ديماش ەسىرتكى بارونىن قۇرىقتادى
بۇل تۋرالى شىمكەنت قالاسىنداعى جەرگىلىكتى پوليتسيا قىزمەتىنىڭ باستىعى دانيار مەيىرحان فەيسبۋكتەگى پاراقشاسىندا جازدى، دەپ حابارلايدى قازاقپارات ءتىلشىسى.
«نيۋ- يورك قالاسىندا مەنىڭ ارىپتەسىم ديماش نيازوۆ تۋرالى تاعى ايتا باستادى. ويتكەنى قازاقستاننىڭ تۋماسى ارنايى ناگرادامەن ماراپاتتالدى. وعان ءوز قىزمەتىن ابىرويمەن اتقارعانى ءۇشىن ارنايى جەتون تابىستالدى. ديماش ەسىرتكى بارونىن قۇرىقتاپ، برۋكلين اۋماعىندا قىلمىستىڭ تومەندەۋىنە قوماقتى ۇلەس قوستى. بايقاساڭىزدار، جەتوندا امەريكا قۇراما شتاتتارىنىڭ تۋى بار. ال تومەنگى جاعىندا قازاقستاننىڭ بايراعى بەينەلەنگەن» ، - دەپ جازدى ديماشتىڭ قازاقستاندىق ارىپتەسى. دانيار مەيىرحان ءوز ارىپتەسىن قۇتتىقتاي كەلە، قۇقىق قورعاۋ ورگاندارىندا باسشىلىق پەن قىزمەتكەرلەر اراسىنداعى قازىرگى قارىم- قاتىناس پروبلەماسىن كوتەرىپ، بەلسەندى قىزمەتكەرلەرگە قاتىستى تەرىس پسيxولوگيادان، ەسكى مەنتاليتەتتەن ارىلۋ قاجەتتىگى جايىندا وي قوزعايدى.
«الەمنىڭ قاي مەملەكەتى بولسا دا، پوگون تاققان ادام ءۇشىن ونىڭ ەڭبەگىن باعالايتىن باسشىلىقتىڭ بولعانى ماڭىزدى. وكىنىشكە قاراي، ءبىزدىڭ جۇيەمىزدە باسقاشا. قاتارداعى قىزمەتكەرلەر كوپ جاعدايدا ماراپاتتاۋسىز قالىپ جاتادى. ءتىپتى، باسشىلىقتىڭ العىس ءسوزىن دە ەستىمەيدى. الايدا ءدال سول قاراپايىم قىزمەتكەرلەردىڭ كۇن- ءتۇن دەمەي، جۇمىس ىستەپ جۇرگەنىن ۇمىتپاۋ قاجەت. ايتپەسە، باسشىلار ناعىز ەڭبەكقور قىزمەتكەرلەردى مانساپقۇمار دەيدى دە، ولاردىڭ جۇمىس ساپاسىن كوتەرۋگە دەگەن ارەكەتتەرىن تەرىس قابىلدايدى» ، - دەيدى مەيىرحان. ايتا كەتەيىك، شىمكەنتتىك ديماش نيازوۆ 13 جاسىندا ا ق ش- قا كوشىپ كەتكەن. ءۇش جىلدان بەرى NYPD (New York City Police Department) - نيۋ- يورك قالاسىنىڭ پوليتسيا دەپارتامەنتى جۇمىس ىستەپ كەلەدى. 2017 -جىلدىڭ باسىندا ول ۇزدىك پوليتسەي رەتىندە تانىلعان بولاتىن.
اۆتور: ارمان اسقاروۆ
