپۋبليكاسىندا مىندەتتى الەۋمەتتىك مەديتسينالىق ساقتاندىرۋ بويىنشا ازاماتتاردىڭ مەديتسينالىق كومەكتى الۋعا دەگەن قۇقىقتارىن قامتاماسىز ەتۋ ماقساتىندا اي سايىن جارنالار مەن اۋدارىمدار جاسالاتىن بولادى. اتالعان جارنالار مەن اۋدارىمداردىڭ مولشەرى ءسىزدىڭ الەۋمەتتىك مارتەبەڭىزگە بايلانىستى بولادى: جۇمىس بەرۋشىلەر ءوز جۇمىسشىلارى ءۇشىن جارنالار مەن اۋدارىمداردى جاسايدى؛ ءوزىن- ءوزى جۇمىسپەن قامتىپ جۇرگەن ازاماتتار (ونىڭ ىشىندە كاسىپكەرلەر دە بار) ءوز تابىستارىنان نەمەسە ەڭ تومەنگى ەڭبەكاقىدان جارنا تولەيدى؛ مەملەكەت الەۋمەتتىك جاعىنان از قامتىلعان ازاماتتار ءۇشىن جارنالار اۋدارادى»، - دەلىنگەن اكىمدىكتىڭ حابارلاندىرۋ پاراقشالارىندا. وندا الەۋمەتتىك جاعىنان قورعالماعان توپتارعا كىرەتىن ازاماتتار دا كورسەتىلگەن. ولار - بالالار، «التىن القا» مەن «كۇمىس القانىڭ» يەگەرلەرى، ارداگەرلەر، زەينەتكەرلەر، مۇگەدەكتەر، كۇندىزگى بولىمدە وقيتىن ستۋدەنتتەر، دەكرەتتىك دەمالىستا جۇرەن تۇلعالار، جۇمىسپەن قامتۋ ورتالىعىندا جۇمىسسىز رەتىندە تىركەلگەندەر، ينتەرناتتا ءبىلىم الاتىندار، ۋاقىتشا نەمەسە تەرگەۋ اباقتىسىندا وتىرعاندار، سونداي- اق جازاسىن تۇرمەدە وتەپ جۇرگەندەر.

«ەگەر ءسىز ءوزىڭىزدىڭ الەۋمەتتىك مارتەبەڭىزدى انىقتاۋدا قينالساڭىز، وندا www.egov.kz «ەلەكتروندى ۇكىمەت» پورتالىندا الەۋمەتتىك مارتەبەڭىزدى بىلۋىڭىزگە بولادى»، - دەلىنگەن قۇلاقتاندىرۋدا. استانا اكىمدىگى پورتالدا ءتيىستى اقپاراتتى تابا الماعان ازاماتتارعا جۇمىسپەن قامتۋ ورتالىعىنا (بەيبىتشىلىك كوش. , 25, تەل. 57-88-86, 57-85-42,57-86-19) حابارلاسۋعا كەڭەس بەرىلۋدە.

 ايتا كەتەيىك، بۇعان دەيىن ق ر اقپارات جانە كوممۋنيكاتسيالار ءمينيسترى داۋرەن ابايەۆ تا مىندەتتى الەۋمەتتىك مەديتسينالىق ساقتاندىرۋدىڭ ەنگىزىلۋىنە بايلانىستى ءاربىر ازاماتتى ەرتەرەك تىركەلۋگە ۇندەگەن بولاتىن. ۇكىمەت باسشىسى باقىتجان ساعىنتايەۆ بولسا، حالىققا قىزمەت ورتالىقتارىندا قاربالاستىققا جول بەرمەۋدى تاپسىردى. سەبەبى 1 - شىلدەدەن باستاپ جۇمىس بەرۋشىلەر جۇمىسشىلار ءۇشىن جارنا تولەۋدى باستايدى. ال كەلەسى جىلدان باستاپ ونداي جارنالار جۇمىسشىلاردىڭ ەڭبەكاقىسىنان دا ۇستالادى.

 اۆتور: ارمان اسقاروۆ